Министерството за јавна администрација ја започна оперативната фаза за воспоставување на Академијата за обука и стручно усовршување на јавните службеници. На денешната работна сесија за операционализација на Академијата говореше министерот за јавна администрација Горан Минчев.

– Академијата не е само институционална новина. Таа е инвестиција во квалитетот, интегритетот и ефикасноста на јавната администрација, а со тоа и во довербата на граѓаните во институциите – рече министерот Минчев, на првата работна сесија со тимот кој ќе биде дел од Академијата за обука и стручно усовршување на јавните службеници, која треба да започне со работа на полетокот од 2027 година.

– Во изминатиот период беа поставени основите за формирање на Академијата, беше спроведена анализа на постојната состојба и потребите, а во наредниот период следува дефинирањето на организацискиот модел, клучните функции и оперативната поставеност на новата организациска единица во рамките на Министерството за јавна администрација – рече Минчев.

Во рамките на дводневната работна сесија тимот ќе работи на подготовка на клучните документи за воспоставување на Академијата, како и на преточување на стратешката рамка и четирифазниот патоказ на реформата во конкретен, реалистичен и временски дефиниран акциски план. Овие документи ќе ја постават основата за започнување на оперативната фаза и функционирањето на Академијата во состав на Министерството за јавна администрација.

– Работата во овие два дена бара од секого од нас конкретност и посветеност. Не бараме уште еден документ на хартија, бараме јасен, реалистичен и спроведлив акциски план, со прецизно распределени одговорности, идентификувани ризици и временска рамка на која можеме да се потпреме. Тоа е она што ќе го означи вистинскиот почеток на оперативната фаза на Академијата – истакна министерот Минчев.

Работната сесија се реализира во соработка со Регионалното училиште за јавна администрација – РеСПА. Преку менторската поддршка, регионалната експертиза и споделените искуства и практики од земјите во регионот, Министерството за јавна администрација добива значајна поддршка во процесот на градење на одржлив и функционален институционален модел на Академијата.

Воспоставувањето на Академијата претставува важен чекор во создавањето современа, професионална и ефикасна јавна администрација, во која континуираното учење, развојот на компетенции и стручното усовршување ќе бидат составен дел од професионалниот развој на јавните службеници.

The post СЕ ПОСТАВУВААТ ОСНОВИТЕ ЗА ИДНАТА АКАДЕМИЈА ЗА ЈАВНА АДМИНИСТРАЦИЈА Треба да почне со работа во 2027 година appeared first on plusinfo.mk.

Модернизацијата, професионализацијата и дигиталната трансформација на јавната администрација, како и зајакнувањето на довербата кај граѓаните, беа во фокусот на денешното одбележување на Денот на јавната администрација, што го организираше Министерството за јавна администрација под мотото „Доверба, интегритет и резултати: темели на модерна и европска јавна администрација“ во Филхармонија.

На настанот беше истакната улогата на јавната администрација како клучен столб во процесот на европска интеграција и во обезбедувањето квалитетни услуги за граѓаните и бизнис-заедницата, при што акцент беше ставен на реформите, дигитализацијата и градењето професионален и ефикасен систем.

Министерот за јавна администрација Горан Минчев во обраќањето нагласи дека денот е посветен пред сè на административните службеници и нивната улога во функционирањето на државата.

–  Го одбележуваме Денот на јавната администрација под мотото „Доверба, интегритет и резултати“. Три вредности кои не се само тема на денешниот настан, туку суштина на реформите што ги спроведуваме и визијата што ја имаме за иднината на нашата држава. Но пред сè, ова е ден кога ѝ даваме признание на луѓето кои секојдневно, посветено и одговорно обезбедуваат државата да функционира – рече Минчев.

Тој посочи дека реформите веќе даваат резултати и дека јавната администрација се развива во правец на модерност и ефикасност.

