Премиерот Христијан Мицкоски и претседателот на Собранието Африм Гаши денеска повикаа да не се гласа по етнична основа на вториот круг од локалните избори во Брвеница што ќе се одржи в недела.

– В недела во Брвеница граѓаните ќе гласаат така како што им вели разумот, а вие ќе се јавите да ни честитате – рече премиерот Христијан Мицкоски одговарајќи на пратеничко прашање поставено од пратеникот Скендер Реџепи.

Претседателот на Владата потсети дека скоро пред една година на избори граѓаните на Брвеница јасно се определија, го дадоа гласот на, за жал прерано починатиот градоначалник Јовица Илиевски, а и сега на вонредните локални избори имаат предност над Националната алијанса за интеграција (НАИ).

– Во Брвеница е чудно како тоа славите пораз, бидејќи кандидатот што вие го поддржавте изгуби. Кандидатот на ВМРО-ДПМНЕ и Коалицијата освои близу 3.000 гласови, а кандидатот на Националната алијанса за интеграција (НАИ) имаше околу 900 гласови помалку, што значи тој кандидат загуби на изборите. Во дваесет години вие за Брвеница направивте нула проекти и резултатот од тие нула проекти е 10.000 иселени лица, а од нив 90 отсто Албанци. И сега одите по Европа и низ светот, коленичите и им викате вратете се во Брвеница да гласате затоа што не смеат кауриве да победат и да имаат свој градоначалник во Брвеница. Ги барате тие истите кои што избегаа поради вашето 20-годишно владеење во Владата – истакна Мицкоски.

Премиерот потсети на главната порака што ја испраќал до граѓаните во Општина Брвеница, а тоа е да не се прават етнички поделби меѓу населението.

– Луѓе од коалицијата на НАИ излегоа и повикаа на етничко гласање, додека од ВМРО-ДПМНЕ никој не побара да се гласа етнички. Напротив, мојата порака беше, ќе сакаат да ве делат по етничка основа, но немојте тоа да го дозволите бидејќи вие повторно ќе бидете еден до друг. Тие ќе си заминат бидејќи ова е нивната сламка за спас на нивната политичка кариера, а за вас е сѐ. Не дозволувајте да влијаат луѓе од минатото за вашата иднина. Тоа беше мојата порака до жителите Македонци, Албанци и останати жители. Жителите велат дека 20 години нема еден проект за Брвеница, а Христијан како претседател на Владата, Александар Николоски како потпретседател на Владата и министер за транспорт, го градат патот за Гургурница, МОН гради училиште во Челопек, се градат спортска сала и детска градинка во Челопек. На 2 ноември ќе чекам честитки за нашата победа во Брвеница – нагласи Мицкоски.

Според Гаши, на секои избори треба да победи најдобриот, а крајно време е изборите во државата да ги гледаме од аспект на ефикасност, прагматичност, реализирање на програми.

– За жал, во нашата држава во некои делови и на некои избори ни се појавува и ни се повторува случајот да се делиме етнички, особено кога зборуваме за локални избори. Знаете работите кои се во делот на локалната самоуправа се работи кои немаат етнички призвук или предзнак. Се работи за канализација, водовод, асфалтирање на улици, собирање на смет итн. Не можеме сѐ да сведеме на меѓуетнички односи. Би би било добро да се гласа за најдобриот и да победи тој што ќе ја реализира предизборната програма која е претставена пред граѓаните, а потоа да им служи на сите граѓани исто без разлика на припадноста – рече Гаши одговарајќи на повиците од одредени политичари Албанци да се гласа по етничка основа.

Во руралните средини, додаде тој на средбата со новинарите, имаме гласање не само по етничка основа туку и во зависност од тоа кој од кое село е.

Противкандидати на вториот круг од локалните избори в недела во Брвеница се Стојанчо Радичевски од ВМРО-ДПМНЕ и Аркин Јахиј од ДУИ.

