Акцискиот план за малцинства е готов, усогласен со експерт од Европската комисија, како ниту една држава што го има направено и неофицијално е усогласен со дваесет и шест земји-членки, освен со една, изјави денеска премиерот Христијан Мицкоски, одговарајќи на новинарски прашања по посетата на Институтот за јавно здравје во Скопје.

Прашан до каде е Владата со Акцискиот план за малцинства и што конкретно има како барање таа една земја, Мицкоски рече дека „кога би знаел, ќе ви дадев одговор“.

-Акцискиот план за малцинства е готов, усогласен со експерт кој што го добивме од страна на Европската комисија. Експерт за човекови права, имаше две јавни расправи, како ниту една држава што го има направено и неофицијално ова го кажувам е усогласен со дваесет и шест земји членки, освен со една. Исто како што таа една е против да бидеме и дел од иницијативата Трите мориња. Тоа е што е – изјави Мицкоски.

Предлог-акцискиот план за заштита и унапредување на правата за припадниците на заедниците, кој е изработен на македонски и англиски јазик од домашни и меѓународни експерти, во блиска консултација со Совет на Европа и Европската комисија е документ којшто содржи јасно дефинирани мерки, рокови и надлежни институции и е целосно усогласен со највисоките европски стандарди. Наместо да биде поздравен како конструктивен чекор напред, документот од јануари годинава е предмет на апстрактни и неосновани коментари од страна на Бугарија.

Премиерот Мицкоски, уште во јануари годинава изјави дека се случило тоа за што ги предупредил партнерите во Брисел – „дека и најдобриот Акциски план за малцинствата да го направиме, тој ќе биде одбиен од Бугарија“. -Жалам што уште еднаш ја испуштија шансата дека се добри соседи. Ниту една земја членка нема против, ниту едно малцинство во Македонија нема против, бидејќи имаше јавна дебата. Е, проблем било што бил на македонски јазик, рече Мицкоски.

Мицкоски на крајот на минатиот месец, по средбата со хрватскиот премиер Андреј Пленковиќ во Скопје, изјави дека сме спремни да го испорачаме Акцискиот план за малцинства, што го работевме заедно со Брисел и експерти препорачани од ЕК, но нагласи дека „ако билатералните прашања се тие кои треба да го судат нашиот европски пат тогаш ние ќе се бориме на друг начин“. -Нашата стратегија е да ги завршиме реформите дома бидејќи тие ни требаат нас. Втора работа која што исто така сме спремни да ја испорачаме тоа е Акцискиот план за малцинства што го работевме заедно со Брисел и експерти препорачани од ЕК. Тој е готов и чекаме зелен сигнал од Брисел да помине на Владина седница. Ние испорачуваме тоа што зборуваме, рече Мицкоски.

Бугарскиот премиер Румен Радев, во изјава за медиумите пред Самитот ЕУ – Западен Балкан во Тиват, рече дека постојат два можни пристапа за забрзување на членството на земјите од Западен Балкан во Европската Унија, но дека Софија се залага за процес заснован на реални заслуги и спроведени реформи. – Нашата позиција е дека не треба да пренесуваме наследени политички и историски проблеми во Европската Унија и ќе продолжиме цврсто да ја браниме таа позиција – рече бугарскиот премиер, нагласувајќи дека проширувањето подразбира длабоки реформи во правосудството, владеењето на правото, заштитата на човековите права и развојот на добрососедските односи.

The post АКЦИСКИОТ ПЛАН ЗА МАЛЦИНСТВА Е ГОТОВ Усогласен е со 26 земји-членки на ЕУ, освен со една appeared first on plusinfo.mk.

Жалам што уште еднаш ја пропуштија шансата да покажат дека се добри соседи, изјави денеска премиерот Христијан Мицкоски, коментирајќи го оспорувањето на Акцискиот план за малцинствата од страна на Бугарија, со образложение дека документот бил подготвен на македонски јазик.

Во изјава за медиумите, претседателот на Владата посочи дека се случило токму она за што претходно ги предупредил партнерите во Брисел, дека и најдобриот Акциски план за малцинствата да го направиме, тој ќе биде одбиен од Бугарија.

– Ниту една земја членка нема забелешка, ниту едно малцинство во Македонија не се спротивстави, бидејќи имаше јавна дебата. Но, проблем било тоа што документот бил на македонски јазик. Простете, но мојот мајчин јазик е македонски, официјален јазик за меѓународна употреба е македонскиот и нема друг. Ако некому тоа му пречи, јас тука не можам да помогнам и жалам што е така – изјави Мицкоски.

Одговарајќи на новинарски прашања при посетата на Сопиште, премиерот нагласи дека сè било направено согласно барањата, прифатени биле сугестиите на експерт од Италија при изработката на Планот, а било исполнето и барањето од Брисел документот „ден однапред да се достави до Бугарија, како гест на добра волја“.

– Така и направивме, го испративме ден однапред. Но, им пречело што е на македонски јазик. Тој е официјален јазик според Уставот и ниту јас, ниту министерот можеме да го кршиме Уставот. Ако некој очекува документот да биде испратен на друг јазик, ние таков јазик немаме согласно Уставот, тоа е македонскиот јазик – рече Мицкоски.

Според него, ваквите реакции уште еднаш покажуваат дека прашањето не е поврзано со малцинствата или со Бугарите во Уставот.

– Имаат многу подлабоки корења нивните барања и подлабоки се проблемите. Уште еднаш се покажува дека нивната намера е сосема поинаква – истакна премиерот.

Мицкоски додаде дека Владата во моментов нема активни контакти со Бугарија, но дека стои на располагање за разговори во секое време и на кое било место.

– Стоиме на располагање, било кога и било каде, во која било организација, да ги претставиме нашите аргументи. Сè ќе прифатиме, нормално – освен внесување во Устав. Сите забелешки ќе ги разгледаме, но не можам да се откажам од мојот мајчин македонски јазик – нагласи Мицкоски.

The post БУГАРИЈА ГО ОДБИ АКЦИСКИОТ ПЛАН На Софија ѝ пречел македонскиот јазик, открива Мицкоски appeared first on plusinfo.mk.