Ник Кејв повторно ја критикуваше вештачката интелигенција, овојпат предупредувајќи дека платформите што создаваат музика за неколку секунди ја поткопуваат суштината на уметничкото творештво. Австралискиот музичар ги нарече „показатели за демонскиот потенцијал“ на новата технологија, која, според него, може да го испразни човечкиот труд од значење и да ја прекине врската меѓу уметноста и човекот.

Во најновото издание на својот блог „The Red Hand Files“, Кејв одговори на прашање од обожавателка дали е песимист или оптимист во однос на вештачката интелигенција.

– Вештачката интелигенција може да го спаси светот, да го уништи или да направи нешто помеѓу. Не знам. Но, платформите за генерирање песни, според мене, се показатели за демонскиот потенцијал на оваа технологија во зародиш да го испразни човечкиот труд од суштина и да ја прекине нашата врска со божественото. Тие го исмеваат самиот чин на создавање, правејќи го човештвото непотребно, земајќи ги плодовите на човечкиот труд и стремеж и сведувајќи ги на обични производи. Тоа е, можеби, нашето последно, најразорно понижување на душата – пишува музичарот.

Тој се осврна и на прашањето дали уметничкото дело може да се одвои од својот автор. Според него, досега сметал дека уметноста и уметникот се неразделни, како брановите и морето од кое се издигнуваат. Но, платформите за генерирање песни целосно ја менуваат таа поставеност: авторот може да биде отстранет од равенката, а песната да продолжи да постои како производ.

Особено остро го нападна „Суно“ (Suno), платформата за создавање музика со вештачка интелигенција. Кејв ја нарече „Големиот поништувач“ и истакна дека програмата никогаш не сакала, не се смеела, не тагувала, не доживеала загуба или скршено срце, а сепак за 15 секунди произведува имитација на човечката душа – песна.

– Тоа е навреда за секој текстописец и композитор кој живеел и се борел во овој свет и го заслужил правото да создаде песна – порача тој.

Кејв со години е еден од најгласните критичари на вештачката интелигенција во уметноста. Претходно ја нарече технологијата „неверојатно вознемирувачка“, а на „Четџипити“ му порача да престане да се меша во пишувањето песни.

Сепак, неговиот став не е целосно непроменет. Минатата година призна дека му се ублажиле резервите кон употребата на вештачката интелигенција како уметничка алатка, откако го видел видеото за неговата песна „Tupelo“, изработено од режисерот Ендру Доминик со анимирање архивски фотографии на Елвис Присли.

Во тоа време, Кејв рече дека фотографиите на Присли, анимирани со помош на вештачка интелигенција, „имаа необична, речиси морничава димензија, како тој да е воскреснат од мртвите, а сцените со распнувањето и воскресението на крајот беа истовремено шокантни и длабоко потресни“.

Сега, се чини дека Кејв повторно ја осудува генеративната вештачка интелигенција во сите нејзини облици, особено кога се користи за пишување песни.

Тој заклучи:

– За оние кои со нетрпение сакаат да го ослободат светот од проблематичните уметници – бидејќи овие сили склони кон цензура остануваат упорни – ова секако е повод за славење, бидејќи овие платформи ветуваат дека целосно ќе го ослободат светот од уметниците.

The post „ТОА Е НАШЕТО ПОСЛЕДНО, НАЈРАЗОРНО ПОНИЖУВАЊЕ“ Ник Кејв жестоко удри по музиката создадена со помош на вештачка интелигенција appeared first on plusinfo.mk.