Државната комисија за спречување на корупцијата (ДКСК) го објави Каталогот на подароци за избрани и именувани лица за 2025 година, во согласност со законските обврски и принципите на транспарентност и отчетност во јавниот сектор.

Каталогот овозможува јавен увид во податоците за пријавените подароци и придонесува кон поголема отвореност на институциите, како и кон зајакнување на довербата на јавноста во нивното работење.

„Објавувањето на каталогот претставува значаен дел од системот на институционален интегритет, имајќи предвид дека пријавувањето на подароци е еден од клучните механизми за превенција од судир на интереси и за зајакнување на етичкото постапување на носителите на јавни функции“, се наведува во соопштението од ДКСК.

Антикорупционерите укажуваат дека навременото и целосно пријавување на подароци од страна на службените лица е важен показател за нивниот интегритет и одговорност, како и за доследна примена на законската рамка.

Во делот на поднесоци за подароци од јавни лица има вкупно 55 ставки, од кои најмногу пријавиле главниот државен ревизор, Максим Ацевски и претседателот на Собранието Африм Гаши.

Ацевски пријавил најмногу сувенири – рамка со народна носија, украсна паричка, украсен брод, керамички сувенир, декоративна стаклена вазна…

Гаши го пријавил како подарок објектот Совет Шура, потоа златен меч во рамка, бисер поставен во златна школка, рачно цртана порцеланска вазна, скулптура „глава на коњ“, златна и сребрена монета…

Во делот на поднесоци за подароци од вработени има пријавено 12 ставки. Раководител на сектор во Дирекција за технолошки индустриски развојни зони пријавил подарок вино KARTAL VRANEC 0,75 l, тефтер и подлога за мауспад со лого на дарителот, додека советник во Државно правобранителство на Република Северна Македонија пријавил подарок книга во вредност од 300 денари.

Државен архив на Република Северна Македонија пријавил подарок три клима уреди во вредност од 68.000 денари, додека од Национална установа Центар за култура „Браќа Миладиновци“ – Струга вработен пријавил подарок украсен предмет – акрил на дрво во вредност од 9.000 денари.

Каталогот е јавно достапен на следниот линк.

The post НА ГАШИ И НА ГЛАВНИОТ РЕВИЗОР АЦЕВСКИ ЌЕ ИМ ТРЕБА МУЗЕЈ ЗА ПОДАРОЦИТЕ Златен меч, вазни, бисери, монети – што пријавиле како подарок appeared first on plusinfo.mk.

Проширувањето треба да остане процес базиран на заслуги, но да не биде попречен од краткорочни политички пресметки. Aко стандардите се исти, тогаш и третманот треба да биде ист, истакна претседателот на Собранието Африм Гаши, на меѓународната конференција „Западен Балкан во вртлогот на новата геополитика на безбедноста“ во Љубљана –

– Да бидеме искрени дека земјите од Западен Балкан денес се во многу аспекти подобро подготвени од некои земји што се зачленија на претходните бранови на проширувањето. Оваа реалност заслужува да се препознае во политичкото одлучување и да се одрази во пофер пристап. Во овој случај Западен Балкан не е периферија што треба да се остави да чека, туку дел од Европа што се стреми да се комплетира – рече Гаши.

Тој верува дека похрабaр пристап би бил непосредната интеграција на сите шест земји од Западен Балкан како заеднички пакет.

– Колку побрзо станеме дел од ЕУ толку побрзо ќе се консолидираат демократските стандарди, ќе се зајакне владеењето на правото и ќе се решат билатералните прашања што во моментов го попречуваат напредокот. Историјата на самите европски земји покажа дека интеграцијата е најефикасниот инструмент за помирување и стабилност – рече Гаши.

Сепак, додаде тој, нашиот пат во оваа насока не беше линеарен и беше проследен со искушенија кои честопати ги надминуваа самата логика и критериумите на процесот за членство.

