Во рамките на престижниот глобален авијациски самит „Changi Aviation Summit 2026“, директорот на Агенцијата за цивилно воздухопловство, Драги Стојаноски и генералниот директор на Управата за цивилно воздухопловство на Сингапур, Хан Кок Јуан, официјализираа нов, сеопфатен Меморандум за разбирање, информира Министерството за транспорт.

„Овој чин, реализиран за време на посетата на г. Стојаноски како висок делегат на специјална покана од сингапурските власти, означува суштинско унапредување на билатералните односи и директно поврзување на македонскиот воздухопловен сектор со еден од водечките светски авијациски центри.

Потпишувањето на овој стратешки документ, претставува директна валоризација на новите политики на менаџментот на АЦВ како за меѓународно етаблирање на институцијата така и за забрзување на темпото за што побрза примена на најновите безбедносни стандарди.

Со овој чекор се отвора широка рамка за институционален развој преку напредна едукација и специјализирани програми за обука во Сингапурската воздухопловна академија (SAA), која важи за една од најреномираните во светот.

Договорот предвидува директна размена на експертиза и примена на најдобри практики во делот на регулативата, безбедносниот надзор и лиценцирањето, со што македонските воздухопловни власти ќе ги хармонизираат своите капацитети со најстрогите глобални стандарди. Покрај едукативната компонента, Меморандумот има силен регионален и технолошки фокус. Соработката подразбира заедничка реализација на проекти кои не само што ќе го зајакнат домашниот сектор, туку имаат потенцијал да ја позиционираат Македонија како регионален лидер во примената на иновативни решенија во воздушниот сообраќај.

Ова партнерство е јасен показател за решителноста на Агенцијата да ги следи и имплементира најсовремените технолошки трендови во меѓународното цивилно воздухопловство.

Во својата изјава, директорот на АЦВ, Драги Стојаноски, истакна дека овој меморандум ја потврдува посветеноста кон примената на највисоките меѓународни стандарди на ICAO. Тој нагласи дека соработката со глобален лидер како Сингапур овозможува пристап до врвна експертиза со која дополнително ќе се подигне нивото на безбедност и ефикасност на македонското небо“.

The post СИНГАПУР КАКО ПАРТНЕР ВО АВИЈАЦИЈАТА Македонија потпиша меморандум со светски авијациски лидер appeared first on plusinfo.mk.

Несекојдневна реклама на социјалните мрежи тврди дека во близината на Скопје, на спортскиот аеродром Стенковец, никнал објект кој организира свадби, разни други настани и концерти, за што на располагање има неверојатни 250.000 квадрати.

Како е тоа можно? Дозволено ли е на аеродром на кој полетуваат и слетуваат авиони да се организираат концерти а ла Вудсток? И кој стои зад овој чуден бизнис проект наречен „Дион Стенковец“?

Само рекламен трик?!

Од Министерството за транспорт и врски за Плусинфо велат дека Владата итно ќе донесе одлука да ги ангажира сите релевантни институции за да го преиспитаат работењето на објектот, со кој стопанисиува Аеро-клубот „Скопје“, но е даден под закуп на ресторанот „Дион“. Рекламата упатува дека ова е предизвик и од безбедносен аспект.

Под лупа ќе бидат сите документи за легализација на стариот објект и за реконструкцијата, но и дозволите за работа и договорите за закуп. Во акцијата најверојатно ќе се вклучат Агенцијата за цивилна воздушна пловидба, Министерството за финансии, Финансиската полиција и други надлежни органи.

Ќе се преиспитува и стопанисувањето со слични спортски и други објекти во земјава, бидејќи познавачите велат дека бизнис-проектот во Стенковец не е единствен таков случај во земјава.

Аеро-клубот и „Дион“ тврдат дека нема ништо спорно

Во Аеро-клубот „Скопје“ велат дека нема ништо спорно. Долгогодишниот член на Аеро-клубот и инструктор по падобранство, Јане Стефанов, објаснува дека тоа што настаните во „Дион Стенковец“ се рекламираат како да се одржуваат на површина од 250.000 квадратни метри е само „рекламна хипербола“ на Инстаграм, но дека реално се користат само околу 35.000 квадрати, без да се зафаќа пистата или целиот аеродром.