– Денес, една година подоцна, повторно сме заедно. Но денес не зборуваме само за визија. Денес можеме да зборуваме и за резултати. И можеби најважно од сè, денес сè појасно ја потврдуваме нашата определба дека реформата на јавната администрација не е само реформска обврска на нашиот пат кон Европската Унија, туку инвестиција во институциите, во луѓето и во иднината на Р. Македонија. Од јавна администрација, која со години се соочуваше со предизвици, недоволна мотивација и наталожени проблеми, полека, но сигурно, градиме модерна, ефикасна и стручна јавна администрација – истакна Минчев.

Министерот се осврна и на законските реформи и на воспоставувањето системи за професионален развој, нагласувајќи дека клучен фокус се човечките ресурси и континуираното усовршување.

– Во тој контекст беше заокружен најзначајниот пакет на законски реформи во областа на управувањето со човечките ресурси во јавниот сектор во последните години. Со донесувањето на Законот за административни службеници, Законот за вработување во јавниот сектор и Законот за стручно усовршување и обука на административните службеници, создадовме цврста основа за професионална администрација, заснована на компетенции, знаење и заслуги. Истовремено, свесни сме дека современата администрација не се гради само преку прописи, туку пред сè преку луѓето, затоа започнавме процес на воспоставување на Академијата за јавна администрација – нагласи Минчев.

Тој додаде дека паралелно се работи и на дигитализација, унапредување на обуките и создавање култура на квалитет, што треба да резултира со поефикасни услуги и зголемена доверба на граѓаните во институциите.

Премиерот Христијан Мицкоски во своето обраќање порача дека Владата останува цврсто посветена на модернизација и реформи, нагласувајќи ја улогата на администрацијата како столб на државата и потребата таа да стане сервис на граѓаните. Тој укажа и на потребата од надминување на долгогодишните системски слабости и изградба на ефикасни и достапни институции. Притоа посочи дека реформите во јавната администрација се неопходни за економски развој и зајакнување на довербата, нагласувајќи дека тие не зависат само од законите, туку и од луѓето и нивната посветеност.

– Реформите во јавната администрација не се прашање на политички избор. Тие се прашање на неопходност. Не можеме да зборуваме за модерна економија ако имаме застарени административни процедури. Не можеме да зборуваме за конкурентна држава ако инвеститорите се соочуваат со административни бариери. Не можеме да зборуваме за доверба во институциите ако граѓаните чувствуваат дека системот не ги следи нивните потреби. Затоа Владата останува цврсто посветена на процесот на модернизација на јавната администрација, на дигитализација на услугите, на намалување на бирократските процедури и на создавање институции кои ќе бидат поблиску до граѓаните отколку кога било досега – порача Мицкоски.

Шефот за соработка во Делегацијата на Европската унија, Штефан Худолин, истакна дека реформата на јавната администрација е долгорочен и континуиран процес, кој никогаш не завршува и кој е неопходен за ефикасно функционирање на институциите.

Тој нагласи дека Северна Македонија останува умерено подготвена во реформите, со одреден напредок особено во дигитализацијата, но со потреба од подлабоки структурни промени и имплементација на законите.

Худолин подвлече дека клучно е фокусот да биде ставен на квалитетот на услугите за граѓаните, а не само на формалните реформи, додавајќи дека Европската унија ќе продолжи да ја поддржува земјата преку експертиза, програми и финансиска помош.

– Во нашиот последен извештај наведовме дека Северна Македонија останува умерено подготвена во реформата на јавната администрација, при што гледаме одреден напредок, особено на дигитален план. Сепак, целокупните реформи во јавната служба и регулативата сè уште остануваат фрагментирани. Овие препораки бараат подлабоки реформи и дополнителни напори, не само донесување закони, туку пред сè нивна имплементација. Суштината е што добиваат граѓаните – ефикасни услуги. Ќе продолжиме да бидеме партнер, бидејќи ова е долг процес кој не се гради преку ноќ и кој никогаш не завршува – истакна Худолин.

