Трите станови од предметот „Плацеви на Водно“, кои со судска одлука се одземени од имотот поврзан со поранешниот премиер Никола Груевски, повторно се понудени на јавна продажба.

Агенцијата за управување со одземен имот објави нов оглас за продажба на недвижностите лоцирани на Водно, откако претходниот обид за нивна продажба не заврши успешно.

Според објавените податоци, два од становите имаат површина од околу 200 квадратни метри, со дополнителни тераси од речиси 50 квадратни метри. Почетната продажна цена за секој од нив е утврдена на околу 850 илјади евра, што значи дека почетната цена по квадратен метар надминува 4.000 евра.

Третиот стан е со површина од околу 150 квадратни метри, со голема тераса од приближно 95 квадратни метри, а почетната цена е поставена на 760 илјади евра.

Јавното наддавање е закажано за 29 јули, а заинтересираните купувачи ќе можат да ги разгледаат недвижностите на 16 јули, според условите наведени во огласот.

Становите се дел од имотот опфатен со предметот „Плацеви на Водно“, во кој поранешниот премиер Никола Груевски беше осуден на девет години затвор за кривични дела поврзани со незаконско стекнување и перење пари.

Со правосилната пресуда, дел од имотот беше конфискуван и премина во сопственост на државата.

Груевски, кој од 2018 година се наоѓа во Унгарија, не ја издржува затворската казна во Македонија.

The post ТРИТЕ СТАНА НА ГРУЕВСКИ ПОВТОРНО НА ПРОДАЖБА Квадратот на Водно стартува над 4.000 евра, најскапиот е 850.000 евра appeared first on plusinfo.mk.

Управители на две правни лица и петмина вработени во Агенцијата за управување со одземен имот се осомничени за злоупотреба на постапка за јавна набавка, откако Управата за финансиска полиција поднесе кривична пријава против нив до Основното јавно обвинителство Скопје.

Кривичната пријава е поднесена против Н.И. и Б.Г., во својство на управители на правни лица, против две правни лица, како и против вработените во агенцијата Ф.А., Г.А., П.К., Ф.Ј. и А.Б.

Според пријавата, осомничените Н.И. и Б.Г. во текот на 2021 година, со однапред утврдена намера и со координирани дејствија ги повредиле прописите од постапката за јавен повик и за доделување договор за јавна набавка, со што ја нарушиле конкуренцијата во постапка за продажба на хаварисани моторни возила – старо железо, организирана од Агенцијата за управување со одземен имот.

Во постапката едниот правен субјект бил прикажан како формален конкурент и доставил понуда со намерна техничка грешка и нереален паричен износ, со што им било оневозможено понатамошно наддавање на останатите учесници.

Дополнително, Г.А., П.К. и Ф.Ј., во својство на членови на комисијата за спроведување на постапката, спротивно на одредбите од Законот за управување со конфискуван имот, имотна корист и одземени предмети, а врз основа на подзаконски акт и правно мислење изготвено од А.Б., свесно помогнале во реализација на договорената шема.

На овој начин, како што информира Финансиската полиција, било овозможено склучување договор за продажба на одземени хаварисани возила како старо железо помеѓу Агенцијата за управување со одземен имот, претставувана од Ф.А., и правниот субјект управуван од Н.И., при што правното лице се стекнало со противправна имотна корист од 2.128.352 денари (34.000 евра).

Од Управата за финансиска полиција соопштуваат дека случајот е доставен до надлежното јавно обвинителство за понатамошно постапување.

The post ЌАРИЛЕ 34.000 ЕВРА СО МАЛВЕРЗАЦИИ ПРИ ПРОДАЖБА НА ЗАПЛЕНЕТИ ВОЗИЛА Кривична пријава против вработени во Агенцијата за управување со одземен имот appeared first on plusinfo.mk.

Од денеска сите државни институции можат да дојдат до возилата кои што се привремено или трајно одземени, а со кои располага Агенцијата за управување со одземен имот, рече денеска директорката Ирена Илиевска.

