Антидемократски структури сѐ уште се борат против демократска Македонија, сѐ уште сакаат да владеат со Македонија. Ова е четврти пат како се злоупотребува Тајната служба и секогаш тоа е против ВМРО-ДПМНЕ. Време е за одговорност, време е обвинителите и судиите да го положат испитот и да донесат разрешници бидејќи граѓаните тоа го очекуваат, истакна потпретседателот на ВМРО-ДПМНЕ, Александар Николоски.

Тој додава дека по влезот на земјата во НАТО биле креирани лажни извештаи за членови на ВМРО-ДПМНЕ со кои биле дискредитирани во странски земји.

– Ова за жал е пракса која се повторува од независноста на Македонија. До сега можам да се сетам на три претходни случаи кога се злоупотребувала Тајната служба. Дали тоа било во деведесеттите години, дали беше аферата „Големото уво“ или беа прислушкуваните разговори и еве за жал, четврти пат се злоупотребува и секогаш жртва е ВМРО-ДПМНЕ. Тоа јасно говори дека антидемократските елементи во општеството се борат против демократско ВМРО-ДПМНЕ затоа што не сакаат демократија во Македонија и не сакаат демократските структури да надвладеат во Македонија. Тие сакаат структурите на поранешниот комунистички режим на поранешна Југославија да продолжат да владеат со Македонија. Ние се спротивставуваме на тоа и затоа ова се случува. Работата е многу поголема отколку што изгледа и има многу подлабока позадина – рече Николоски.

Тој потсети дека алармирал додека биле во опозиција, дека лидерот на ВМРО ДПМНЕ е следен, дека видни членови на партијата се следени, вклучувајќи го и него, дека новинари и бизнисмени се следени.

– Алармиравме и за една друга работа, а тоа е дека Агенцијата за разузнавање создавала лажни извештаи особено после членството на Македонија во НАТО со кои се оцрнуваа луѓе со провакво или проонакво влијание коешто е различно од прозападното влијание. Тоа беа извештаи кои беа создавани со цел да биде дискредитирано раководството на ВМРО-ДПМНЕ. За среќа, ниту едната ниту другата операција успеа. Промените се случија на минатогодишните парламентарни избори, сега е време за одговорност. Сега работата е во рацете на правосудните органи, досега многу често паѓаа на испитот, се надевам дека овој пат ќе го положат – додаде Николоски.

Тој нагласи дека јавноста и граѓаните очекуваат разрешници и одговори, кои можат да се дадат само низ правосудните органи.

– Обвинителите и судиите да го кажат последниот збор, затоа што така е во една демократска држава. Јас се надевам дека тие ќе го направат тоа. Во спротивно и тие можат да станат жртви. Еве гледате има шпекулации дека поранешен јавен обвинител била жртва на следење, така што или да ги постават демократските механизми во Македонија или самите ќе станат жртва – истакна потпретседателот на ВМРО-ДПМНЕ Александар Николоски.

The post НИКОЛОСКИ ПОТСЕТИ ДЕКА АЛАРМИРАЛ ОТИ АГЕНЦИЈАТА ЗА РАЗУЗНАВАЊЕ СОЗДАВАЛА ЛАЖНИ ИЗВЕШТАИ Извештаите биле правени за дискредитација на раководството на ВМРО-ДПМНЕ appeared first on plusinfo.mk.

Уставниот суд утврди дека нема дискриминација во одлуката за разрешување на директорот на Агенцијата за разузнавање Еролд Муслиу, од 28 јуни 2024 година.

Судијката Ана Павловска Данева, на прес-конференција, појасни дека како Суд утврдиле дека нема дискриминираност по полова и политичка основа.

– Судот едногласно одлучи дека нема ниту полова, ниту политичка дискриминација во одлуката за негово разрешување од претседателката Гордана Сиљановска Давкова – изјави Павловска Данева.