– Како што знаете, билатералните прашања оставија длабоки траги во темпото на нашата интеграција. И сепак, ние избравме дијалог наспроти конфликтот и компромис наспроти стагнацијата – рече тој.

Претседателот на Собранието рече дека денес се соочуваме со замор од проширување во рамките на Европската Унија, но во исто време, замор од стагнација кај земјите-кандидати.

– Овој јаз во кредибилитетот ризикува да создаде „постојана чекална“, што не само што ги обесхрабрува реформите, туку и ја поткопува довербата на граѓаните во европскиот проект; што за мене е поопасно – нагласи тој.

Во овој контекст, посочи дека е „важно да се биде искрен за две прашања: Дали ЕУ навистина сака проширување? И, колку е вистинската волја на земјите-членки за проширување. Бидејќи, како што рече, проширувањето, во суштина, е договор за доверба што бара одговорност и храброст од двете страни.

Како што соопшти собраниската прес-служба, настанот се одржува во присуство на истакнати политички и институционални личности од Европа, регионот и пошироко, вклучувајќи поранешни шефови на држави, високи претставници на ЕУ, како и специјални пратеници за Западен Балкан.

The post ЗЕМЈИТЕ ОД БАЛКАНОТ ВО МНОГУ АСПЕКТИ СЕ ПОПОДГОТВЕНИ ЗА ЕУ ОД НЕКОИ ЗЕМЈИ-ЧЛЕНКИ Спикерот Гаши побара пофер пристап при проширувањето appeared first on plusinfo.mk.

Претседателот на Собранието Африм Гаши утре ќе се сретне со досегашните претседатели на законодавниот дом.

Како што нагласи, неговата идеја за ваква средба била за да се искаже почит кон нив, но и тие да ги пренесат своите искуства.

– Веќе имавме една средба, помеѓу првиот и вториот изборен круг. Идејата беше моја, да најдеме начин како да го искористиме искуството на поранешните претседатели на Собранието. Мислам дека тоа е бесценето искуство, кое за секој актуелен претседател на Собранието би било добро да го искористи. Како идеја ја искажав на тој состанок и видов дека сите поранешни претседатели беа согласни. На првата средба не дојдоа само Талат Џафери и Јован Митрески. Присуствуваа четворица поранешни претседатели. Не е нешто задолжително. Тоа е по нивна волја. Сите се поканети на средба, а утре ќе видиме кој ќе дојде. Ќе разговараме како тоа би го формализирале, да биде советодавно тело – рече Гаши.

Идејата има две компоненти, додаде тој,  првата е да се искаже почитта кон нив, а втората е да се искористи нивното искуство.

– Ние и тој ден кога разговаравме, увидовме дека некои проблеми со кои тие се соочувале ги имаме и ние денеска – рече тој.

Гаши истакна дека слабо се користат искуствата на поранешните функционери, без разлика дали се претседатели на државата, премиери или пратеници. Неговата намера е овие средби да станат редовна пракса најмалку трипати во годината, но по потреба да може да се одржуваат и ад хок.

– Ние можеме да имаме идеолошки и партиски разлики, но кога сте вршеле таква битна функција, тогаш тоа е над идеологиите и политичките разлики. И тоа искуство што сте го стекнале не можете да го чувате само за себе. Тоа искуство треба да го пренесеме и да најдеме начин како да го употребиме – рече тој.

The post ГАШИ ИНИЦИРА ФОРМИРАЊЕ СОВЕТОДАВНО ТЕЛО ОД ПОРАНЕШНИ ПРЕТСЕДАТЕЛИ НА СОБРАНИЕТО Не се користат доволно искуствата на поранешните функционери appeared first on plusinfo.mk.

Не е битно дали ќе биде нов Изборен законик или изменет, туку е битно да имаме добар Изборен законик, рече претседателот на Собранието, Африм Гаши, на денешниот редовен брифинг за случвањата во законодавниот дом.

