Никој во оваа држава нема против користењето на албанскиот јазик, оваа влада нема да им дозволи на ДУИ да играат на ситен популизам на етнички теми, рече претседателот на Владата, Христијан Мицкоски на седницата за пратенички прашања, одговарајќи на прашање од пратеникот од ДУИ, Блерим Беџети.

Сите граѓани се ценат подеднакво, а не по етничка линија, ова е нова Македонија на проекти и на реформи, истакна премиерот.

– Никој нема против користењето на јазиците во Македонија кои ги употребуваат делови од народи на одредени територии или на целата територија, во случајов албанскиот јазик, ниту пак некој некогаш го спорел тоа. Ќе дадам пример, вчера на гости беше претседателот на Швајцарската Конфедерација и додека тој зборуваше и се обраќаше на англиски јазик, во позадина имаше превод на македонски и на албански јазик. Уставот вели дека единствен јазик во меѓународна употреба е само македонскиот, па не ни пречеше. Дури и моето обраќање беше преведено на албански јазик, па не ни пречеше и нема да ни пречи – рече Мицкоски.

Во врска со Законот за употребата на јазиците премиерот нагласи дека Венецијанската комисија во своето мислење дава препорака за членот 102, да се напушти примената на двојазичноста во правосудниот систем и да се вратиме на законското решение од 2008 година. Потенцира и дека Венецијанската комисија не дава мислење за уставноста на некој закон, туку дали тој е во согласност со меѓународното право.

– Дали е законот уставен кажува Уставниот суд. Овој состав на Уставниот суд го бираше вашето мнозинство, а ова мнозинство избра еден уставен судија. Ова парламентарно мнозинство се обидува да ги коригира недостатоците кои ги оставија СДСМ и ДУИ како влада. Така, со Законот за социјална заштита се дозволи вработените Албанци во детските градинки да го полагаат на албански јазик испитот кој треба да го полагаат за да бидат дел од тој предучилиштен образовен систем, тоа што вие не го направивте. Затоа нема да ви дозволиме да играте со ситни поенти на чувствата на граѓаните. Тие тоа го препознаа, а гласно ќе зборуваат на следните парламентарни избори. Затоа што оваа етноцентрична демагогија тие ја отфрлаат – рече премиерот Мицкоски.

Тој му порача на пратеникот Беџети дека ваквата етноцентрична политика им носи само негативни резултати и наместо за тоа, во државава треба да се зборува за политиките кои реално имаат влијание врз животите на луѓето.

– Дваесет години ништо не направивте пред сè, за Албанците. Но, и тие се свесни, сакаат убаво да живеат, да имаат поквалитетно здравство, пензии, плати, подобро образование, не им требаат овие теми. Нема да ви дозволи оваа влада евтино да играте со ниски страсти, ситни работи по чувствата на Албанците во Македонија. Луѓето во 21. век на Марс се качија, вие се обидувате со ситен популизам да мислите ќе добиете некакви поени, а губите, тоа време заврши. Ова е нова Македонија во која секој граѓанин допринесува и се труди за иднината на оваа земја подеднакво, не по етничка основа. Ова е поинаква Македонија во која сите сакаме да придонесеме со проект повеќе, политика повеќе и реформа повеќе – порача премиерот Мицкоски.

The post НЕМА ДА ВИ ДОЗВОЛИМЕ ЕВТИНО ДА ИГРАТЕ СО ЧУВСТВАТА НА АЛБАНЦИТЕ Никој не се противи на користењето на албанскиот јазик appeared first on plusinfo.mk.

Со својот глас и потпис, Талат Џафери и ДУИ го изоставија албанскиот јазик од правосудниот испит. Значи, не само што не го заштитија албанскиот јазик, туку свесно го исклучија, на штета на многу студенти Албанци, реагира Вреди преку соопштение.

„Документот од 27 август 2019 година, потпишан од Талат Џафери, ја разоткрива вистината. Проблемот со правосудниот испит и исклучувањето на албанскиот јазик носи чист политички печат.

Во време кога Законот за употреба на јазиците веќе беше на сила, Талат Џафери, како претседател на Собранието, не само што не побара усогласување на законот за правосудниот испит со одредбите што произлегуваат од тој закон, туку напротив даде зелено светло за законски текст во кој беше изостанат албанскиот јазик. Јавно прашуваме, кога синот на Талат Џафери го положи правосудниот испит, на кој јазик одговори?“, се наведува во соопштението од Вреди.