Во поглед на политичка дискриминација, Судот, како што посочи Павловска Данева, констатира дека директор на Агенцијата не бил, ниту смеел да биде член на политичка партија, исто како и претседателот кој ја донел одлуката за негово разрешување.

Во однос на половата дискриминација, Павловска Данева, појасни дека изјавите на претседателката Гордана Сиљановска Давкова дадени во кампања дека жените треба да бидат повеќе застапени на највисоките функции, сама од себе не може да биде основа за дискриминација.

– Ние како Суд утврдивме дека тука нема дискриминација бидејќи самите изјави на претседателката не претставуваат доказ дека некој е дискриминиран и дека заложбата за поголема застапеност на жените на високи функции е заложба на секој еден граѓанин – рече Павловска Данева.

Од наводите во барањето, подносителот наведува дека е дискриминиран по основ на пол и на политичка припадност, во врска со членот 9 од Уставот.

Во барањето е наведено дека оспорената Одлука не содржи никакво образложение од кое може да се утврди дека е разрешен поради нестручно и несовесно извршување на функцијата, како што официјално било наведено во Одлуката.

Подносителот навел неколку медиумски објави со кои укажува дека претседателот на Република Северна Македонија од моментот на стапувањето на функција до моментот на донесување на спорните одлуки, остварил информативни средби со други раководни лица, заобиколувајќи го него како раководител на Агенцијата за разузнавање.

Подносителот навел дека политичката дискриминација е вршена меѓудругото и на начин што одредени лица од политичка партија најавиле кадровски смени и ново раководство иако немале надлежност за тоа.

Во врска со дискриминацијата по основ на пол, наведено е дека претседателот на Републиката го разрешил поради фактот што е маж, а во едно интервју има изјавено дека треба да се внимава на застапеноста на жените на највисоките функции.

The post ЕРОЛД МУСЛИУ НЕ БИЛ ДИСКРИМИНИРАН ПО ПОЛОВА ОСНОВА Уставниот суд пресече дека кога Сиљановска Давкова го разрешила не бил ни политички дискриминиран appeared first on plusinfo.mk.

Во интервју за емисијата „За или против“ на ТВ Алфа на прашањето дали со спојувањето на двете институции може да се очекува служба која нема да биде во рацете на власта, Сиљановска рече дека времето покажува и оти затоа не сака да зборува за нешто што е потенцијално, односно програмска определба.

– Јас не сум експертка за безбедносни служби, но и да сум, дури и како претседателка имам надлежност да го именувам директорот на Агенцијата за разузнавање, а таа се занимава со надворешните безбедносни закани или она што е важно за нас. Никој не може да рече дека спојувањето сигурно ќе доведе до редуцирање или до најдобри решенија во поглед на безбедноста внатре и надвор. Времето покажува, јас затоа велам дека не сакам да зборувам за нешто што е потенцијално, односно програмска определба – вели Сиљановска.

Претседателката истакна дека мора да се има предвид неопходноста од механизми на контрола, нагласувајќи ја потребата од широка дебата пред носење на ваква одлука.

– Следам експертски дебати и знам дека има држави каде што има обединети служби, знам дека има држави каде што има разединети служби. Закон јас не предлагам, закон јас не носам, тоа е надлежност на Собранието. Доколку дојде до ваков предлог, тој закон мора да оди во редовна постапка и мора да има широка расправа, парламентарна, вонпарламентарна, широка, секаква… Можно е да се измерат сите аргументи „за“ и „против“, но најважно е секогаш да има механизми на контрола, затоа што постои опасност некаде да се развијат овие служби во држави во држави. Тоа е нешто што мора да се има во предвид и тогаш нека одмерат пратениците пред да одлучат – рече претседателката.

Таа додаде дека не смее да се наметнуваат решенија, бидејќи, како што рече, тоа ќе доведе до поделби.