На настанот беа доделени и признанија за управување со квалитет во јавниот сектор, при што првото место го освои Министерството за дигитална трансформација, како институција со највисоко рангирање според Индексот на квалитет за 2025 година, второто место ѝ припадна на Агенцијата за храна и ветеринарство, додека, третото место го доби Институтот за акредитација.

The post ОД ШАЛТЕРСКА ДО ЕВРОПСКА АДМИНИСТРАЦИЈА Денес зборуваме за резултати, вели Минчев appeared first on plusinfo.mk.

– За лоцираните проблеми во секоја институција, во секој орган или министерство каде велиме дека има недостаток на квалитет и на знаење, би оделе со варијанта на преедукација, односно на распоредување на административците на работни места каде ќе ги исполнуваат своите работни задачи, врз основа на својот афинитет, образование и квалитет. Со тоа ќе имаме конкретни и квалитетни услуги кај граѓаните – рече Минчев.

Тој додаде дека законските решенија ќе се предложат во најбрз рок до Владата и до Собранието.

– Јас сум повеќе за варијантата некомпетентните административци да бидат преедуцирани. Постојат и други решенија, а јавната администрација може да се намалува и по природен пат, врз основа на пензионирање или заминување од тоа работно место. Тоа е предмет на дебата и можеби во иднина ќе се дојде до такви реформски решенија – рече министерот.

Тој денеска учествуваше на состанокот на Секторската работна група за реформа на јавната администрација во Владата, на кој се разгледувале забелешките од последниот извештај на Европската комисија за напредокот на македонија.

– Според последниот извештај, постигнувањето на реформата на јавната администрација се движи со умерен напредок. Токму реформата има клучна улога во обезбедувањето на ефикасност, транспарентност и одговорност во работата на државните институции. Тоа пак, е есенцијално за евроинтегративните процеси на секоја земја – рече Минчев на прес-конференцијата во Владата.

Тој нагласи дека Извештајот нотира дека имаме добро воспоставена стратешка рамка за реформа на јавната администрација. Но, треба да почне процесот за остварување на визијата за деполитизирана, ефикасна и отчетна јавна администрација што обезбедува квалитетни и лесно достапни услуги за граѓаните и за бизнис заедницата.

– Само реформирана јавна администрација придонесува кон одржлив економски раст, владеење на правото, социјална кохезија и благосостојба. Проактивно пристапивме кон мерките и активностите со утврдените рокови во акцискиот план од Стратегијата за реформа на јавната администрација 2023-2030 година. Ќе останеме посветени Стратегијата да не остане само на хартија, туку да имаме ефикасна и целосна имплементација. Целта е да создадеме инклузивна и транспарентна администрација што е насочена исклучиво кон потребите на граѓаните и обезбедува квалитетни услуги. Граѓаните мора да имаат доверба во институциите и да почувствуваат дека тие постојат и работат за нив и нивните барања – потенцира Минчев.

Во врска со правичната застапеност на етничките заедници, Минчев рече дека во Владата постои експертска група која нотира, сугерира, забележува и дава предлози за ново законско решение, кое прво би било доставено до Венецијанската комисија.

– Исклучиво експерти работат во оваа област. До новото законско решение огласите за вработување течат врз база на знаење, а оние конкурси кои беа започнати врз основа на балансерот, ќе се довршат – рече Минчев.

Тој додаде и дека не треба да се брза со носењето на новото законско решение, со цел да биде квалитетно, применливо и да нема злоупотреби.

– Чуму е правичната застапеност на етничките заедници ако тие луѓе што се примаат немаат соодветен квалитет и не можат да одговорат на тоа што е најважно, а тоа се услугите кон граѓаните – рече тој.

The post МИНЧЕВ ПРЕДЛАГА АКАДЕМИЈА ЗА ЈАВНА АДМИНИСТРАЦИЈА Да се доедуцираат некомпетентните административци appeared first on plusinfo.mk.