– Работната група за Изборниот законик в среда ќе има нов состанок. Работат интензивно. Се надеваме дека ќе дојдат до решение. Мое мислење е дека треба да имаме добар Изборен законик. Не е битно дали е нов или изменет. Не е битно како ќе дојдеме до тоа. Битно е да имаме добар, кредибилен, со фер правила на игра, каде што сите би се чувствувале еднакви пред законот – рече Гаши.

Гаши информира дека денеска или утре ќе биде објавен огласот за избор на член на Судскиот совет, кој претходно беше поништен.

Соопшти и дека е воспоставена нова практика пратениците да се вклучат директно на Собранискиот канал пред почнувањето на пратеничките прашања.

– Ги информирав сите пратенички групи да бидат во тек, да соработуваат со Собранискиот канал. Мислам дека ова е во интерес на граѓаните, да бидеме достапни и да го развиеме и Собранискиот канал во делот на гледаноста на Собранието – рече тој.

На новата собраниска седница закажана за 8 април на дневен ред ќе биде поставување пратенички прашања од опозициските пратеници.

Поради велигденските празници, како што информира Гаши, на координацијата со координаторите на пратеничките групи разговарале в среда да бидат свикани седниците на комисиите, а в четврток да не работат пратениците.

The post БИТНО Е ДА ИМАМЕ ДОБАР ИЗБОРЕН ЗАКОНИК, НЕ Е БИТНО ДАЛИ ЌЕ БИДЕ НОВ ИЛИ ИЗМЕНЕТ Работната група интензивно работи на решението appeared first on plusinfo.mk.

Африм Гаши, претседател на Собранието на Република Северна Македонија, од лично име и од името на Собранието, им го честита Велигден на сите верници кои го слават Христовото воскресение според католичката традиција.

„Овој празник носи пораки на надеж, љубов, мир и духовна обнова. Во денови кога се потсетуваме на значењето на меѓусебното почитување, солидарноста и добрината, упатувам искрени желби празничните денови да бидат исполнети со здравје, спокој, радост и благосостојба.

Нека велигденските празници бидат поттик за зацврстување на довербата, разбирањето и заедништвото, како вредности што нè обединуваат во градењето на подобра иднина за сите граѓани. Честит Празник!“ – се вели во честитката на претседателот на Собраниаето Африм Гаши.

The post ВРЕДНОСТИТЕ НА ВЕЛИГДЕН НЕКА НЀ ОБЕДИНАТ ВО ГРАДЕЊЕТО ПОДОБРА ИДНИНА Велигденска честитка од претседателот на Собранието Африм Гаши appeared first on plusinfo.mk.

Прашањето за воведување „Уставна жалба“ и евентуални измени на Уставот е чисто политичко прашање за кое е потребен консензус од две третини од пратениците, смета претседателот на Собранието, Африм Гаши.

– Ова е сензитивно прашање. Штом ќе се отвори Уставот, секој сака да ја постигне својата политичка цел. Тоа може да доведе до правење поголем проблем отколку корист. Не мислам дека Уставот треба да се отвора ад-хок. Ако сакаме подлабока реформа, не треба да се отвора парцијално, туку преку поширока политичка и општествена дебата. Знаете дека во Собранието треба двотретинско мнозинство од пратениците за да се договорат да го отворат Уставот. Сега не би коментирал, би оставил политичките партии да донесат одлука за тоа кога е потребно да се направи и околу кои прашања – истакна Гаши на денешниот брифинг со новинарите.

Во однос на дебатите за примена на Бадентеровиот принцип во Уставниот суд, тој рече дека на тоа треба да се гледа и од политичка и од експертска димензија, без ништо, како што посочи, да не се пречекува на нож, но со фокус на основната улога на Судот.