– Не смее да се наметнуваат решенија и да навиваме однапред без да ги анализираме сите параметри, бидејќи мислам дека тоа ќе доведе до поделби. Ние треба да веруваме дека она што го креираме, не само што е засновано на консензус, не само што е засновано на разбирање, туку и дека гарантира исчекор дека ќе ја подобри безбедносната ситуација. Не смееме да се однесуваме навивачки, барем не јас. Ниту ми е тоа надлежност, ниту имам познавања од тоа, единствено што можам е да го употребам ветото, доколку има решенија кои што мислам дека се недемократски или опасни – рече Сиљановска.

The post НИКОЈ НЕ МОЖЕ ДА ЗНАЕ ДАЛИ СПОЈУВАЊЕТО НА АГЕНЦИЈАТА ЗА НАЦИОНАЛНА БЕЗБЕДОСТ И АГЕНЦИЈАТА ЗА РАЗУЗНАВАЊЕ Е НАЈДОБРО РЕШЕНИЕ Најважно е да има механизми на контрола appeared first on plusinfo.mk.

Државната комисија за спречување на корупција на денешната седница информира дека примила претставка против актуелната директорка на Агенцијата за разузнавање, Габриела Јаковлева во која е наведено оти не доставувала извештаи за работата на Агенцијата до повеќе тела во државата. Дали наводите на претставката се точни или неточни, ќе треба да пресече претседателката на државата.

– Согласно Законот за Агенцијата за разузнавање во член 3 став 2 е уредено дека Агенција за работите од нејзина надлежност ги известува органите во државата – претседателот на Собранието, до Владата, до претседателот на Владата, како и до Советот за координација на безбедно разузнавачка заедница и други органи во државна управа зависно од предметот на работење. Претставката се однесуваше во насока дека директорот на Агенцијата досега нема доставено информации за своето работење до Собранието, која размена на податоци согласно законот е зависно од предметот на интерес на самото работење. ДКСК не може да навлезе во надлежноста дали комуникацијата и размената на податоците помеѓу наведената Агенција и другите органи тече согласно потребите од причина што надлежен орган за законско постапување на законот за Агенција на разузнавање е претседателот на државата – истакна Цвета Ристовска од Антикорупциската комисија.

ДКСК наведува дека нема надлежност да навлегува дали комуникацијата помеѓу наведените институции тече согласно потребите и динамиката која ја определува Агенцијата и додава дека за размена на нивните информации дали се во време и на место согласно закон, проценува претседателот на државата,.

ДКСК реши предметот да ѝ го препрати на одлучување на претседателката Гордана Сиљановска Давкова под чија надлежност е Агенцијата за разузнавање.

На седницата беше презентирана уште една претставка за вработен во Агенцијата за разузнавање, кој наводно на Фејсбук имал фотографии од партиски штаб во времето на парламентарните избори. И за него, како што беше потенцирано на седницата, антикорупционерите нема да постапуваат, туку предметот е пренасочен во внатрешната контрола на АР за да се види дали наводите се точни или не.

The post АНТИКОРУПЦИСКА ЈА ПРЕФРЛИ „ТОПКАТА“ КАЈ СИЉАНОВСКА Претседателката ќе одлучува за претставката за директорката на Агенцијата за разузнавање appeared first on plusinfo.mk.

„Едно од тие прашање е добиено од свиркачи, вработени безбедносно-разузнавачката заедица“ (буквално дел од текст копиран од соопштението по пресот на Славјанка П. од партискиот сајт на СДСМ).

Опа! Прашање добиено од свиркачи, вработени безбедносно-разузнавачката заедица. Види богати. Да се запраша човек како тоа СДСМ вечито кога е во опозиција има „свиркачи“ во „безбедносно-разузнавачката заедница“? Или дали можеби и таа е „заедница“ со именувањето на Христовски се почувствувала „маргинализирана“ и „неудостоена“ како што била во времето на СДСМ и Викторио Димовски, на пример?