Според Вреди, ова е вистинското лице на ДУИ – јавно играат улога на патриот, додека во институциите потпишуваат против албанскиот интерес.

„20 години, тие имаа сè во свои раце, моќ, министри, позиции, мнозинство и влијание. Не им недостасуваше ниту сила ниту можност. Им недостасуваше само чесност и волја. Бидејќи за ДУИ, Албанецот вредеше само како глас, како бројка и како средство за одржување на нивната клика на власт“, се наведува во соопшението на Вреди од каде порачуваат дека ќе ја исправат и оваа неправда на Албанците.

The post А НА КОЈ ЈАЗИК СИНОТ НА ТАЛАТ ЏАФЕРИ ГО ПОЛОЖИ ПРАВОСУДНИОТ ИСПИТ? Вреди за лицемерието на ДУИ – 20 години беа на власт имаа сѐ освен волја appeared first on plusinfo.mk.

Претседателот на Уставниот суд, Дарко Костадиновски, во интервју за емисијата „Со факти“, емитувана на 08.04.2026 година на МРТ 1, упати јасна порака до јавноста во врска со Законот за употреба на јазиците за кој се води предмет во Судот, нагласувајќи дека неосновано се создаваат стравови и политички тензии околу ова прашање.

– Сакам да упатам еден апел бидејќи гледам премногу се манипулира со ова прашање. Никој нема да го чепне албанскиот јазик. Уставниот суд постои за да помогне во уставно-загарантираните права дали се јазични, дали се соодветна правична застапеност, да бидат заштитени а не да ги укине. Тие се уставна категорија така што не ги прифаќам никако тие квалификации дека некој сака да го укине, да ја намали употребата или да го загрози албанскиот јазик. Апсолутно се неточни – рече Костадиновски.

Тој потенцира дека одлуките на Судот ќе имаат за цел да ја олеснат практичната примена на правата.

– Нашите одлуки можат само да ја олеснат примената на албанскиот јазик така што нашите сограѓани Албанци да бидат спокојни, никој нема да го чепне албанскиот јазик – порача тој.

Костадиновски посочи дека мислењето на Венецијанската комисија не треба да се толкува селективно, бидејќи содржи и пофалби, но и забелешки.

– Прво Венецијанската комисија кажува за разлика од Законот од 2008 година. Овој закон од 2018 година значително ја проширува употребата на албанскиот јазик и Венецијанската комисија вели дека тоа е за пофалба, дури и се поздравува волјата на властите во Македонија за унапредување на јазикот на заедниците, и тоа навистина за пофалба, но Венецијанската комисија вели дека со одредени одредби во одредени области се оди предалеку – рече тој.

Во врска со поништувањето на измените за платите на судиите од страна на Уставниот суд, тој рече:

– Постојат бројни меѓународни стандарди како што е Европската повелба на судиите, како што е Венецијанската комисија… Сите тие укажуваат дека дури и во услови на криза, не може да се намалуваат платите на судиите. Зошто? Затоа што така се гарантира нивната независност и самостојност. Во околности во кои се наоѓа Македонија каде што недовербата во системот е на историски најниско ниво, вреди да се заштити независноста и самостојноста на судската власт, но и таа власт стварно треба да почне да испорачува резултати.

The post НИКОЈ НЕМА ДА ГО ЧЕПНЕ АЛБАНСКИОТ ЈАЗИК, НЕКА БИДАТ СПОКОЈНИ ГРАЃАНИТЕ Костадиновски вели дека премногу се манипулира со ова прашање appeared first on plusinfo.mk.

Демократски сојуз ги осудува, како што вели, политички мотивираните протести поради наводно ускратување на правото на употреба на мајчиниот јазик на студентите од албанската етничка заедница.

„Демократската унија за интеграција прави груба злоупотреба на правото на користење на мајчиниот јазик при полагањето правосуден испит, кое во текот на своето долгогодишно владеење не најде за сходно да го регулира. Но, имаше коруптивни процеси при полагањето и политичко влијание, посебно на студенти блиски до партиите од власта.

Демократски сојуз потсетува дека македонскиот јазик е државен – службен јазик во Македонија. Се разбира, албанскиот јазик е исто така во службена употреба и етничките Албанци ги уживаат сите права според Уставот за негово користење. ДС потсетува дека студентите, повеќето Албанци своите студии ги завршиле на мајчин албански јазик.