– Во однос на воведување „Бадентер“ во Уставниот суд, можам да кажам дека сепак тоа не треба да биде табу тема. Треба да се разговара, но од два аспекта според мене – од аспект на политичка димензија и од професионален аспект. Треба да го имаме предвид фактот дека Уставниот суд треба да ја одигра својата улога како што му е пропишана во Уставот, а тоа е да го брани Уставот и уставноста при донесувањето на законите во државата. Затоа не треба да имаме предрасуди кон темите кои водат кон квалитетно одлучување. Пред сè треба да имаме на ум каков Уставен суд сакаме да имаме – таков што ќе биде во најдобра можна ситуација да одлучува во однос на заштитата на Уставот и уставноста на законите во државата – рече Гаши.

Тој информира дека Собранието работи максимално експедитивно на реформската агенда и досега нема застој во гласањето на законите што пристигнуваат во архивата. Според него, брзината на процесот зависи од капацитетите на министерствата и комуникацијата со Европската комисија.

– Собранието работи експресно на реформската агенда. Процесот е посложен бидејќи министерствата ги изготвуваат законите, ги праќаат во ЕК на сугестии, па ги инкорпорираат забелешките пред да стигнат кај нас. Штом ќе се достават во Собранието, ние ги решаваме многу ефикасно. Моментално во Собранието имаме два закона – едниот за јавни обвинители, другиот за Советот на јавни обвинители. Очекуваме од Владата набрзо да дојдат повеќе закони, бидејќи знам дека таму се работи интензивно и има зголемен фокус во однос на ова прашање. Очекуваме дека во текот на годинава ќе имаме поголема ефикасност во однос на носење на законите од реформската агенда – рече Гаши.

Изнесувајќи го, како што кажа, својот личен став како дел од коалицијата, а не како претседател на Собранието, тој истакна дека кадровските решенија во извршната власт ќе бидат предмет на разгледување откако ќе заврши процесот на внатрешно окрупнување на коалицијата.

– Коалицијата Вреди се наоѓа во финална фаза на воспоставување на една политичка партија. Штом ќе се финализира овој процес, тогаш партиските органи ќе решаваат за своите претставници во извршната и во сите други гранки на власта. Во овој момент не треба да прејудицираме дали некој е прифатлив или не – одговори Гаши на прашањето за статусот на министрите Арбен Фетаи и Фатмир Лимани.

Во однос на тоа дали во Собранието се дискутира за нови пратенички групи или нови политички движења, Гаши нагласи дека не е известен за такво нешто.

– Кога кој пратеник или пратеничка група ќе се изјасни поинаку, го информира претседателот на Собранието, а јас ги информирам сите пратеници и јавноста. Така што, во моментот кога ќе бидам известен, ќе биде известена и јавноста околу секакви промени во пратеничките групи во Собранието – рече Гаши.

Претседателот на Собранието изрази оптимизам дека долгогодишниот проблем со паркирањето околу законодавниот дом ќе биде решен до крајот на 2026 година. Веќе е објавена постапка за партерно уредување на катната гаража.

– Процедурата трае 30 дена. Ако сѐ биде во ред, очекуваме во мај да почнат работите на терен, а до крајот на годината објектот да биде во функција – информираше Гаши.

Тој соопшти дека еден член за Судскиот совет е повлечен бидејќи комисијата констатирала дека не ги исполнува условите, поради што ќе биде распишан нов конкурс. На 8 април се очекува пратениците да одлучуваат за новите вицегувернери, додека предлогот за нов уставен судија сѐ уште не е пристигнат.

The post ГАШИ СМЕТА ДЕКА УСТАВОТ НЕ ТРЕБА ДА СЕ ОТВОРА ПАРЦИЈАЛНО За отворањето треба да одлучат политичките партии appeared first on plusinfo.mk.

Претседателот на Собранието Африм Гаши, по повод големиот муслимански празник Рамазан бајрам, упати честитка до верниците од исламска вероисповед со желби за добро здравје, мир, радост и благосостојба.