И тука ми се создаде слика за пет можни групи „свиркачи“ „вработени безбедносно-разузнавачката заедица“ на СДСМ против Бојан Христовски, а сето поттикнато од сѐ она што излезе во јавноста како огромен скандал поврзан со АНБ со СДСМ и со Виктор Димовски.

Прва можна група прашувачи: Дали членовите „Свиркачи“ од оваа „Заедница“ блиска до СДСМ има врска со тоа што не си ја завршила работата кога над 215 белосветски мафијаши по коишто има светски потерници, влегле во Македонија, за да завршат во подрачни на МВР? Но секако не за да бидат фатени, туку за да се фотографираат и да им бидат издадени легитимни легални македонски пасоши, со легитимен македонски идентитет од македонски државјани. Како? Едноставно, „заедницата“ си преспала во најмалку 215 пати! Ама затоа знае – веројатно затоа СДС прашува – каде бил Бојан Христовски на определен ден дали минал граница? Дали можеби имале задача само да премижат 215 пати, барем за овие случаи, или можеби и ги обезбедувале? Дали се тие свиркачите?

Одиме понатаму со втора група „свиркачи“. Дали можеби овие членови „вработени безбедносно-разузнавачката заедица“, блиски односно „свиркачи“ до СДСМ, се истите оние кои минаа неказнето во времето на Викторио Димовски, за тоа што правеа безбедносна проценка и дадоа „зелено светло“ за државјанство на Онишченко? Да, за Олександар Романович Онишченко, оној Украинец од црната листа на САД, којшто по една цела година проверки од АНБ на Викторио на СДСМ, доби одобрение да му се издаде државјанство заради „покажан интерес и успех“ и развој на спортот. Коњички спорт, од јаваме јако. Да потсетам, Владата на СДСМ, во чијшто состав беше токму и Славјанка, донела одлука по претходна проверка од АНБ, а постапката траела над една година. Тие ли ѝ се сега „свиркачите“ кои поставуваат прашања?

Третата група можни свиркачи од „заедницата“. Оние од „заедницата“, безбедносно-разузнувачи, свиркачи на СДСМ, имаат за објаснувања за скандалот од 2019 година поврзан во Ерменија, кога тројца македонски дипломати со приватен авион ги „извлекоа“ од земјата Бранислав Димитријевиќ, обвинет за измама во Ерменија, ама и ерменскиот дипломат Левон Саркисјан, братот на поранешниот ерменски претседател вмешан во многу корупциски скандали. Да потсетам, таа 2019 Виктор Димовски доаѓа на чело на АНБ, од позицијата Државен секретар на МНР! Па има ли поинтересно поврзување – дипломат и разузнувач? И секако нема врска тој со скандалот, којшто се забошоти. Па имаат ли и овие лица можеби врска со „заедницата“ и со „свиркачите“ на СДСМ?

За четвртата група „вработени безбедносно-разузнувачи“ можни свиркачи од заедницата, би се навратил на уште еден случај, а тоа е скандалот „Жолто комбе“ во Германија и во ЕУ. Според емисијата „Код“ и написи во портали од 2021 година постои преписка меѓу германското БНД и АНБ за македонски оперативци коишто во период во 2019 година со комбе на МВР биле поставени во близина на Бундестагот во Берлин, а за што имало и истрага за нивното делување во повеќе држави на ЕУ. Имено, според написите, македонски оперативци подолг период следеле институции и ситуации во земји пријатели на Македонија. Документите за аферата „Жолто комбе“, односно за оперативци на МВР кои следеле цели во повеќе држави во и надвор од ЕУ се пронајдени при претресот на домот на една (тогаш) пратеничка од СДСМ заради еден друг криминално коруптивен предмет. Тие информации во јавноста, дека македонските служби работеле за трета земја која не е членка на НАТО, не беа демантирани. Дали можеби смената во АНБ ги прави ранливи и можеби вмешаните во овој скандал оние „вработени во безбедносно-разузнавачката заедица“ за да бидат сега „свиркачи“ против именувањето на Христовски, на местото на Димовски В?

