Инцидент во скопски Аеродром завршил со физички напад меѓу малолетници и вмешување на возрасно лице, по што случајот е пријавен во полиција и се расчистува под надзор на обвинител за малолетници.

Според информациите, сè се случило на 16 мај околу 22:30 часот пред продажно место во трговски центар во Аеродром, кога 16-годишник бил нападнат од негов врсник. Напаѓачот, како што е пријавено, употребил тврд предмет во нападот.

Во обид да го спречи инцидентот, се вмешал 25-годишниот М.Д. од Скопје, кој се обидел да го одбрани нападнатиот малолетник, но и самиот бил физички нападнат од истиот 16-годишник.

Следниот ден, случајот бил пријавен во полиција од повеќе лица – меѓу кои и мајката на нападнатиот малолетник, 36-годишната М.Б., како и 25-годишникот кој бил директно вклучен во инцидентот.

Од полицијата информираат дека за настанот е известен јавен обвинител за малолетници и се преземаат мерки за целосно расчистување на случајот.

The post МАЛОЛЕТНИК НАПАДНАЛ ВРСНИК СО ТВРД ПРЕДМЕТ, НО И ВОЗРАСЕН МАЖ Тензично во Аеродром, јавен обвинител вклучен во случајот appeared first on plusinfo.mk.

Две момчиња наводни биле снимени како лежерно крадат велосипед од пред фитнес клуб во скопската населба Аеродром.

Снимката ја објави граѓанин во група на Фејсбук, а ја пренесоа медиумите.

The post 📽️ УКРАДОА ВЕЛОСИПЕД СРЕДЕ БЕЛ ДЕН ВО АЕРОДРОМ Снимка разоткри две момчиња пред фитнес клуб appeared first on plusinfo.mk.

Наставничка била физички нападната за време на родителска средба во основно училиште на подрачјето на Општина Аеродром во Скопје.

Според пријавата во полицијата, инцидентот се случил попладнето во училница, додека наставничката заедно со колешка одржувала родителска средба. Во еден момент, мајка на ученик физички ја нападнала наставничката.

Случајот бил пријавен во полиција во вечерните часови, а надлежните преземаат мерки за утврдување на сите околности и расчистување на настанот.

The post МАЈКА НАПАДНА НАСТАВНИЧКА НА РОДИТЕЛСКА Инцидент во училиште во Аеродром appeared first on plusinfo.mk.

Три угостителски објекти во скопската населба Аеродром ќе се соочат со кривични пријави откако полицијата открила дека служеле алкохол на малолетници.

Во текот на продолжениот викенд од 19 до 22 март, полицијата спровела засилени контроли на подрачјето на Аеродром и Драчево. Во акцијата биле проверени вкупно 12 угостителски објекти, а во три од нив биле затекнати малолетници кои консумирале алкохол.

Според информациите од полицијата, по целосно документирање на случаите, против одговорните ќе бидат поднесени кривични пријави за „точење алкохол на малолетници“.

Контролите биле насочени кон спречување на ваквите појави, кои се меѓу почестите прекршоци во угостителските објекти, особено за време на викенди и на празници.

The post МАЛОЛЕТНИЦИ ФАТЕНИ СО АЛКОХОЛ ВО КАФУЛИЊА Три локали во Аеродром заработија кривични пријави appeared first on plusinfo.mk.

Македонските државјани кои беа евакуирани од Израел поради воениот конфликт на Блискиот Исток вечерва се очекува да пристигнат во Скопје. Според информациите од Министерството за надворешни работи и надворешна трговија, авионот со патниците, кои се враќаат преку Египет, треба да слета на Меѓународниот аеродром Скопје околу 20 часот.

На аеродромот евакуираните граѓани ќе ги пречека заменик-министерот за надворешни работи и надворешна трговија, Зоран Димитровски.