„Почитувани граѓани од исламска вероисповед, дозволете ми по повод големиот празник Рамазан Бајрам, од мое лично име и од име на Собраниет, да Ви упатам искрени честитки и најтопли желби за добро здравје, мир, радост и благосостојба“, се вели во честитката од Гаши.

По деновите на пост, молитва, солидарност и духовна посветеност, Рамазан бајрам нè потсетува на трајните вредности на хуманоста, меѓусебната почит, разбирањето и помагањето.

„Овој голем празник носи порака за љубов, милосрдие и заедништво, вредности кои се од особено значење за градењето хармонично, праведно и достоинствено општество. Нека бајрамските денови Ви донесат спокој во домовите, радост во семејствата и надеж во срцата. Во духот на празникот, да продолжиме заеднички да негуваме соживот, толеранција и почитување, како темели на нашата заедничка иднина. Честит Рамазан Бајрам“, порача претседателот на Собранието, Африм Гаши.

The post НАЈТОПЛИ ЖЕЛБИ ЗА ЗДРАВЈЕ, МИР И БЛАГОСОСТОЈБА Честитка од претседателот на Собранието Гаши по повод Рамазан бајрам appeared first on plusinfo.mk.

По повод една година од трагедијата во дискотеката „Пулс“ во Кочани во Собранието денеска се одржува комеморативна седница, на која присуствуваа пратеници, министри, претседателот на Собранието Арфим Гаши, како и претседателката Гордана Сиљановска-Давкова и премиерот Христијан Мицкоски.

Пред присутните се обрати претседателот на Собранието Гаши.

– После една година се собравме да се потсетиме. Се собравме како никогаш до сега, не како власт и опозиција, туку како опшство кое беше длабоко повредено од оваа ужасна трагедија. Да им испратиме порака на семејствата дека во оваа болка не се сами. Бранот на оваа болка не зафати сите, донесе болка, но и солидарност.

Оваа седница е да се потсетиме, но и да размислиме. Трагедии како оваа ни покажуваат дека одговорноста на институциите е поголема отколку што проценуваме и дека правдата е поважна отколку што замислуваме. Затоа е важно институциите, Јавното обвинителство, судовите, Министерството за внатрешни работи и сите истражни органи да работат во овој процес со професионализам, независно и целосно транспарентно. Правдата не треба да биде пребрза, но ниту задоцнета. Само правдата и вистината може да донесат мал спокој за семејствата и за општеството. Точно и прецизно да се таргетираат виновниците за оваа трагедија. Ова исто треба да биде лекција дека спроведувањето на законот на нашата држава е обврска од која никој не е амнестиран.

Сепак, не сум на оваа говорница за да оправдувам некого ниту да демантирам гласини што неправедно се обидоа да ја искористат трагедијата за други цели и да фрлат сенка врз институциите. Тука сум за да потсетам дека трагедиите никогаш не треба да бидат поле на раздор. Тие треба да бидат моменти на солидарност, на хуманост и на сплотеност.

Затоа што, почитувани присутни, во тие денови видовме дека никој не добива ништо од поделбите. Во најтемните моменти на земјата ја видовме и најсветлата страна на нашето општество. Видовме како блеска силата на хуманоста, утехата што ја носи солидарноста и искрената поддршка.

Оваа трагедија е последниот аларм за сите политички и општествени чинители, да се вратиме кон самите себе и нашата човечност, да се издигнеме како поединци, за повторно да ја изградиме државата од почеток, но овој пат на темелите на правда и чесност – рече Гаши.

На 15 март лани во дискотеката „Пулс“ во Кочани дојде до пожар во кој животот го загубија повеќе од 60 лица, а повеќе од 200 беа повредени.

The post ТРАГЕДИИТЕ НЕ ТРЕБА ДА БИДАТ ПОЛЕ НА РАЗДОР, ТУКУ НА СОЛИДАРНОСТ И СПЛОТЕНОСТ Спикерот Гаши на комеморативната седница за пожарот во дискотеката „Пулс“ appeared first on plusinfo.mk.