И последната група на можни „свиркачи“ на коишто вака, на прва, ми паднаа на ум, коишто можеби бараат заштита од СДСМ со смената на Виктор Димовски и именувањето на Бојан Христовски, се оние за коишто токму Димовски како директор на АНБ директно се закани кон пратеник. Тој, за потсетување, се закани со кривична пријава против пратеник од ВМРО-ДПМНЕ за откривање на идентитетот на агенти на АНБ, затоа што пратеникот ги навел дека вршат незаконско следење на (тогаш) лидерот на опозицијата, претседaтелот на ВМРО-ДПМНЕ, Христијан Мицкоски. Дополнително, пратеникот беше заменик-претседател на надзорната комисија за работата на АНБ и АР. Не дали е вистина или не, не дали да се провери скандалот, туку со закани кон пратеник којшто наведува дека лица од АНБ следат лидер на опозиција. Тоа пак, повторно е многу блиску до еднаш поставеното прашање, дали наместо да си ја работат работата, АНБ следела што прави Бојан Христовски, на пример? А сега кога е назначен за прв човек на Агенцијата, тие „вработени во безбедносно-разузнавачката заедница“ да се свиркачите на СДСМ?

Да сумирам, ова се петте (најмалку) групи кои може да се против именувањето на Бојан Христовски во АНБ. Но и ова покажува дека наместо да се реформира, Агенцијата со СДСМ не работела или работела нешто што не ѝ е должност, а скандалите се туркале „под тепих“. Веројатно има уште многу за коишто друга група „вработени безбедносно-разузнувачи“ би можеле да ги кажат за функционирањето на АНБ со СДСМ на власт, но имаат доблест каква што можеби не сите во „заедницата“ ја имаат.

Јас не сум близок со „заедницата“ ниту во политичкиот, ниту во новинарскиот дел од мојот живот, но доволно ги познавам општествените состојби и имам искуство за да можам да посоветувам. Топло им препорачувам на СДСМ, на Славјанка и другите од таму, токму сега кога веројатно ви почнува процесот да се реформирате како партија, бегајте што подалеку од таа „заедница“ во партиските активности. Никогаш до сега не ви донела добро. Ниту вам, ниту на Македонија.

А на Бојан Христовски му препорачувам добро да ги собере теписите во АНБ во ролна и воопшто да не „ги тресе“, туку да ги исфрли надвор. Едно што е модерно да нема теписи, туку и така веќе ќе нема место за криење на сметот.

The post Пет можни групи „свиркачи“ „вработени безбедносно-разузнавачката заедица“ на СДСМ против Бојан Христовски appeared first on plusinfo.mk.

Христовски во интервју за „360 степени“ нагласува дека обвинувањата и изјавите од одредени политички партии, базирани на шпекулации и претпоставки, се дневнополитички теми и оти не би сакал да коментира „бидејќи секој мој коментар би значел одговор и дополнително навлегување подлабоко во теми во кои не е потребно да се навлезе“.

– Законот е тој, донесен е во 2019 година со изгласување од страна на двотретинско мнозинство во нашиот Парламент. Најпрво и најважно за мене е законот да биде почитуван, како од мене така и од сите вработени во Агенцијата и сите други учесници во системот што треба да го почитуваат. Факт е уште една работа – дека веќе година дена или откако се вратив односно пред да бидам вратен во Министерство за внатрешни работи, со моја официјална изјава за повлекување од членство и секаква друга припадност кон партиските структури, се повлеков од ВМРО-ДПМНЕ и оттогаш па наваму немам апсолутно никакви партиски, политички активности. Но, треба да се запрашаме и за уште една работа – доколку кај мене случајот е една година од повлекувањето да сум именуван за директор од страна на Владата, во случаите на претходни двајца директори немаше поминато ниту еден ден од нивните политички или партиски активности, па дури се сомневам и дека во текот и на нивното работење биле под политичко влијание и дека истото го пренесувале во вид на притисок на вработени во службата. Тие сомневање и индиции ќе бидат дополнително проверени следниот период – изјави Христовски.