Како што појасни Илиевска, досега со овие возила можеа да управуваат само Министерството за внатрешни работи и Министерството за одбрана, а од денеска ќе можат и државните институции кои што ќе поднесат барање до Агенцијата за управување со одземен имот.

– Увидовме дека возилата пропаѓаат. За дел од нив може да се изврши продажба, за оние кои што се конечно завршени постапка. Меѓутоа, за оние кои што се привремено одземени не беше возможна продажбата, ниту отстапувањето, па затоа предложивме нови законски измени кои, кои од денеска се на сила. Со овие измени, до возила може да дојдат сите државни институции кои што ќе поднесат барање до Агенцијата за управување со одземени имот – рече Илиевска.

Илиевска за оваа новост, која е согласно измените на Законот за управување со конфискуван имот, информираше на  17. сесија на Работната група 4 – Правда, слобода и безбедност на тема „Ефикасноста на институционалниот одговор во Македонија на препораките на ЕУ за конфискација и управување со имот стекнат од криминал“.

Агенцијата, додаде Илиевска, на располагање има некаде околу 1.700 до 1.800 возила, дел привремено, а дел конечно одземени.

Согласно законските измени постојат две категории, односно отстапување на возила кои што се конечно одземени и отстапување на возила кои што се привремено одземени.

– Што се однесува за привремено одземени возила, најпрво ние како Агенција треба да побараме согласност од сопственикот од којшто е одземено возилото. Доколку сопственикот не даде согласност, ние се обраќаме до органот којшто го одзел возилото.  Ако добиеме согласност или од сопственикот или од органот којшто го одзел возилото, ние можеме да донесеме одлука согласно барањата на институциите, тие возила да им ги преотстапиме. Со тоа што, доколку е привремено, институциите кои што ќе го преземат возилото се должни да уплатат 93 отсто од неговата вредност, којашто ќе се утврди врз база на проценка. Овие пари треба да ги уплатат во државниот Буџет, а 7 отсто од средствата да ги уплатат на Агенцијата за управување со одземен имот – рече Илиевска.

Во случај возилото да треба да се врати на сопственикот по одреден временски период, директорката на Агенцијата појасни дека институцијата која што го презела треба да ги плати на сопственикот тие 93 отсто од вредноста на проценката, додека тие 7 отсто ќе треба да ги исплати Агенцијата.

– Сето тоа го предложивме за оваа категорија на возила, поради тоа што постапките од одземање до конечно завршување траат премногу долго. Значи имаме пресуди за возила кои што се одземаат по различни основи, дали по основ на убиство, носење дрога, мигранти или поради икс други причини и затоа постапката оди доста долго – рече Илиевска.

Таа додаде дека Агенцијата нема соодветни услови за чување на возилата и тие со години стојат на нивните плацеви на отворено.

– За тој период самата Агенција нема соодветни услови за чување на возилата. На нашите плацеви возилата стојат на отворено. И самите знаете каква е ситуацијата доколку едно возило со години се остави да стои, значи на тоа возило вредноста му опаѓа. Поради тоа, побаравме измена на овој закон. И согласно првичниот закон Агенцијата одлучува дали тие возила ќе ги продава или ќе ги отстапи на некоја државна институција. Тука беа рамноправни сите државни институции. Меѓутоа, тоа е проблемот, што од тие што ги реков, меѓу 1.700 до 1.800 возила, многу малку се возила кои што се со конечни пресуди, дел се возила кои што се категоризирани во групата на старо железо, тоа се возила кои што се стоени повеќе од 10, 15 и 20 години – рече Илиевска.

The post ДОСЕГА ГИ ВОЗЕШЕ САМО ВОЈСКАТА И ПОЛИЦИЈАТА Секоја институција може да купи дел од 1.800-те конфискувани возила appeared first on plusinfo.mk.