Кривична пријава е поднесена против петмина вработени во Агенцијата за храна и ветеринарство  за „злоупотреба на службена положба и овластување“, информираат денеска од Министерството за внатрешни работи.

„Секторот за внатрешни работи – Куманово поднесе кривична пријава против Р.Е.(51) од село Слупчане, општина Липково, З.А.(59) од Скопје, Н.Б.(61) од Битола, А.Б.(59) од Скопје и С.К.(58) од Штип, поради постоење основи на сомнение за сторено кривично дело ‘злоупотреба на службена положба и овластување’. На 30.05.2024 била извршена контрола во просториите на Агенцијата за храна и ветеринарство – Подрачна единица Куманово и од извршениот увид во списоците за редовност, било констатирано дека првопријавениот – вработен во Подрачната единица – Куманово на работно место помлад референт-архивар, во периодот од 01.12.2018 до 30.04.2024 воопшто не доаѓал на работа, а редовно примал плата и придонеси од буџетски средства“, појаснуваат од МВР.

Второпријавениот З.А., вршител на должноста директор на Агенцијата за храна и ветеринарство до 14.12.2020, како што се наведува во соопштението, свесно дозволил првопријавениот да прима плата и придонеси, иако не ги извршувал своите работни задачи.

„Третопријавениот Н.Б., вршител на должноста директор во Агенцијата за храна и ветеринарство, од 15.12.2020 до 03.07.2024 дозволил да се продолжи со исплатата на плати на Р.Е., кој не се појавувал на работа во текот на целиот свој работен ангажман. Четвртопријавениот А.Б., на работно место раководител на Одделение за финансиски прашања во Аагенцијата, во периодот од декември 2018 до април 2024 година, без да изврши соодветна проверка на редовноста, потпишувал финансиски извештаи и одобрил исплата на месечните плати и придонеси на првопријавениот, иако не бил во списоците за присутност“, додаваат од МВР.

Петтопријавениот С.К., вработен како раководител на Одделение во агенцијата, од декември 2018 до април 2024 година, според соопштеното, не презел мерки за спречување на незаконитата состојба во врска со првопријавениот.

„Со ваквите дејствија на првопријавениот противправно му биле исплатени 1.159.081 денари, а државниот буџет бил оштетен за сума од 1.682.759 денари“, истакнуваат од МВР.

The post НА РАБОТА НЕ ОДЕЛЕ, А ПЛАТА НЕ ОДБИВАЛЕ Кривична против петмина вработени во Агенцијата за храна и ветеринарство appeared first on plusinfo.mk.