Но, во правосудството е од исклучителна важност, обвинителите, судиите и адвокатите, да го владеат македонскиот јазик кој е лингва франка, заеднички јазик на разбирање на сите етнички заедници во Македонија. Дополнително, меѓународната пракса и препораките од Венецијанската комисија одат во прилог на употреба на еден заеднички јазик во правосудството и тоа на никаков начин не ги нарушува правата на другите етнички заедници.

Демократски сојуз ја охрабрува Владата да не подлегнува на политички притисоци и да истрае во пронаоѓањето решение за полагање правосуден испит кое ќе биде уставно, а нема да ги нарушува правата на етничките заедници, но исто така со иста тежина на испитот како и за другите студенти“, се наведува во реакцијата на Демократскиот сојуз.

ДС истовремено потсетува дека на сите етнички заедници, вклучително и на Албанците, им е загарантирана одбраната на мајчин јазик во процесите пред судовите во Македонија.

„Јазикот е средство за разбирање, а никако за конфронтација. Без разлика на сѐ, во државната и локалната администрација мора да се знае македонскиот јазик, не нарушувајќи го правото на помалите етнички заедници да го негуваат и користат и својот мајчин јазик“, се додава во реакцијата на Демократски сојуз.

The post ДЕМОКРАТСКИ СОЈУЗ ГИ ОСУДИ ПОЛИТИЧКИ МОТИВИРАНИТЕ ПРОТЕСТИ НА СТУДЕНТИТЕ Препорака од Венецијанската комисија е употреба на еден заеднички јазик во правосудството appeared first on plusinfo.mk.

Во Скопје денеска се одржа студентски протестен марш на кој албанските студенти протестираа поради неспроведување на Законот за употреба на јазиците при полагањето на правосудниот испит.

Маршот започна од плоштадот „Карпошово востание“, продолжи преку Камениот мост и заврши пред Министерството за правда.

Студентите побараа оставка од министерот за правда, Игор Филков, инсистирајќи на почитување на законските одредби и обезбедување рамноправност.

– Нема држава без млади луѓе – порачаа демонстрантите, нагласувајќи дека нивната борба е за правда и еднакви права.

The post БАРААТ ДА ПОЛАГААТ ПРАВОСУДЕН ИСПИТ НА АЛБАНСКИ ЈАЗИК Протест на студенти во Скопје appeared first on plusinfo.mk.

По најавата за протестен марш утре пред Министерството правда, со кој, како што е најавено, учесниците ќе изразат незадоволство од неспроведување на Законот за употреба на јазиците во правосудниот испит, односно неможноста да го полагаат на албански јазик, премиерот Христијан Мицкоски ги повика „да не дозволат да бидат алатка во рацете на политичка партија, која сè уште живее во спомените, односно во минатиот век“.

На кандидатите што треба да го полагаат испитот тој им порача дека ќе биде најдено соодветно решение и за ова прашање.

– За жал, овој протест е силно поддржан од една опозициска политичка партија, која повеќе од 20 години не успеа да го реши ова прашање и сега е лицемерно на овој начин да комуницира со јавноста – рече Мицкоски одговарајќи на новинарски прашања на прес-конференција посветена на новите мерки за намалување на цените на горивата.

Тој додаде дека претходната влада го донесе Законот за јазиците, кој, рече, е „предизвикан пред Уставниот суд и е предизвикан токму оној дел што се однесува на правосудството“.

– Знаете дека за тој закон имаме негативно мислење од Венециската комисија, која вели дека треба да се напушти двојазичноста во правосудството бидејќи има предизвици што најчесто се поврзани со владеењето на правото. Имајќи го сето ова предвид, ние како Влада формиравме група од уставни експерти, кои работат на решение кое ќе биде и уставно, но исто така и во согласност со меѓународните стандарди. Така што, јас ги уверувам студентите дека онака како што се најдоа решенија за многу предизвици и за многу пропусти од минатото, така и за ова ќе се изнајде соодветно решение. Јас мислам дека тие тоа веќе го знаат и мојот апел е да не дозволат да бидат алатка во рацете на политичка партија, која сè уште живее во спомените, односно во минатиот век – рече Мицкоски. 

The post НЕ ДОЗВОЛУВАЈТЕ ДА БИДЕТЕ АЛАТКА НА ПАРТИЈА КОЈА ЖИВЕЕ ВО СПОМЕНИ Мицкоски вети дека и без протест ќе се реши проблемот со правосудниот испит appeared first on plusinfo.mk.