На прашањето дали тој може да биде објективен во проверките, Христовски рече дека „ниту смее, ниту може, ниту сака, ниту политички ќе делува во АНБ“.

– Тие што ме познаваат знаат дека сум професионалец и дека никогаш не ги мешам моите лични ставови и идеолошка, не партиска определба, нагласувам, во мојата работа. Точно знам да поделам што е тоа што е мое лично мислење, а што е тоа што е работа, професионализам и работење по законот – вели тој.

За известувањето на ДКСК дека е отворен предмет по анонимна претставка за назначувањето на Христовски за директор на АНБ, тој одговори дека е отворен за соработка зашто е легалист, иако најверојатно главните прашања на Антикорупциска ќе бидат насочени кон Владата.

– Моето формално отчленување од партија е пропратено со моја апсолутна политичка неактивност во изминатиов период, а посебно тоа ќе биде покажано на дело од првиот ден на моето именување, па во следниот период. А тоа Владата, институциите и граѓаните ќе може да го видат на дело, а тие дела ќе бидат зачувување и подобрување на безбедноста состојба во државата односно единствена надлежност што ја има Агенцијата – внатрешната безбедност на државата – изјави Христовски.

Христовски повтори дека во моментот поседува безбедносен сертификат од степен „строго доверливо“ што е ниво под „државна тајна“.

– Безбедносен сертификат за одредена категорија на пристап до класифицирани информации се добива кога работникот или именуваното лице има потреба од пристап и ракување со одреден степен на класификација, односно сертификатот не се бара и не се доделува за потенцијално назначување на позиција, туку откако лицето ќе биде назначено на тоа место – вели Христовски.

Во однос на критиките за евентуалното спојување на АНБ и Агенцијата за разузнавање, што во јавноста го иницираше премиерот Мицкоски, Христовски вели имаат погрешен фокус и оти, наместо тоа треба да се обрне „внимание на ефикасноста на надзорните тела кои ќе ја набљудуваат работата на новоформираната агенција“.

– Зарем мислите дека не е концентрација на моќ и постоењето на АНБ како една служба? АНБ и Агенција за разузнавање се доволно моќни и сами по себе. Спојувањето би ги направило малку помоќни, но во една служба. Но, клучен фактор за разбивање на таа концентрација на моќ е квалитетниот, ефикасниот и во пракса функционален надзор на службите или на таа нова служба што би се направила. Тоа е граѓанскиот, експертскиот надзор, парламентарниот надзор. Треба повеќе да се насочиме кон тоа. Кон функционалност на надзорот на службите, а не на тоа дали ќе има концентрација на моќ или не. Кога има добар надзор, не може да има концентрација на моќ – изјави Христовски.

Тој смета дека законот за спојување на двете агенции треба многу детално да ги предвидува сите обврски, надлежности, одговорности на новата агенција, а на надзорните тела да им се дозволи овластувања од парламентот за да нема повеќе злупотреби во службата.

The post ОДГОВОРНО ТВРДАМ ДЕКА ГИ ИСПОЛНУВАМ УСЛОВИТЕ Новиот директор на АНБ ги отфрли обвинувањата во врска со неговото именување appeared first on plusinfo.mk.

– Да, точно, планот и тоа е дел од Програмата за работа на оваа Влада. Агенцијата за разузнавање и Агенцијата за национална безбедност да се спојат и да се фузионираат во една агенција и тоа можам да кажам дека ќе биде процес којшто ќе трае неколку месеци. Очекувам да заврши успешно во Парламентот – изјави Мицкоски.