The post МИЦКОСКИ И ГАШИ ПОВИКАА ДА НЕ СЕ ГЛАСА ПО ЕТНИЧКА ОСНОВА ВО БРВЕНИЦА Премиерот очекува победа на Стојанчо Радичевски од ВМРО-ДПМНЕ appeared first on plusinfo.mk.

Претседателот на Собранието Африм Гаши вели дека неговиот став по повод пресудата на лидерите на расформираната Ослободитена војска на Косово е личен став и не е искажан од позицијата прв парламентарец.

На денешниот брифинг со медиумите тој рече дека, иако е прв човек на парламентот, има право на своја приватност и став и како граѓанин и како политичар за одредена настан, ситуација или прашање, независно од функцијата на која во моментов се наоѓа. И, токму затоа чувствувал должност да се произнесе.

Минатата недела судот во Хаг пресуди високи затворски казни за четворицата водачи на ОВК за воени злостортва, на што Гаши преку соџијалните мрежи реагираше дека „ниту една пресуда не може да го негира фактот дека Хашим Тачи, Јакуп Красниќи, Кадри Весели и Реџеп Селими се дел од славното поглавје во историјата на Косово“. Додаде и дека во време кога слободата на Косово, како и мирот и стабилноста во регионот сè уште беа идеал за кој требаше да се бори, „тие имаа храброст да се вклучат и да ја преземат историската одговорност за носење слобода на својот народ“, како и дека „за албанскиот народ, тие се и остануваат ослободители на Косово“.

На брифингот Гаши информираше дека остварува постојани контакти со сите пратенички групи со цел да се изнајде заеднички јазик и компромис за законите што бараат двојно, Бадентерово мнозинство. Нагласи дека законодавниот дом мора да ја надмине блокадата и да биде функционален во интерес на граѓаните.

Зборувајќи за предизвиците со обезбедувањето на потребното мнозинство за законите што се на дневен ред, Гаши посочи дека решенијата мора да се бараат исклучиво преку демократски дијалог.

– Јасно е дека во Собранието имаме проблем со гласањето на законите кои треба да се изгласаат со Бадентерово мнозинство. Но, за сè во демократијата се потребни разговор и дијалог и треба да има решение. Јас лично разговарам со сите пратеници и бараме начин како да ги надминеме овие разлики. Се надевам дека во блиска иднина ќе најдеме решение, ќе се договориме и ако треба закон по закон или концептуално да најдеме решение. Како и да е, Собранието мора да профункционира и во овој дел каде што е заглавено и да биде ефективно и за самата работа на институцијата, но и за граѓаните – истакна Гаши.

Појасни дека на 123. пленарна седница, закажана за 29 септември, се ставени сите 10 предлог-закони поднесени во последно време по скратена постапка, меѓу кои и оние за јавната администрација и за високата служба. Доколку некој предлог не го добие потребното Бадентерово мнозинство, постапката завршува и истиот закон не може повторно да се поднесе во следните 3 месеци.

Во врска со преговорите за измените на Изборниот законик, Гаши информираше дека на денешната редовна координација со координаторите на пратеничките групи била отворена и таа тема, при што е договорено партиите прво да ги усогласат позициите внатре во своите редови.

– Се отворија сите теми кои се поактуелни. Се отвори и темата за Изборниот законик. Од пратеничките групи известија дека не сите се состанале во партија за да изградат нови ставови. Очекуваме во текот на идната недела, а можеби и таа потоа да се состанат и ако има нови моменти да свикаме работна група и да продолжат со работата – посочи Гаши.

Додаде и дека нема информација дали партиите добиле покана за средба со министерот за правда.

Во врска со 124. седница, пак, за пратенички прашања, информираше дека е свикана за 24 септември, откако терминот бил усогласен со претседателот на Владата.

– Се договоривме и се координиравме со претседателот на Владата. Немаше никаква можност друг ден да се организира и остана 24 септември. Барав од координаторите да имаат разбирање и да не поставуваат прашања усно, затоа што можат писмено да му ги постават на премиерот и тие ќе бидат одговорени – рече Гаши.