Претседателот на Собранието, Африм Гаши, денеска изјави дека политиката не треба да се меша во судството и дека како прв човек на законодавниот дом нема да го коментира враќањето на Артан Груби во земјата, кој е поранешен вицепремиер од ДУИ осомничен за злоупотреби, и како тоа би се одразило врз опозициските партии, но и во коалицијата „Вреди“.

– Собранието и јас како негов претседател не е добро да коментирам политички одлуки, но она што сум го изјавил јавно и што е принципиелно и можам да го повторам е тоа дека е крајно време да престанеме да се мешаме во судството. Таа перцепција кај граѓаните дека има некаков договор остава лошо чувство кај сите граѓани, така што мојата порака би била, конечно, секоја институција да си ја врши својата работа, во овој дел судството и Обвинителството. Има процес, нека си ја вршат својата работа совесно и професионално. Тоа ќе биде доволно сите граѓани да бидат задоволени. На крајот на краиштата, битна е правдата – изјави Гаши.

Гаши, како што истакна, не мисли дека враќањето на Груби е политичка одлука.

– Немам никакви информации, не можам да тврдам нешто што не го знам – рече тој.

Дојдено е времето, според претседателот на Собранието, „сите да се свестиме дека немаме време веќе за губење за воспоставување на правната држава“.

– Ова е повик кон сите институции, актери во општеството, и судството и Обвинителството, и извршната и законодавната власт, ако секој си ја извршува својата работа професионално и совесно, мислам дека не е тешко да се дојде до тоа. Конечно, сите ние што сме повикани, вклучително и вие како новинари, за кои сметам дека сте битен фактор во општеството, ако сите работиме во една насока, мислам дека ќе постигнеме позитивни ефекти многу побргу – рече Гаши.

Според него, секоја институција треба да работи совесно и професионално и ако се водиме од овие два принципа, убеден е дека ќе имаме позитивни ефекти.

За утре е закажана седница на работната група за Изборниот законик во Министерството за правда и се очекува да биде избран нејзин претседател. Гаши информира дека во следните недели во Собранието би требало да пристигнат нови закони од реформската агенда.

– Интенцијата е работата да биде динамична и што побргу да имаме Изборен законик што би бил прифатлив за сите инволвирани страни во изборниот процес. Што се однесува до реформската агенда, очекуваме деновиве да видиме кои се законите што се планираат да се достават од страна на Владата за Собранието да биде спремно и да направи календар и предвидливост во процесот на носењето на овие закони од реформската агенда – рече Гаши.

Во однос на Кривичниот законик, претседателот на Собранието рече дека неформално е информиран оти ќе има нов Кривичен законик, но нема информација кога ќе биде доставен до нив.

The post ГАШИ НЕМА ДА ГО КОМЕНТИРА ВРАЌАЊЕТО НА ГРУБИ Битна е правдата, судството и Обвинителството да си ја завршат работата appeared first on plusinfo.mk.

Со 63 гласа „за“, седум „против“ и без ниту еден воздржан, Собранието денеска го избра Гоце Наумовски за нов уставен судија.

По изборот, Наумовски даде и потпиша свечена изјава во Собранието, со која се обврза дека функцијата ќе ја извршува совесно и одговорно и дека ќе ги почитува Уставот и законите.

Без расправа, со 68 гласа „за“ и без ниту еден глас „против“ или „воздржан“, пратениците на денешната 85. седница ја донесоа и Одлуката за давање овластување за склучување поединечен колективен договор, поднесена од претседателот на Собранието, Африм Гаши.

Кликбајт наслови (7 варијанти)

The post ГОЦЕ НАУМОВСКИ Е НОВ УСТАВЕН СУДИЈА Одлуката за новиот член ја поддржаа 63 пратеници appeared first on plusinfo.mk.