И сопственикот на „Дион“, Никола Талев, за Плусинфо тврди дека објектот во Стенковец бил „со сите дозволи“, за што може да се увериме кај субјектот што го издава под закуп. И Талев објаснува дека тоа што во објавите на социјалните мрежи се спомнуваат 250.000 квадрати било само – рекламен трик.

Но, дали е дозволено во рекламите да се „продаваат“ неточни информации?

Боки 13 вели дека не е поврзан со „Дион Стенковец“

Со оглед на тоа што се раширени сомневања дека зад овој „бонбона-бизнис“ можеби стои Бојан Јовановски алијас Боки 13 – човек кој се „прослави“ со еден неоставрен крими проект со владата на Зоран Заев и кој очигледно успева да оствари добра комуникација со сите влади – Плусинфо побара одговор и на прашањето дали евентуално тој има врска со проектот „Дион Стенковец“. Треба да се има предвид и тоа дека Боки 13, како влијателен инфлуенсер, интензивно го рекламира ресторанот „Дион“ на социјалните мрежи.

Во изјава за Плусинфо, Бојан Јовановски негира било каква поврзаност со овој проект и упатува одговори да побараме кај сопственикот на „Дион“. Во дополнителна комуникација со новинар на редакцијата, Боки 13, предизвикан веројатно од прашањата, возбудено тврди дека станувало збор за „клевета“ и бара да не биде спомнуван во овој контекст, а инсистира известувањето да било „професионално“.

Талев потврдува дека Боки 13 немал врска со „Дион Стенковец“ и додава тој со инфлуенсерот немал деловна соработка, туку Боки 13 го рекламирал на своја иницијатива и бесплатно. Тоа е малку чудно, со оглед на фактот што во некои од рекламите се спомнуваат и ваучери од „Дион“. Но и таа работа нека си ја расчистат надлежните органи.

Какво решение издале Чучер Сандево и Агенцијата за цивилна воздушна пловидба?

Објектот кај аеродромот Стенковец има решение за легализација, донесено врз основа на постоечки претходен „див“ објект. Во 2019 година Општина Чучер-Сандево издала решение за реконструкција на стариот објект, со претходна согласност од тогашниот директор на Агенцијата за цивилно воздухопловство, Томислав Тунтев.

Според ова решение, просторот требало да опфати до 35.000 метри квадратни, велат од АЦВП за Плусинфо.

Меѓутоа, рекламата со „хиперболата“ сепак наложува надлежните органи да испитаат дали закупецот има планови за ангажирање на 250.000 квадратни метри од овој простор, што бездруго може да го загрози безбедното функционирање на самиот аеродром. Ова е таа реклама:

 

View this post on Instagram

 

A post shared by Dion Stenkovec – Weddings & Events (@dionstenkovec)

Претходниот објект бил дивоградба, дали е таков и новиот?

Добро информиран извор од Општина Чучер-Сандево тврди објектот пред реконструкцијата бил без одобрение за градба, што ќе рече бил „див“, па потоа бил легализиран. Изворот тврди дека и неколку други објекти на спортскиот аеродром Стенковец се „диви“. Органите треба да истражат како „Дион“ се појавил во плановите на општинските раководители во Чучер-Сандево и како се родил „бонбона проектот“.

Клучно прашање е дали новиот, наводно реконструиран објект, е со градежна дозвола. Има сомневања дека објектот е стокмен ваков каков што е без дозвола и дека се „вози“ на приказната дека само бил преправен стариот, легализиран објект. Но, треба да се проверат тврдењата дека објектот во габарит и во висина го надминува стариот, а тоа веќе не е „реновирање“, туку интервенција за која се потребни други дозволи.

Во крајна линија, темата има и суштинска димензија. Спортскиот аеродром Стенковец, како и многу слични објекти во земјава, не е приватен посед. Своевремено, владата на Никола Груевски одлучила ваквите објекти да ги дава на стопанисување на спортски клубови и на сродни субјекти. Но, како што тоа обично бива, разни фаци од бизнисот тука „намирисуваат“ потенцијали за профитни зделки, бидејќи со скромни закупи и вложувања, можат да се заработат големи пари.

Каква полза имаат државата, спортистите и спортот воопшто од ваквите проекти?