Борбата за рамноправен статус на албанскиот јазик во образовниот процес, а потоа и за промоција на јазикот на втората по големина етничка заедница во Макдонија во втор службен јазик, траеше околу три децении.

Новинарот којшто непристојно ја опомена министерката за образование Весна Јаневска да не доаѓа во Тетово без да си носи преведувач, веројатно не се сеќава на почетоците на таа борба, која имаше поддршка од дел од македонската политичка и интелектуална елита. Природно, момчето не може да се сеќава, бидејќи или бил премлад или тогаш воопшто не бил ни роден.

Ќе раскажам само еден детал, за да се потсетиме на жестината на политичката дебата во тоа време. Најмаркантна иницијатива од тој период (1997 година) беше барањето за формирање педагошка академија на албански јазик. Идејата беше една таква институција да образува наставници кои ќе предаваат на албански јазик во основните и во средните училишта, за да се подобри драстично опаднатиот квалитет на наставата во средините со доминантно албанско население.

Јас лично и весникот „Дневник“ под мое уредништвото, ја поддржавме таа иницијатива и жестоко ги осудивме демонстрациите против педагошката академија на албански јазик, што се организираа пред парламентот. За возврат, демонстрантите јавно палеа примероци на нашиот весник – ни пред тој тажен момент за македонската демократија, а ни потоа, такво нешто се нема случено.

Многу години подоцна, после многу кавги и недоразбирања, јазичниот конфликт заврши со модел на двојазичност кој претставува апсолутно највисок дострел во Европа. Денес албанскиот јазик и формално и суштински е втор службен јазик во Македонија, целосно рамноправен со македонскиот. Погледнете ги натписите и таблите во Скопје, погледнете ги своите лични карти и другите лични документи, па самите ќе се уверите во тоа. Не мора да го читате и да го толкувате Уставот.

Разбирам дека има луѓе на кои не им се допаѓа тоа што Македонија е феномен што јас некогаш го нарекував „билингвална федерација“, но еднаш стекнатите основни човекови права и политичките права на малцинските заедници, стануваат трајни и непроменливи. Јас, инаку, во сите овие три децении, ја застапував идејата дека тој процес не само што нема да ги загрози, туку ќе ги унапреди односите меѓу Македонците и Албанците.

Се разбира, предуслов да се исполнат тие мои очекувања е сите да научиме и да разбереме што точно значи кога велиме дека двата јазика се во рамноправна службена употреба.

На пример, тоа значи дека секој политичар Албанец, во сите политички институции и секогаш кога е во службено својство каде било на територијата на Македонија, може официјално да говори на својот мајчин јазик. Повеќе политичари Албанци, во разни прилики, па и на прес-конференции, го користеле тоа право и зборувале само на албански јазик. Имало такви ситуации кога новинарите Македонци се бунеле, барале превод, па дури и се договарале да не известиваат од тие настани. Како уредник, никогаш не сум ги поддржувал тие „побуни“.

Но, она што важи за секој политичар Албанец, важи и за секој политичар Македонец. Министерката Весна Јаневска има право да говори на македонски јазик и во Тетово и каде што сака и никој нема право да ѝ наложи да зборува на албански јазик, или да си носи преведувач.

Ова треба да е совршено јасно секому – двојазичноста на службено ниво не подразбира ни законска ни политичка обврска службените лица да ги познаваат двата јазика и да ги говорат зависно од тоа каде и кому се обраќаат.

Од тука натаму, дебатата за проблемите на двојазичноста мора да се води само на ниво на практичност. Што сакам да кажам со тоа? Јас ја разбирам потребата на колегите новинари од тетовските медиуми на албански јазик да добијат директна изјава од Јаневска на јазикот што најдобро го разбира нивната публика. Како да се реши тој проблем?

Убаво вели Џевдет Хајредини: освен Али Амети, ниеден друг Албанец нема можност да плати преведувач, за да може, како што може Ахмети, со Македонците и со другите граѓани на Македонија, службено или приватно, секогаш и секаде, да комуницира само на албански јазик. Ама истото важи и за сите политичари Македонци.

А решение, сепак, има. Благодарејќи на вештачката интелигенција, денес се широко достапни дузина апликации за квалитетен симултан превод од еден на друг јазик. Им препорачувам на колегите новинари од Тетово да си инсталираат такви апликации на своите смартфони и ќе можат самите симултано да преведат говор од било кој јазик на албански.