Ваков тип на спојување на служби имаат направено многу држави што се земји – членки на НАТО. Меѓу нив, како што појасни Мицкоски, во соседството се Република Словенија на крајот на деведесеттите години, потоа Република Хрватска на почетокот од овој милениум.

– Тоа е дел од Програмата на Владата и тоа ќе го направиме во месеците коишто следат – рече премиерот кој беше во Бутел на ставање на камен темелник на нова градинка.

The post РАЗУЗНАВАЊЕ И БЕЗБЕДНОСТ ВО ЕДНА АГЕНЦИЈА Мицкоски најави спојување по примерот на Словенија и на Хрватска appeared first on plusinfo.mk.

Денес леат крокодилски солзи, а во 2019 година Османи и Груби побараа да се преиспита одлуката за назначувањето на Еролд Муслиy, реагира коалицијата Вреди.

„Лицемерно е опозициската ДУИ да обвинува за недоволна застапеност на Албанците во безбедносните служби. Еве ги фактите. Талат Џафери, министер за одбрана, нула Албанци застапени во армиската единица ‘Волци’. Талат Џафери, технички премиер, армиски старешина Албанец претепан зашто реагирал за селективниот конкурс во ‘Волците’. ДУИ, преку Бујар Османи во 2019 бараше од тогашниот претседател Стево Пендаровски да ја преиспита одлуката за именувањето на Еролд Муслиу за директор на Агенцијата за разузнување. Затоа, овој плач на ДУИ не е за застапеноста на Албанците во институциите, туку затоа што Груби, Бујар, Крешник и компанија ги изгубија привилегиите“, се наведува во реакцијата на Вреди.

Од Коалицијата велат дека имаат заменик директор во Агенцијата за национална безбедност, институција која според програмата на Владата се предвидува да се спои со Агенцијата за разузнавање. После оваа реформа предлогот на Вреди за заменик директор во АНБ, ќе биде заменик и во интегрираната разузнувачка служба.

„Точно е дека Агенцијата за разузнавање имала заменик-директор Албанец од 2001 година, но точно е и дека во 2013 година вие ја сменивте систематизацијата на Агенцијата, каде што исчезна функцијата заменик директор. Од таа година Албанците немале заменик-директор, систематизација што ја гласавте на владиниот состанок, не знаејќи што сте направиле. Функцијата заменик-директор се врати во 2021 година, но од таа година која позиција ја имавте вие (ДУИ)? Никоја! Функцијата заменик директор на Агенцијата, Албанец, ќе ја врати Вреди!“, нагласуваат од Коалицијата Вреди.

Претседателката Гордана Сиљановска Давкова вчера донесе одлука со која се разрешува досегашниот директор на Агенцијата за разузнавање Еролд Муслиу кој на оваа позиција е втор мандат. На негово место е назначена Габриела Јаковлева, која доаѓа од редовите на Агенцијата.

The post ВО 2019 ГОДИНА ОСМАНИ И ГРУБИ БАРАА ДА СЕ ПРЕИСПИТА НАЗНАЧУВАЊЕТО НА МУСЛИУ „ДУИ не плаче за Албанците, туку за привилегиите“, реагира Вреди appeared first on plusinfo.mk.

Безобразно и некоректно е Еролд Муслиу да говори за професионализам и мерит систем. Човекот од Агенцијата за разузнавање направи партиски штаб на СДС, организирајќи хајки, напади и пресметувајќи се со ВМРО-ДПМНЕ, тврди партијата.

„Агенцијата за разузнавање, предводена од Еролд, се пресметуваше со новинари, медиуми и личности кои го критикуваа криминалот на СДС и ДУИ. Муслиу со такво портфолио може да се кандидира единствено за лидер на СДС наместо да рони солзи за неговото разрешување“, се вели во партискотио соопштение.

