Александар Карадаковски, кој загина во пожарот во дискотеката „Пулс“, се нафатил да биде управител на фирмата „МММ кафе“ ДООЕЛ за да не му пропадне лиценцата на Дејан Јованов Деко, првообвинет во случајот.

Денеска сведочеше таткото на Александар, Наско Карадаковски, кој рече дека син му се вратил од Скопје во Кочани зашто бил пријател со Михајло, синот на Деко. Тој рече дека Александар бил пријавен како управител без соодветно здравствено осигурување, а за тоа дознал кога се повредил и кога отишол на лекар.

Александар од 2018 година работел во кафулето „Класик“ во Кочани. За првпат бил пријавен како редовно вработен таму во 2021 година. Кога татко му дознал дека нема здравствено, го посоветувал да се пријави во Агенцијата за вработување, но синот му рекол дека не може зашто е пријавен како управител.

Таткото почнал да го прашува зошто е управител, на што Александар му рекол дека Деко го замолил зашто „немал кого да постави, за да не му пропадне лиценцата“, па него го пријавил.

– Тогаш многу ме изненади. Го прашав дали знае кои се одговорностите на еден управител, дали знае и дали оди во банка и води сметководство, ми рече „Не, тоа си го прават Деко и Михајло“. Мене веќе почна да ме фаќа паника и му реков да оди кај Деко и да го среди тоа. Ми рече имале уште две-три рати од кредитот, па ќе средат, но ништо од тоа – рече сведокот.

Таткото рече дека кога си дошол од Германија, каде што работел, му рекол на Александар дека тој ќе разговара со Деко и ќе се расправа.

– Ме замоли да не правам глупости и прифатив. Тогаш ми рече, Михајло толку многу се има искарано за тоа со татко му, дури и се иселил од дома. И тогаш подлегнав на неговата молба, но му дадов број од адвокат да се консултира тоа да го заврши без Деко. Рече се консултирал, да поминат празниците, ќе виделе што може, што не може – рече сведокот.

Прашан како реагирал Александар на тоа, сведокот рече дека бил многу нервозен тој период.

– Јас му вршев голем притисок, дури не сакаше да зборува за тоа и се нервираше многу, зошто беше свесен дека може да има големи давачки и долгови кон доверители и фирми. Тој период веќе и имаше одбивност да оди на работа – рече сведокот.

Прашан дали Александар имал проблеми со контроли и даночни пријави, сведокот рече дека немал такво нешто и дека никогаш не се пожалил за тоа.

Александар цело време работел во кафулето „Класик“ во Кочани. Никогаш не одел на работа во дискотеката „Пулс“.

Таткото рече дека Александар никогаш не бил сопственик иако во обвинението се воде како сопственик и управител.

Тој потврди дека синот спомнал дека се вршело реновирање во „Пулс“ во 2024 година.

– Тогаш бил повикан да помогне за некои физички активности во „Пулс“ за некои градежни работи, добил повреда и отишол на лекар – рече сведокот.

На прашање на бранителот на првообвинетиот Дејан Јованов-Деко дали Александар работел во фирма кај Деко или кај Михајло, сведокот рече дека Александар рекол дека работел кај Михајло и дека тој не знае кој е сопственик на фирмата.

Адвокатката Ивана Коцевска побара од судот да не го прифати исказот на сведокот зашто, како што рече, изнел целосно контрадикторни искази во однос на фактичките докази.

Адвокатот Јовица Страшевски реагира дека повикуваат сведоци и поставуваат прашања што се надвор од обвинението.

– Каков е односот меѓу сведокот и сега покојниот син, не придонесе со ништо кон овој кривично-правен настан. Барам да му укажете на Обвинителството дека со ваквиот начин само се одолжува постапката, а ништо не придонесуваме кон расчистување на обвинението – рече адвокатот Страшевски.

Вториот сведок за денешното рочиште, иако уредно повикан, не се појави во судница. Јавниот обвинител информира дека нема добиено известување дали отсуството е оправдано или не, на што судот реагира дека доколку сведокот не се појави на следното рочиште, ќе мора да издаде налог за спровод.

Судењето го води судијката Дијана Груевска-Илиевски и се наоѓа во фаза на доказна постапка и продолжува со сослушување сведоци на предлог на Обвинителството, кое го застапува тим од 15 јавни обвинители.

Пожарот во дискотеката „Пулс“ во Кочани избувна на 16 март 2025 година за време на настап на групата ДНК. Загинаа 63 лица, а над 200 беа повредени.

The post ГО СТАВИЛ ЗА УПРАВИТЕЛ ЗА ДА НЕ ЈА ИЗГУБИ ЛИЦЕНЦАТА ЗА „ПУЛС“ На лекар дознал дека нема соодветно здравствено осигурување appeared first on plusinfo.mk.

Министерството за надворешни работи и надворешна трговија, соопшти дека преку Амбасадата на Република Северна Македонија во Варшава, е во редовна комуникација со семејството на починатиот пациент Александар Карадакоски, како и со надлежните институции во Литванија.

„Од страна на Амбасадата се преземаат сите неопходни активности за завршување на конзуларните постапки и за организација на транспортот на телото на починатиот македонски државјанин назад во земјата. Министерството за надворешни работи и Амбасадата во Варшава стојат на располагање за комуникација и асистенција, и се во постојана и непосредна комуникација со надлежните органи на Литванија“, наведуваат од Министерството.

Воедно, се додава дека Кризниот штаб при Министерството е во редовна координација со сите надлежни институции, а јавноста ќе биде навремено информирана за сите понатамошни новини.

Карадакоски кој беше префрлен на лекување во Литванија, утрово им подлегнал на повредите здобиени од пожарот во Кочани. Тој имал 36 отсто изгореници на телото и оштетување од 90 проценти на дишните патишта.