Прашан за законските решенија за минималната плата, претседателот на законодавниот дом најави дека тие ќе се најдат пред пратениците на почетокот на идниот месец.

– Што се однесува до процедурата, веќе разговаравме и на почетокот на октомври, можеби првата недела ќе биде свикана нова седница и ќе бидат ставени овие закони, вклучително и законот за минимална плата – рече Гаши.

Неговиот личен став во врска со примањата и приходите е дека тие треба да се зголемуваат.

На координацијата пратениците разговарале и за функционирањето на собраниските анкетни комисии, со акцент на барањата на семејствата на загинатите од Кочани. Гаши посочи дека официјално, преку архива или електронска пошта сè уште нема добиено писмо од родителите, но го видел јавно и ќе изврши проверка.

– Некои од координаторите имаат став дека треба да заврши постоечката Анкетна комисија, па потоа да биде формирана другата комисија. Другите мислат поинаку, дека не треба да се спојува една со друга, туку дека треба да течат паралелно. Од координаторот на Левица имаме најава дека на почетокот на октомври ќе се свика постоечката Анкетна комисија, можеби ќе се донесат заклучоци и тоа ќе ја отвори вратата за да се формира и другата анкетна комисија – рече Гаши.

The post „ИМАМ ПРАВО НА ЛИЧЕН СТАВ ЗА ПРЕСУДАТА НА ХАШИМ ТАЧИ“ Гаши не реагирал како претседател на Собранието, туку искажал личен став appeared first on plusinfo.mk.

Убеден сум дека нема да има предвремени парламентарни избори, изјави денеска претседателот на Собранието, Африм Гаши, на редовниот понеделнички брифинг со новинарите.

На прашањето на што се должи ова негово убедување имајќи ги предвид изјавите што деновиве се пласираат во јавноста, Гаши рече дека тоа е резултат на неговата политичка интуиција.

Информирајќи за денешната редовна координација со првите луѓе на пратеничките групи во Собранието, Гаши рече дека претставникот на Левица го отворил прашањето за Изборниот законик поради изнесените ставови во врска со предвремените избори. Претседателот на Собранието рече дека е добро да се разговара и дека на средбата нагласил дека доколку има подготвеност, работната група во Собранието и координаторите треба да ги продолжат разговорите за Изборниот законик.

Во врска со законот за правичната застапеност, кој е заглавен во Собранието поради блокада на бадентерот и ДУИ, Гаши рече дека има комуникација со лидерите, но негира дека меѓу нив е и Али Ахмети, претседателот на ДУИ.

Претседателот на Собранието најави дека набргу ќе биде свикана седница на Комисијата за надворешна политика, на која новите амбасадори ќе ги презентираат своите приоритети.

На координативната средба било побарано на седница на Влада да се разгледа прашањето за неприсуството на одредени министри на седниците за поставување опозициски и пратенички прашања. Исто така, било побарано да се премести датумот на седницата за поставување пратенички прашања поради најава дека премиерот Христијан Мицкоски на 24 септември ќе биде во Њујорк на Генералното собрание на ОН.

The post ГАШИ Е УБЕДЕН ДЕКА ЌЕ НЕМА ПРЕДВРЕМЕНИ ИЗБОРИ Повика да продолжат разговорите за Изборниот законик appeared first on plusinfo.mk.

Вистина е дека 35 години за животот на една држава не се многу, но тие се доволни за да разбереме дека државноста не се постигнува само со еден политички акт, со референдум или само со прогласување независност, порача претседателот на Собранието Африм Гаши на приемот во Собранието по повод 8 Септември, Денот на независноста.

Државата е нешто што се гради секој ден, додаде тој, таа се гради со институции, со закони, со одговорност, со економија, со образование, со правда, со остварени граѓани, со среќни семејства кои живеат во таа држава, со доверба во државата и, пред сè, државата се гради со луѓе кои веруваат дека нивната лична иднина е поврзана со заедничката иднина на државата.

Гаши нагласи дека покрај одбележувањето на овој толку важен јубилеен настан,  имаме можност и заеднички да се осврнеме на сето она низ што помина Републиката во текот на овие години, но и да размислиме каква држава им оставаме на генерациите што доаѓаат по нас.