А за неговото работење, се додава во коминикето, „доволно говори податокот дека додека Муслиу е директор, неговата сопруга со помош на владата доаѓа до грант од 620.000 евра. Во која НАТО земја сопруга на директор на служба добива 620.000 евра грант за работа која е дејност на службата на сопругот?“

Македонската претседателка Гордана Сиљановска Давкова донела одлука со која се разрешува досегашниот директор на Агенцијата за разузнавање Еролд Муслиу, кој на оваа позиција е втор мандат. На негово место е назначена Габриела Јаковлева, која доаѓа од редовите на Агенцијата. Има смена и на позицијата заменик директор, каде доаѓа Ивана Стојановска, а разрешена е досегашната заменичка Александра Бакреска Додовска.

– Очигледно е дека претседателката попушти пред партиските притисоци – реагира досегашниот директор на Агенцијата за разузнавање.

Муслиу вели дека нема да навлегува во политичката логика и автономија при носењето на ваквата одлука од страна на шефицата на државата, но, како што пишува во реакцијата, во случајот со неговото разрешување отсуствуваат законската оправданост и мерит-системот, за кој, како што вели, Сиљановска Давкова постојано зборувала во јавноста.

На ова ВМРО-ДПМНЕ возвраќа жестоко:

„Тешка манипулација е неговата одбрана со етничката припадност и дека тоа е можната причина за смена. Тоа е завесата позади која тој ја крие неговата неспособност, злоупотребите и партиската пристрасност“.

The post ПЛАЧКОТО ЕРОЛД МУСЛИУ ЛИ НАШОЛ ДА ЗБОРУВА ЗА ПРОФЕСИОНАЛИЗАМ?! Неговата сопруга лапна грант од 620.000 евра со негoва помош, обвини ВМРО-ДПМНЕ appeared first on plusinfo.mk.

Од Кабинетот оопштија дека има смена и на позицијата заменик директор каде доаѓа Ивана Стојановска, а разрешена е досегашната заменичка Александра Бакреска Додовска.

„Очигледно е дека претседателката попушти пред партиските притисоци“, реагира досегашниот директор на Агенцијата за разузнавање, Еролд Муслиу.

Тој вели дека нема да навлегува во политичката логика и автономија при носењето на ваквата одлука од страна на шефицата на државата, но, како што пишува во реакцијата, во случајот со неговото разрешување отсуствуваат законската оправданост и мерит-системот, за кој, како што вели, Сиљановска Давкова постојано зборувала во јавноста.

„Посебно сум разочаран од постапката и начинот кој го избра при моето разрешување, не покажувајќи доблест да се сретнеме на прва информативна средба на која би добил брифинг за природата на работата на Агенцијата и за безбедносното опкружување и актуелната состојба во регионот“, е наведено во писмената реакција на Муслиу.

Во соопштението од Кабинетот на претседателката нема детали зошто е разрешен Муслиу. Тој на местото директор на Агенцијата по втор пат беше назначен на 19 мај 2023 година од поранешниот претседател Стево Пендаровски со мандат до 2027 година.

Според законот за Агенција за разунавање, директорот го именува и разрешува претседателот на Република Северна Македонија.

„Основи за разрешување на директорот пред истекот на мандатот се ако не постапува согласно со закон, ако нестручно и несовесно ја извршува функцијата или ако престане да исполнува некој од условите од ставот 1 на овој член“ е наведено во законот за работата на Агенцијата за разузнавање.

Претседателката денеска ја разреши и заменичката директорка во Агенцијата за разузнавање Александра Бакреска Додовска и ја именуваше Ивана Стојановска. Повеќе детали за нив не се наведени во соопштението.

„Претседателката Сиљановска Давкова овие одлуки ги донесе согласно нејзините уставни и законски надлежности“, се вели во соопштението од Кабинетот на претседателката.

The post ЖЕНСКИ ТАНДЕМ ВО АГЕНЦИЈАТА ЗА РАЗУЗНАВАЊЕ Разрешениот Муслиу ја обвини Сиљановска Давкова дека попуштила пред политиката appeared first on plusinfo.mk.