The post 📽 КАКО ДА СЕ „ЛАПНЕ“ СПОРТСКИ АЕРОДРОМ И ДА СЕ НАПРАВИ БАЛКАНСКИ ВУДСТОК НА 250.000 КВАДРАТИ „Дион Стенковец“ има големи амбиции, а дали ги има и сите потребни „папири“? appeared first on plusinfo.mk.

Десет лица ќе се стекнат со дозвола од областа на летечките операции со обука кофинансирана од државата преку Агенцијата за цивилно воздухопловство (АЦВ). Уверенијата на кандидатите денеска им ги врачија вицепремиерот и министер за транспорт, Александар Николоски и директорот на АЦВ Драги Стојаноски.

Агенцијата на 1 јули објави јавен повик за кофинансирање до 50 проценти на обуки за 27 лица, по што следуваше тестирање на кандидатите. Уверенија за кандидати за приватен пилот на авион PPL-A SEP land добија седум лица, за пилот на ултралесни воздухоплови (ULPL) две лица, а за пилот на едрилица по програма со аерозапрега (SPL) едно.

Министерот Николоски и директорот Стојановски изјавија дека обуките се во насока на надминување на состојбата со сериозен недостиг на воздухопловен персонал. Станува збор за основни обуки, а Агенцијата најави повик и за напредни обуки со што, како што изјави Николоски, би се произвел воздухопловен кадар што ќе се вклучи и во државните ресурси и во приватниот сектор.

– Продолжуваме со поддршката, процесот е отворен и транспарентен, се надевам дека на идниот повик ќе има уште поголем интерес – изјави Николоски.

Дел од обуките се основа за натамошен професионален развој и градење професионална пилотска кариера, а дел се од областа на воздухопловно спортски активности како стимул за досегашните високи резултати постигнати од поединци, тимови и репрезентацијата на европски и светски натпревари. Целта на проектот, посочуваат, е и да ги раздвижи и обнови активностите во аеро клубовите и спортските аеродроми кои соочувајќи се со финансиски проблеми, нерешени имотно-правни односи, без помош од државата – полека замираат, а кои во минатото беа основата за создавање персонал кој подоцна го користеле и Министерството за одбрана, воздухопловните единици на МВР, СОЗР, ДЗС – пилоти на АТ 802А Fire Boss, како и Агенцијата за цивилно воздухопловство.

The post 10 КАНДИДАТИ ЌЕ УЧАТ ЗА ПИЛОТИ Агенцијата за цивилно воздухопловство најави повик и за напредни обуки appeared first on plusinfo.mk.

Агенцијата за цивилно воздухопловство забрани какво било користење дронови на 8 локации низ државата во текот на четврток за кога е планиран погребот за жртвите од трагедијата во Кочани, информира Министерството за внатрешни работи.

„Министерството за внатрешни работи ги информира граѓаните и сите корисници на воздухоплови без екипаж (дронови) дека од страна на Агенцијата за цивилно воздухопловство е поставена забрана за вршење на било какви операции со воздухоплови без екипаж (дронови) на територијата на следните населени места:

1. Кочани, вклучувајќи ги с. Оризари, с. Тркање и с. Зрновци,
2. Штип со околните места,
3. Општина Чешиново-Облешево, вклучувајќи ги с. Соколарци и с. Чифлик,
4. Струмица со околните места,
5. Пробиштип со околните места,
6. Македонска Каменица со околните места,
7. Виница, вклучувајќи го с. Митец,
8. Скопје – гробишта о. Бутел, гробишта о. Ѓорче Петров, гробишта с. Горно Лисиче и гробишта с. Горно Нерези.

Неовластеното, некоординирано оперирање на овие воздухоплови не само што го загрозува воздушниот сообраќај, туку може да предизвика сериозни последици по животот и имотот на трети лица на земја.

Оперирање со воздухоплови без екипаж во забранети зони е основ за поведување постапка за санкционирање согласно Законот за воздухопловство.

Апелираме до граѓаните во овие денови на неизмерна тага и болка во рамки на загарантираното со Устав право на собирање и одржување на протест, истите да се одржат во мирна атмосфера, да се почитуваат веќе донесените одлуки од страна на државните институции и да се почитуваат наредбите и насоките од страна на полициските службеници, во насока на обезбедување на мирот, безбедноста и сигурноста на сите граѓани во државата“, соопшти Министерството за внатрешни работи.