Како прилог кон процесот на дигитализација и како час по медиумска писменост, би ја охрабрил министерката Јаневска исто така да инсталира таква апликација и на првата следна прес-конференција самата да побара прашање на албански јазик и да „одговори“ на тој јазик.

Како и да е, со развојот на вештачката интелигенција, проблемот е решлив и на практично ниво. Секој може да си носи „преведувач“ во својот смартфон. Веројатно ќе изгледа малку смешно, па дури и глупаво, така да си преведуваме овде во Македонија, но ако некој инсистира на таа „кауза“, наместо да провоцира и да бара проблем таму каде што нема – ете му решение.

Останува уште еден аспект на прашањето на двојазичноста, за кој, се надевам, ќе дебатираме во иднина. Културолошкиот аспект. Македонскиот и албанскиот се убави јазици, а толку различни што претставува вистински предизвик да се изучуваат и од љубопитство, не само од потреба. Јас тоа го знам за албанскиот јазик, бидејќи многу одамна го учев, за жал многу кусо време. Се надевам дека многу брзо ќе дојде време кога ќе се создадат можности за факултативно изучување на албанскиот јазик во некои училишта, на курсеви за професионалци од разни области и слично.

The post Не правете проблем таму каде што нема – кому му треба преведувач, нека си го носи во смартфонот! appeared first on plusinfo.mk.

Премиерот Христијан Мицкоски е подготвен да се донесат измени на Законот за употребата на јазиците, за да се овозможи албанските граѓани да го полагаат правосудниот испит на албански јазик.

На новинарско прашање во врска со тоа како ќе се надминат несогласувањата, со оглед дека министерот за правда Игор Филков е против ова барање што го изнесе вицепремиерот Беким Сали, премиерот рече дека мора да се знае суштината, за да се дојде до решението.

– Уставот е јасен и прецизен и вели дека офцијален јазик на целата територија на Македонија и во меѓународна употреба е македонскиот јазик, но, исто така, официјален јазик е и албанскиот, односно јазикот на заедницата која е поголема од 20 отсто . Тоа е амандманот 5, кој го заменува членот 7 од Уставот и таму многу јасно стои дека комуникацијата во институциите на државната управа може да се одвива и на јазикот на заедницата која е повеќе од 20 отсто, откако тоа ќе биде утврдено со закон. Ние мораме овој процес на полагање најпрво да го утврдиме со закон. Законот, ваков каков што е, не дозволува таков тип на полагање – рече Мицкоски.

Јас сум подготвен, додаде, тоа да го регулираме со закон и тоа не само за албанскиот јазик, туку и за јазиците на сите делови од народи коишто се споменати во Преамбулата.

– Зошто? Затоа што Уставот, исто така, вели дека во единиците на локалната самоуправа каде има националност која е над 20 отсто од вкупниот број на населението, комуникацијата со подрачните единици на министерствата се одвива на нивниот мајчин јазик. Да речеме, во Центар Жупа мнозинство е турската заедница, во Шуто Оризари мнозинство е ромската… – потенцира премиерот.

Потребни ни е правници, кои ќе имаат квалитет, рече Мицкоски.

– Сега, ние да се зачауруваме со некакви национал-романтични тези, а да се повикуваме на Устав и на закон и не го објаснуваме тоа како е, ниту едната, ниту другата страна, тоа е политиканство. Нема врска ниту со Уставот, ниту со законите, ниту со политиката. Тоа е класично политиканство. Ако сакате тоа да се случи, потребен е закон. Јас сум подготвен да се направи закон, тој да се прати во Венецијанската комисија и таа да даде мислење. Факт е дека кога е направен Законот за употребата на јазиците тој доби негативно мислење од Венецијанската комисија за делот на правосудството. Треба да се имаат в предвид сите факти. Еве, од моја страна има политичка волја да се седне и ова да се регулира. Јас утре ќе ги поканам на разговор оние кои ја изнеса оваа тема во јавноста, да поразговараме за сите овие факти, за да дојдеме до решение. Целта на оваа Влада е да се развива Македонија и граѓаните да живеат подобро, да одиме напред и еден ден да влеземе во ЕУ. Теми од пред 30-40 години не ни се потребни. Затоа велам тоа е политиканство – рече Мицкоски.