Александар Карадакоски е 60-тата жртва од пожарот во дискотеката во Кочани што се случи рано изутрина на 16 март, годинава.

ПОЧИНА УПРАВИТЕЛОТ НА ДИСКОТЕКАТА „ПУЛС“ КОЈ СЕ ЛЕКУВАШЕ ВО ЛИТВАНИЈА Трагедијата во Кочани зеде уште една жртва

КАРАДАКОСКИ БИЛ ЕДЕН ОД НАЈКРИТИЧНИТЕ ПАЦИЕНТИ Имал изгореници на 40% од телото и бубрезите му откажале

ТРОЈЦА ПАЦИЕНТИ СЕ ВО ИСКЛУЧИТЕЛНО КРИТИЧНА СОСТОЈБА Кај Карадаковски биле изгорени 90% од дишните патишта

The post МНР ГО ПРЕЗЕМА ТРАНСПОРТОТ НА ПОЧИНАТИОТ МАКЕДОНСКИ ДРЖАВЈАНИН Министерството во комуникација со семејството Карадакоски appeared first on plusinfo.mk.

– Засега нема податоци како што имаме за покојниот Александар Карадаковски, кому му откажа функцијата на бубрезите, но известени сме дека пациентите се во многу критична состојба – посочи тој.

Во странство и натаму се лекуваат 69 пациенти, а во тек е враќањето на шестмина од нив – по двајца од Бугарија, Шпанија и од Унгарија – кои ќе останат под 24-часовно медицинско следење откако ќе пристигнат во земјава.

– Тие се во добра здравствена состојба, според информациите што ги добиваме. Генерално, состојбата кај поголемиот дел од повредените е стабилна. Очекуваме и други пациенти да се вратат во следните 3 до 4 дена – изјави Таравари.

Во моментов, 14 пациенти се лекуваат во болници во земјава, од кои 9 во Скопје. Петмина од нив ќе бидат испишани за домашно лекување. Вкупно 118 пациенти веќе се вратени дома и се во добра здравствена состојба.

Александар бил примен со тешки изгореници на главата, вратот и на горните екстремитети

Министерот Арбен Таравари и директорот на болницата „Св. Наум Охридски“, д-р Небојша Настов, изразија сочувство до семејството на Александар Карадаковски, кој им подлегна на повредите во Литванија, каде што беше испратен на лекување на 17 март, вториот ден по несреќата.

Двајцата дадоа детали за неговата хоспитализација во „Св. Наум Охридски“ и за понатамошното лекување во странство.

– Тој беше најтешко повредениот пациент за кого добивавме редовни информации. На 2 април му откажаа бубрезите, имаше покачена телесна температура и изгореници на околу 36% од телото, од втор и од трет степен. Тоа отвора сериозен ризик од инфекции – изјави министерот Арбен Таравари.

Детали за медицинската состојба на Александар даде и директорот на болницата „Св. Наум Охридски“, д-р Небојша Настов. Пациентот бил примен во болницата утрото веднаш по несреќата, каде што неговата состојба набрзо се влошила.

– Пациентот беше примен во болницата „Св. Наум Охридски“ во 6 часот наутро, веднаш по несреќата. Во текот на денот неговата состојба се влоши, а попладнето се јави потреба од интубација. Се продолжи со третман на изгорениците, кои беа сериозни, претежно во пределот на главата, вратот и на горните екстремитети. Стануваше збор за изгореници од втор и од трет степен, што укажува на силен интензитет на пламенот што го зафатил – посочи Настов.

Дишното стебло било сосема оштетено поради вдишаните чадови

Дополнително, поради вдишаните чадови, биле оштетени и внатрешните дишни органи на Карадаковски.

Бронхоскопското испитување покажало дека е зафатен голем дел од дишното стебло, што довело до понатамошно влошување на неговата состојба, а подоцна и до подлегнување на повредите.

– Еден ден по приемот, беше организиран транспорт со медицински санитетски авион и пациентот беше префрлен во Литванија, каде што продолжи лекувањето. Но, за жал, кај пациенти со ваков степен на повреди, исходот не секогаш е оној што сите го посакуваме – рече Настов.

Министерот Таравари посочи дека околу 90% од дишните патишта биле зафатени од изгореници.

Сите трошоци за транспорт и за обдукција се покриени од државата

Смртта е пријавена утрово, а обдукцијата (на Александар Карадаковски) ќе биде извршена во Институтот за Судска медицина во Скопје.

Министерот Таравари посочи дека сè е покриено и организирано околу транспортот и обдукцијата на телото на покојниот Александар.

The post ТРОЈЦА ПАЦИЕНТИ СЕ ВО ИСКЛУЧИТЕЛНО КРИТИЧНА СОСТОЈБА Кај Карадаковски биле изгорени 90% од дишните патишта appeared first on plusinfo.mk.

Во болницата во Литванија почина Александар Карадаковски, управител на дискотеката Пулс во Кочани. Тој е 60-та жртва во трагедијата по големиот пожар во дискотеката во Кочани.

Карадаковски, кој истовремено работел и како шанкер во диско-клубот, беше тешко повреден во пожарот. Тој и уште тројца пациенти беа пренесени на лекување во Литванија.

Карадаковски е 60-та жртва од трагедијата што силно ги погоди Кочани и цела Македонија.

Се очекува официјална потврда од надлежните.

The post ПОЧИНА УПРАВИТЕЛОТ НА ДИСКОТЕКАТА „ПУЛС“ КОЈ СЕ ЛЕКУВАШЕ ВО ЛИТВАНИЈА Трагедијата во Кочани зеде уште една жртва appeared first on plusinfo.mk.