The post ЦЕЛОСНА ЗАБРАНА ЗА КОРИСТЕЊЕ ДРОНОВИ В ЧЕТВРТОК ВО 8 ОПШТИНИ Полицијата објави на кои места е забрането користење беспилотни летала appeared first on plusinfo.mk.

Во соопштението се нагласува дека „Правилникот за воздухоплови без екипаж“, со кој се имплементираат европските регулативи Regulations (EU) 2019/945 и 2019/947, стапил на сила на 1 јуни 2024 година, а неговата примена е одложена до 1 јануари 2025 година. За време на 2024 година, Агенцијата спровела низа активности за информирање на јавноста, вклучително и работилница организирана на 14 декември во Домот на АРМ, каде сите заинтересирани можеле да добијат релевантни информации директно од стручните лица на АЦВ.

Дополнително, сите податоци за правилата на оперирање со дронови во македонскиот воздушен простор се достапни 24/7 на официјалните веб-страници www.caa.gov.mk и www.drone.gov.mk. Од Агенцијата потенцираат дека непочитувањето на правилата под изговорот „не сме знаеле“ е целосно неприфатливо.

Забраната за надлетување луѓе постои веќе една деценија

АЦВ потсетува дека забраната за директно надлетување луѓе е на сила повеќе од 10 години, уште од Уредбата за условите под кои воздухоплов без екипаж може да лета во македонскиот воздушен простор, донесена од Владата во 2015 и 2017 година. Истото правило е содржано и во новиот правилник кој ги имплементира европските регулативи. Член 4 од оваа регулатива предвидува дека „далечинскиот пилот мора да управува со дронот на безбедно растојание од луѓе и не смее да лета директно над собири на луѓе“.

Со оглед дека Македонија ја применува истата регулатива како и останатите европски земји, сите оператори на дронови – македонски и странски – мора да бидат запознаени со пропишаните ограничувања.

Строги правила за управување со дронови

Во однос на неодамнешните настани, АЦВ нагласува дека лицата кои управувале со дронови морале да бидат регистрирани оператори и да поседуваат потврда за регистрација издадена од Агенцијата. Истовремено, тие не смееле да го надлетуваат собирот на луѓе, бидејќи ниту една категорија операции со дронови (А1, А2 или А3) не дозволува таква активност.

Оние што управувале со дронови требало да имаат и соодветен сертификат за оспособеност за далечински пилот (А1/А3 или А2), издаден од АЦВ. Единствениот начин за управување со дронови во близина на луѓе (без директно надлетување) е со поседување на оперативно одобрение за оператор на дронови во посебна категорија, издадено од АЦВ. Ова одобрение се добива по спроведување на управна постапка, која вклучува детална проверка на операторот и неговиот систем за управување со безбедноста на летот, при што далечинските пилоти мора да имаат сертификат за операции од категоријата А2.

Регулации за забранети и ограничени зони

Во врска со поставувањето на забранети или ограничени зони за летови со дронови, член 7 од македонскиот Правилник за воздухоплови без екипаж и член 15 од европската регулатива не предвидуваат ограничувања во однос на големината или времетраењето на овие зони. Единственото ограничување, според Чикашката конвенција за цивилно воздухопловство, е дека ваквите зони не смеат да се простираат над меѓународни води.

Кога се создава забранета зона за летови со дронови, таа веднаш се објавува на мапата за резервиран воздушен простор, која е достапна во секое време на www.drone.gov.mk и www.caa.gov.mk. Секој оператор на дрон е должен да го најави својот лет на оваа мапа и да се запознае со состојбата во воздушниот простор каде што планира да лета. Ова е неопходно не само за неговата безбедност, туку и за безбедноста на другите оператори и сите лица на земја.

Надзор и санкции

Покрај инспекторите од Агенцијата за цивилно воздухопловство, надзор над активностите со дронови можат да вршат и полициските служби, согласно член 144 став 3 од Законот за воздухопловство.