На прашање дали преписките меѓу министрите Беким Сали и Игор Филков ќе направат раздор во владината коалиција, Мицкоски одговори негатовно.

– Дебатата е добра, здрава и очекувам денеска таа дебата да престане – рече Мицоски.

The post СО ЗАКОНСКИ ИЗМЕНИ ЌЕ СЕ ОВОЗМОЖИ ПРАВОСУДНИОТ ИСПИТ ДА СЕ ПОЛАГА НА АЛБАНСКИ ЈАЗИК Мицкоски рече дека има политичка волја да се регулира ова прашање appeared first on plusinfo.mk.

Уставот мора да се почитува и не смее да биде предмет на дневнополитички интерпретации, а државата не функционира по принцип на лична проценка, професионален рефлекс или политички впечаток.

Ова е дел од одговорот на министерот за правда Игор Филков на изјавата на вицепремиерот Беким Сали во врска со петиција на студенти за полагање на правосуден испит на албански јазик.

Во продолжение следи целата реакција на министерот.

„Почитуван вицепремиер , Беким Сали

Времето кога Уставот и законите се толкуваа според дневнополитички потреби, а не според нивната содржина, заврши со заминувањето на СДСМ–ДУИ од власт.

Оваа Влада нема намера да ја продолжи праксата на правен релативизам, институционален хаос и селективна примена на нормите. Напротив, обврзани сме да воспоставиме јасни правила, правна сигурност и целосно почитување на уставниот поредок.

Токму затоа, во врска со изјавите на вицепремиерот Беким Сали за полагањето на правосудниот испит на албански јазик, чувствувам обврска јавно, јасно и недвосмислено да реагирам, во интерес на Уставот, правниот поредок и институционалната сериозност на државата.

Првенствено, Уставот мора да се почитува и не смее да биде предмет на слободни и дневнополитички интерпретации.

Токму тоа го потенцирав и на последната средба за Реформската агенда.

Но, почитувањето на Уставот подразбира цело, системско и доследно читање на уставните и законските одредби, а не нивно селективно вадење од контекст за краткорочни политички пораки.

Го разбирам вицепремиерот Беким Сали како стоматолог, и како политичар кој допрва ја запознава материјата на европските интеграции и правосудните реформи.

Но, потенцирам, државата не функционира по принцип на лична проценка, професионален рефлекс или политички впечаток. Одлуките не се носат по чувство, туку по Устав и закон. Во правниот систем не постои категорија „има или нема волја”. Постојат уставни норми, законски решенија и институционални процедури.

Сè друго е опасна поедноставеност што ја поткопува правната држава и ја враќа праксата на произволност, од која за жал, Македонија скапо плати во минатото.

Имено, Министерството за правда ја разгледа петицијата поднесена од студентите во врска со полагањето на правосудниот испит на албански јазик, при што внимателно се анализирани сите релевантни уставни и законски одредби.

Законот за употреба на јазиците овозможува употреба на албанскиот јазик како службен јазик во постапките пред институциите, но неговата примена не може да се разгледува изолирано од другите системски закони што го уредуваат функционирањето на правосудството. Правосудниот испит претставува клучен предуслов за влез во судството, јавното обвинителство, адвокатурата, нотаријатот и извршувањето, при што сите овие закони експлицитно предвидуваат услов за активно познавање на македонскиот јазик.

Полагањето на правосудниот испит на македонски јазик е во директна функција на проверка на таа јазична и стручна подготвеност, имајќи предвид дека сите постапки, одлуки и службени акти во правосудниот систем примарно се водат и донесуваат на македонски јазик и кирилско писмо, согласно Уставот и законите.

Согласно член 7 од Уставот на Република Северна Македонија (Амандман VI), на целата територија на Републиката и во нејзините меѓународни односи службен јазик е македонскиот јазик и неговото кирилско писмо. Уставната одредба јасно утврдува и дека употребата на друг службен јазик е дозволена под услови и на начин утврден со Устав и закон, без притоа да се дерогира уставната позиција на македонскиот јазик како примарен службен јазик. Дополнително, Законот за правосудниот испит не содржи одредби за полагање на правосудниот испит на друг јазик освен македонскиот јазик.

Согласно член 1 став (1) од Законот за употреба на јазиците (,,Службен весник на Република Северна Македонија” бр.7/19), на целата територија во Република Северна Македонија и во нејзините меѓународни односи службен јазик е македонскиот јазик и неговото кирилско писмо.