– Кога доаѓа 8 Септември и ѝ се навраќаме на 1991 година, секогаш го имаме предвид фактот дека независноста дојде во исклучително тешко и деликатно време. Освен што беше време на распаѓање на Југославија, на политички и економски неизвесности, како и на големи промени во Европа, тоа беше и време кога пред оние што ја создаваа независна Македонија стоеше предизвикот дали оваа независност може да се оствари и, второ, дали сето тоа може да се постигне без војна. Затоа, без оглед на тоа на кој политички табор му припаѓале и дали се согласуваме со сите политички одлуки на таа генерација, не можеме да не го признаеме и вреднуваме фактот дека Македонија стана независна и суверена на мирен начин, нешто што не се случи со другите републики кои се одвоија од поранешна Југославија – изјави Гаши.

Поради тоа, нагласи Гаши, 8 Септември и референдумот од 1991 година се мирен роденден на една држава сонувана од многу генерации и круна на една повеќедецениска заложба.

– Додека славиме, не треба да заборавиме дека патот во изминатите 35 години не бил лесен. Имаше периоди на успех, но и периоди на кризи. Имаше моменти на стабилност, но и моменти на политички и економски потреси. Доживеавме уставни и институционални промени. Поминавме низ тежок економски транзициски процес и трансформација на општеството, додека многу наши граѓани ја напуштија земјата во потрага по подобар живот – изјави Гаши.

Сепак, посочи Гаши, ние, кои останавме овде, верувавме дека вреди да се обидуваме за ефикасни и доверливи институции.

Затоа, додаде, и оваа 35-годишнина треба да ја гледаме низ она што сме го изградиле, а не низ она што не ни успеало.

– Ова е оптимистичката визија за земјата и за сите наши граѓани. Во таа насока, секој кој ја сака оваа држава знае дека во темелот на државата лежи рамнотежата на еднаквоста и дека колку повеќе се зачувува оваа рамнотежа, толку е поуспешна и самата држава. Северна Македонија е дом на граѓани со различна етничка, јазична, верска и културна припадност. И тоа не е пречка на патот на градењето на државата. Тоа е реалноста на нашата држава, а наша одговорност е оваа реалност да ја претвориме во извор на успех – порача Гаши.

Следствено, по аналогија со легендарната реченица на претседателот Кенеди, предизвикот на нашата генерација, според Гаши е „сите да се запрашаме каква држава посакуваме да имаме во следните 35 години?“

– А државата на иднината треба да биде држава на функционални институции, каде што администрацијата не го гледа граѓанинот како товар, туку како причина за своето постоење, каде што законот се применува еднакво без оглед на припадноста на странката, каде што корупцијата се гледа како порок и каде што сите ја гледаат заедничката европска перспектива. Всушност, ние можеме да имаме различни јазици, различни култури, различни традиции, различни политички убедувања, но имаме само една заедничка држава. Ова треба да биде основата на нашиот однос – порача Гаши.

И тука, според Гаши, Собранието има посебна одговорност, затоа што Собранието е местото каде што општеството се отсликува и се претставува преку своите институции.

– Ние знаеме дека во секое плуралистичко собрание парламентарната дебата е неопходна, несогласувањето е нормално и секако и критиката е потребна, но над секоја политичка разлика треба да постои една поголема одговорност – одговорноста кон државата и кон граѓаните. Можеби нема да се согласуваме за начинот на кој треба да постигнеме одредена цел, но мора да бидеме способни да се согласиме за тоа кои се основните државни цели – изјави Гаши.

Гаши, исто така, порача дека треба да создадеме услови младите да не го гледаат заминувањето од земјата како единствена можност за подобар живот, потоа да се промени и нашиот однос кон дијаспората, како и заштитата и афирмација на традиционалното семејство.