АЦВ уште еднаш предупредува дека неовластено и некоординирано управување со дронови не само што го загрозува воздушниот сообраќај, туку може да предизвика сериозни последици врз животот и имотот на луѓето на земја.

The post СЕКОЈ ДРОН ТРЕБА ДА БИДЕ ПРИЈАВЕН, СЕКОЈ ЛЕТ МОРА ДА БИДЕ НАЈАВЕН Строги правила за сопствениците на летала appeared first on plusinfo.mk.

-Во понеделник влегуваме во М-НАВ и ќе ги направиме потребните разговори, ќе ги преслушаме разговорите на контролорите со пилотите на авионите и ќе ги погледнеме и снимките. Ние не утврдуваме вина, туку причина која довела до ваков инцидент. Исто така, ќе побараме изјави од пилотите на двата авиона преку нивните воздухопловни власти, па ќе ја информираме јавноста. Сè друго во моментот ќе биде шпекулација – вели Илиевски.

Давателот на навигациски услуги М-НАВ претходно соопшти дека во пропишаниот рок е поднесена пријава за безбедосниот настан и е отворена страга за утврдување на фактичката состојба и причините.

-На 7 септември во 18.30 часот е поднесена пријава за безбедосен настан во пропишаниот рок од извршителите кои работеле на засегнатиот сектор. Согласно правилата и пропишаните процедури, пријавата е регистрирана од страна на одделението ИМС (Integrated management sistem) и e доставена до Агенцијата за цивилно воздухопловство. Исто така, согласно важечките процедури, од страна на одделението ИМС е отворена е истрага за утврдување на фактичката состојба и причините за настанот. Би сакале да укажеме дека ваквите настани како и секаде во Европа, секогаш се навремено пријавени и процесирани од сите релевантни одделенија, служби и институции, согласно постоечките правни процедури, наведе М-НАВ во соопштение.

Претходно и од Агенцијата за цивилно воздухопловство потврдија дека постапуваат по настан пријавен од М-НАВ.

Порталот СДК повикувајќи се на сајтот за следење на летови во реално време Флајтрадар24, објави дека авиони на „Туркиш ерлајнс“ и на „Санекспрес“ за малку ќе се судреле на небото над Меѓународниот аеродром во Скопје на 7 септември во 18.32 часот.

АВИОНИТЕ СЕ РАЗМИНАЛЕ НАД МИЛАДИНОВЦИ? Снимка од Флајтрадар24 ги покажува кобните 30 секунди од избегнатиот инцидент од 7 септември

The post ПОТЕНЦИЈАЛНИОТ СУДИР НА ДВА АВИОНА Е СЕРИОЗЕН ИНЦИДЕНТ Комитетот за истрага на воздухопловни несреќи ќе истражува зошто настанала опасноста  appeared first on plusinfo.mk.

– Управниот Одбор на Агенцијата за цивилно воздухопловство на седницата одржана на 30 мај, во согласност со законските прописи, ја констатираше поднесената оставка и донесе одлука за разрешување од функцијата директор на АЦВ, на мое барање. Со тоа, на 31 мај престана мојот работен однос во АЦВ. Во согласност со законските одредби, на работа се враќам во аеродромскиот оператор ТАВ Македонија, каде што досега мируваше мојот работниот однос – вели Тунтев.

The post ТУНТЕВ ДАЛ ОСТАВКА ВО АГЕНЦИЈАТА ЗА ЦИВИЛНО ВОЗДУХОПЛОВСТВО Се враќа на работа во ТАВ Македонија appeared first on plusinfo.mk.

Директорот на АЦВ, Томислав Тунтев, кадар на СДСМ, во својата прва година како директор на оваа институција поделил 1 милион евра, односно 60,8 милиони денари за нето-плати на вработенитените, пишува во отчетот што ова регулаторно тело го доставило на одобрување во македонското Собрание.

Бруто-платата со сите надоместоци на еден вработен во оваа институција е поголема од 100.000 денари.

Како е можно вакво луксузирање во време кога беспарицата тропа на врата поради последиците од пендемијата? Кој е тоа што дозволува ваков разврат?

The post СКАНДАЛ Среде коронакриза вработените во Агенцијата за цивилно воздухопловство лапаат просечни плати од 75.000 денари! appeared first on plusinfo.mk.