Според став (2) од истиот член, друг јазик што го зборуваат најмалку 20% од граѓаните (албански јазик), исто така, е службен јазик и неговото писмо, согласно овој закон.

Според ставот (2) од истиот член, во согласност со правото на граѓаните да употребуваат било кој од наведените службени јазици од членот 1 став (1) и (2) од овој закон во судските, управните, извршните постапки, предистражните и истражните постапки, кривични и прекршочни постапки, парнични и вонпарнични постапки, постапка за извршување на санкции, како и другите постапки предвидени со други закони. Судовите, јавните обвинителства, како и сите други органи, тела и други институции се обврзани да овозможат користење, употреба и примена на било кој од службените јазици од членот 1 став (1) и (2) и нивните писма во тие и други постапки.

За Законот за употреба на јазиците се произнесе и Венецијанската комисија, а во момнетов до Уставниот суд се поднесени 13 иницијативи за оценување на уставноста и законитоста. Имено, според Венецијанската комисија Законот содржи повеќе нејаснотии во однос на неговото значење и опсег. Не е секогаш јасно кои одредби од Законот се однесуваат само на албанскиот јазик, кои се однесуваат и на други јазици на заедниците (турски, српски, босански, влашки, ромски итн.), и кои правни субјекти се опфатени со Законот. Оваа текстуална нејаснотија дополнително ќе ја отежни примената на Законот. Затоа, Комисијата го повикува законодавецот повторно да го разгледа Законот за јазиците и, при тоа, да ги земе предвид, во консултација со сите засегнати страни, особено следните препораки:-да се напуштат одредбите од Законот што се однесуваат на двојазичноста во судските постапки и да се преземат неопходните мерки за да се обезбеди ефективна примена на јазичните барања од Законот за јазици од 2008 година во судските постапки.

Затоа, тезата дека Министерството за правда „нема аргументи” е неточна и политички мотивирана. Аргументите се јасни, уставни и законски. Она што недостасува во изјавите на вицепремиерот е почит кон правниот систем како целина.

На крај, дозволете ми, да упатам порака до г-динот Сали.

Почитуван колега,

Уставот не е тема за телевизиски емисии, ниту алатка за политички наративи, а правосудството не смее да биде заложник на ничија агенда.

Оваа Влада има за цел да воспостави ред по години институционален распад, да спроведе реформи, а не да произведува конфликти. Кој сака политика, нека ја води на избори, но кој носи функција во правната држава, мора да ги почитува Уставот и законите.

Сè друго е притисок. И тоа нема да помине“,

The post УСТАВОТ НЕ СЕ ТОЛКУВА ПО ЛИЧНА ПРОЦЕНКА ИЛИ ВПЕЧАТОК Филков му одговори на Сали за иницијативата за правосудниот испит appeared first on plusinfo.mk.

Немало такви разговори- рече Мицкоски.

Прашан да ја коментира изјавата на неговиот коалициски партнер од Вреди, министерот за здравство Арбен Таравари, Мицкоски кажа дека не се спротиставувал на изградбата на Коридорот 8, но дека бил против Преспанскиот договор.

-Мислам дека не е тоа така кажано, како што вие го цитирате. Не сум бил против Коридорот 8, да сум бил против Преспанскиот договор и да точно е откако на насилен пат се носеа пратеници да гласаат за уставните измени и откако сето тоа стана реалност, уште во опозиција пред 4-5 години реков не можеме да ја игнорираме реалноста. Никогаш не сум бил против Коридорот 8, тоа што вие го цитирате не беше така кажано од господинот Таравари, но во ред, повторно ќе кажам, во духот на растурање пердувите ќе се обидеме да ги фатиме и јас категорично ве демантирам дека така беше кажано. Кога станува збор за уставните измени, можеме да зборуваме за нив, но истовремено може да зборуваме за други работи кои ние ги бараме и кои што се дел од изборната програма на ВМРО-ДПМНЕ зад кои застана повеќе од половина милион граѓани. Јас немам намера ниту милиметар да се поместам од тоа што сум го кажувал, го кажувам сега и ќе го кажувам во иднина. Барам решение, достоинствено решение. Имаме достоинствено решение, а тоа се уставни измени со одложено дејство, повелете да разговараме – рече Мицкоски.

The post НЕМА ТАКВИ РАЗГОВОРИ Мицкоски го демантира Таравари дека албанскиот јазик ќе стане службен јазик appeared first on plusinfo.mk.