– Не можеме да изградиме силна држава ако секоја година губиме дел од младата генерација. Но, демографската политика не треба да се гледа само преку наталитетот. Таа треба да биде поврзана со квалитетот на животот, со вработувањето, со квалитетното образование и здравство, со правдата, но и со животната средина и можностите за домување. Младите треба да веруваат дека и овде можат да изградат добар живот. Ако сакаме младите да останат овде, постојано треба да создаваме причини и можности за нив. Ова е патриотизмот што се очекува од нас – порача Гаши.

Според Гаши, треба да имаме храброст отворено да зборуваме за тоа како може да се унапреди и развива Републиката, каде сме успеале и каде можело да се направи подобро.

– Без оглед како ќе го именуваме тој процес, задачата на нашата генерација останува да ја одржува жива дебатата за тоа како можеме да ја направиме оваа држава пофункционална, како можеме да ја зајакнеме симетријата на државата во однос на општествената различност, како можеме да ја направиме нашата држава така што секој граѓанин ќе ја чувствува на ист начин и еднакво ќе се ангажира за нејзиниот успех – изјави Гаши.

Гаши, изрази уверување дека ова треба да биде суштината на 35-годишнината и во тој дух, „повика да ја градиме иднината со повеќе одговорност, со повеќе доверба и со повеќе работа“.

– Среќен 8 Септември и честита 35-та годишнина на Републиката – порача Гаши.

The post ДРЖАВАТА СЕ ГРАДИ СЕКОЈ ДЕН СО ОДГОВОРНОСТ, ПРАВДА И СО ВЕРБА ВО НЕА Патриотизам е создавање можности за младите appeared first on plusinfo.mk.

Одбележувањето на Денот на независноста е можност да се потсетиме на патот што го изминавме како држава, но и на одговорноста што ја имаме кон иднината, порача министерот за правда Јетон Шасивари на приемот организиран од претседателот на Собранието, Африм Гаши, по повод 8 Септември.

„Во таа насока, јакнењето на владеењето на правото, независноста на институциите и заштитата на правата на граѓаните остануваат клучни за градењето стабилно и праведно општество. 8 Септември е ден кога ја славиме слободата да ја определуваме сопствената иднина, но и да се потсетиме дека секоја генерација има обврска да ја направи посилна, поправедна и подобра за оние што доаѓаат по нас. Да ги чуваме темелите на нашата независност и секојдневно да создадаваме институции во кои граѓаните имаат доверба“, порачал министерот, соопшти Министерството за правда.

The post ДЕН КОГА ЈА СЛАВИМЕ СЛОБОДАТА ДА ЈА ОПРЕДЕЛУВАМЕ СОПСТВЕНАТА ИДНИНА Владеењето на правото останува клучно за стабилно општество appeared first on plusinfo.mk.

Сите закони за кои е потребно Бадентерово мнозинство ќе бидат ставени на гласање, соопшти претседателот на Собранието Африм Гаши денеска на брифинг со новинарите и додаде дека не знае каков ќе биде исходот поради процедуралната блокада на опозициската ДУИ.

Закони за кои е потребен Бадентер односно што се од особен интерес се законот за правична застапеност, за високо образование, за локална самоуправа и други.

– Ова прашање има повеќе политичка димензија отколку процедурална. Во својство на претседател на Собранието се обидувам ги преземам сите мерки. Јас сум во контакт со сите пратенички групи. Се обидуваме да дојдеме до решение. Ако прашањето навлегува во политичката сфера тогаш на друго политичко ниво се разговара. Се согласувам дека ова прашање треба да се реши, но оставам на политичките актери да го решат – рече Гаши.

На денешната координативна средба присуствувал заменик-координаторот на пратеничката група на ДУИ, но немало никаква најава дека повторно ќе има блокада од страна на нивните пратеници.

– Тоа не е блокада, туку злоупотреба на Деловникот, но ќе видиме како ќе реагираат – рече Гаши.

Во однос на тоа дали доколку блокадата продолжи ќе има предвремени парламентарни избори, рече дека вакви избори ќе има кога 61 пратеник ќе одлучат за распуштање на Собранието, но нагласи дека тој е поборник на идејата за редовни парламентарни избори и нема да дозволи злоупотреба на Деловникот да предизвика парламентарни избори.

Гаши најави дека наскоро во Собранието ќе пристигне законско решение поврзано со барањата правосудниот испит да се полага и на албански јазик.

Во следните месеци пристапот во околината на Собранието ќе биде отежнат поради градежните работи поврзани со изградбата на паркингот за пратениците и за вработените.

The post ГАШИ ЈА ОБВИНИ ДУИ ЗА ЗЛОУПОТРЕБА НА ДЕЛОВНИКОТ ВО СОБРАНИЕТО Каков ќе биде исходот за законите за кои треба Бадентер? appeared first on plusinfo.mk.

Со денешната работна сесија на Советот на амбасадорите, на која ќе се обрати претседателот на Собранието, Африм Гаши, пратениците по августовската пауза повторно се враќаат со собраниски активности. Првата пленарна седница по летниот одмор е закажана за 2 септември.

На собраниската веб-страница за 25 август се најавени и две средби на претседателот на Собранието, Африм Гаши – со турскиот амбасадор Фатих Улусој и со постојаната координаторка на ОН, Рита Колумбија.

Од Кабинетот на Гаши посочуваат дека претседателот на Собранието континуирано ги извршува своите работни обврски и покрај тоа што пратениците официјално се на летна пауза.

На 121. седница, закажана за 2 септември, на дневен ред се 53 точки. Меѓу нив се и именувањето вицегувернер на Народната банка, повеќе ратификации, како и Предлог-законот за пријавување и проверка на странски директни инвестиции, во прво читање.

Пратениците треба да ја разгледаат и Предлог-националната стратегија за безбедност на сообраќајот на патиштата за периодот 2026–2030 година.

На дневен ред се и повеќе предлог-закони по скратена постапка, главно поврзани со усогласувања со новиот Закон за високи раководители.

Редовната летна пауза во Собранието започнува на 1 август. Сепак, дел од пратениците имаат активности и во текот на летниот период, вклучително и за одбележувањето на националниот празник Илинден на 2 август.

The post ПРАТЕНИЦИТЕ СЕ ВРАЌААТ ВО СОБРАНИЕТО, НА 2 СЕПТЕМВРИ ГИ ЧЕКААТ 53 ТОЧКИ Гаши сподели што ќе е на дневен ред appeared first on plusinfo.mk.

Во безбедносната зона околу Собранието се гради паркингот кој ќе биде наменет за возилата на пратениците и службениците. Претседателот на Собранието Африм Гаши изврши увид во работите.

– Одблиску го следев текот на градежните работи за уредување на просторот околу Собранието. Овој простор добива поуреден и пофункционален изглед, создавајќи подобри услови за паркирање и за секојдневните потреби на Собранието. Продолжуваме со конкретна работа и со внимание кон секој простор што придонесува за поефикасно функционирање на Собранието – објави Гаши.

За уредување на просторот и изградба на паркингот ќе бидат потрошени 101.951.456 денари (околу 1,6 милиони евра). Собранието  склучи договор за набавка на опрема и партерно уредување на безбедносна зона со фирмата „Стентон градба“ ДОО од село Долно Оризари, Битола.

Според договорот, на просторот треба да се отстрани постојниот асфалт, да се постават гранитни плочки, да се изведат патеки и паркинг места, да се засадат дрвја и да се постави урбана опрема и осветлување. Треба да направи нова портирница и да се набави и постави систем за влез и излез од паркингот.

Првиот план беше на просторот да има катна гаража висока 9 метри, а 15 отсто од објектот да биде деловен простор, продавници или угостителски објекти. Потоа во Собранието се донесе Закон за прогласување на просторот околу Собранието за безбедносна зона, со што се забрани таква градба и беше најавено дека фирмата која го купила земјиштето ќе биде обесштетена.

The post СЕ ГРАДИ ПАРКИНГОТ ОКОЛУ СОБРАНИЕТО Гаши го следи одблиску уредувањето на безбедносната зона appeared first on plusinfo.mk.

Охридскиот рамковен договор ги постави мирот, дијалогот и еднаквоста во основата на градењето одржливо општество. Нашата одговорност денес е да се надоврземе на неговите поуки и да ги преточиме во одржливи стандарди на демократијата и соживотот, порача претседателот на Собранието Африм Гаши, по повод одбележувањето на 25-годишнината од договорот.

„Денес, одбележувајќи ја годишнината од Охридскиот рамковен договор, се потсетуваме на еден од најважните моменти во современата историја на Република Северна Македонија. Овој договор беше политички и институционален одговор на криза што бараше одговорност, дијалог и визија за иднината. Пред сè, тој ги постави мирот, дијалогот и еднаквоста во основата на градењето одржливо општество. Дваесет и пет години подоцна, неговата важност мора да се гледа подалеку од политичките разлики и секојдневните толкувања. Охридскиот договор останува важен столб на уставната и институционалната архитектура на нашата држава. Нашата одговорност денес е да се надоврземе на неговите поуки и да ги преточиме во одржливи стандарди на демократијата и соживотот“ се наведува во соопштението од Гаши.

Македонија е заеднички дом за сите нејзини граѓани, а нејзината сила не лежи во разликите што нè делат, туку во способноста да ги претвориме во заеднички вредности, додаде претседателот на Собранието.

„По четвртина век, прашањето што мора да си го поставиме повеќе не е што сме постигнале, туку што останува на идните генерации, државата што ја сакаме. Затоа, нека оваа годишнина биде заедничка обврска: денешната политичка генерација и институции го зачувуваат мирот преку дијалог, ја зајакнуваат еднаквоста и го градат соживотот преку дела. Нека секоја идна генерација го наследи Охридскиот договор како пресвртница во историјата и како жива вредност на државата. Додека граѓаните се тие што имаат сила да го живеат секој ден“, порача претседателот на Собранието Африм Гаши.

The post ОХРИДСКИОТ ДОГОВОР ГИ ПОСТАВИ МИРОТ, ДИЈАЛОГОТ И ЕДНАКВОСТА ВО ТЕМЕЛИТЕ НА ОПШТЕСТВОТО По четврт век, останува столб на уставната архитектура на државата appeared first on plusinfo.mk.

Претседателот на Собранието, Африм Гаши информира дека денеска ја потпишал одлуката за распишување предвремени избори за градоначалник на Општина Брвеница, кои ќе се одржат на 18 октомври.

– Денес, во согласност со Уставот, Изборниот законик и важечките закони, ја потпишав одлуката за распишување предвремени избори за градоначалник на Општина Брвеница, кои ќе се одржат на 18 октомври 2026 година. Очекувам од Државната изборна комисија, Општинската изборна комисија на Брвеница и од сите органи задолжени за спроведување на оваа одлука, изборниот процес да го спроведат професионално, непристрасно и со целосно почитување на законот и процедурите – напиша Гаши на својот профил на Фејсбук.

Тој ги повика сите кандидати и политички субјекти изборната кампања да ја водат достоинствено, натпреварувајќи се со програми, идеи и визија за развојот на општината, а не говор што потикнува поделби или постапки што ја нарушуваат довербата на граѓаните во демократскиот процес.

– Ги повикувам граѓаните на Брвеница да учествуваат на изборите и одговорно да го остварат своето демократско право, придонесувајќи кон мирен, уреден и кредибилен изборен процес што ќе го одреди идниот правец на развој на нивната општина. Убеден сум дека овие избори ќе ја потврдат демократската зрелост на институциите и на нашите граѓани – посочува Гаши во објавата.

Ова одлука следи откако на 23 јуни, годинава почина градоначалникот на Општина Брвеница, Јовица Илиевски. Функцијата в.д. градоначалник ја врши Роберт Милошески.

The post ИЗБОРИ ЗА ГРАДОНАЧАЛНИК ВО БРВЕНИЦА НА 18 ОКТОМВРИ Гаши ја потпиша одлуката appeared first on plusinfo.mk.