Од ресорното министерство информираат дека процесот на враќање на македонските државјани од регионот продолжува и во наредните денови. Според нивните податоци, досега 505 македонски граѓани се обратиле за помош до Амбасадата на земјава во Абу Даби, 31 лице во Кувајт, 14 во Бахреин и 141 лице во Доха.

Од Министерството посочуваат дека се подготвува и следната фаза од евакуацијата.

„Во следните денови се очекува да започне реализацијата на враќањето на македонските државјани од Обединетите Арапски Емирати, како и на граѓаните кои се наоѓаат во Катар, Бахреин и Кувајт, за кои е предвидено враќање со организирани летови преку Кралството Саудиска Арабија. Процесот на евакуација се реализира согласно веќе разработен план, во согласност со безбедносните услови и во координација со надлежните институции“, информираат од Министерството.

Оттаму апелираат до сите македонски државјани кои се наоѓаат во погодените подрачја, а сè уште не стапиле во контакт со дипломатско-конзуларните претставништва, да го направат тоа во најкраток можен рок.

Граѓаните кои имаат потреба од помош можат да се јават на дежурните телефонски броеви во дипломатско-конзуларните претставништва или преку СОС-бројот на Министерството за надворешни работи и надворешна трговија.

The post МАКЕДОНЦИТЕ СЕ ИЗВЛЕКУВААТ ОД КРИЗНИОТ РЕГИОН Првата група евакуирани од Израел вечерва пристигнува во Скопје appeared first on plusinfo.mk.

Вицепремиерот и министер за транспорт Александар Николоски објави дека се воспоставени 22 нови авио-рути кои ја поврзуваат земјава со повеќе европски дестинации.

На својот фејсбук профил, Николоски сподели мапа со новите линии од двата домашни аеродроми, нагласувајќи дека развојот на авиосообраќајот продолжува со засилено темпо.

— Силно се развива авиосообраќајот во Македонија. Отворени се 22 нови рути кои ја поврзуваат Македонија со цела Европа. Аеродромите во државата, со сè поголем број патници, стануваат лидери во регионот. Продолжуваме во периодот што следи со уште повеќе активности за зајакнување на авиосообраќајот — напиша Николоски.

Засега нема детали за сите дестинации поединечно, но од ресорот најавуваат дека целта е зголемување на поврзаноста на земјата и поттикнување на туристичкиот и економскиот раст.

The post МАКЕДОНИЈА СЕ ПОВРЗУВА СО ЕВРОПА Нови 22 летови од двата аеродроми appeared first on plusinfo.mk.

Меѓународниот Аеродром Скопје и оваа година ја доби престижната награда за квалитет на аеродромските услуги (ASQ) за 2025-та година за „Најпријатно аеродромско искуство во Европа“ од Меѓународниот совет на аеродроми(ACI), соопшти ТАВ Македонија.

Наградата која скопскиот аеродром ја добива по 11 пат е уште едно признание од патниците во заминување кои што ги пополнуваа анкетите за задоволство од квалитетот на аеродромските услуги, преку кои се мерат клучните индикатори како што се ефикасноста на пријавувањето на патници и багаж (чекирањето), безбедносната проверка, снаоѓањето низ аеродромот, како и целокупната леснотија при движење низ аеродромот.

Ова континуирано меѓународно признание е уште еден доказ за посветеноста на вработените на аеродромот кон квалитетот на услугите, грижата за патниците и постојаното унапредување на стандардите во работењето. А наградата, која се темели на оценките од патниците, покажува дека скопскиот аеродром ги исполнува нивните очекувања.

-Оваа награда, целосно заснована врз повратните информации од патниците преку програмата за квалитет на аеродромските услуги, го потврдува нашиот стратешки фокус на ефикасност, сигурност и патничко искуство. Во ТАВ Македонија, ние остануваме целосно посветени на обезбедување беспрекорно, висококвалитетно патување и континуирано подобрување на нашата работа – изјави Неџат Курт, генерален директор на ТАВ Македонија.

Џастин Ербачи, генерален директор на ACI World, изјави:

-Добивањето на ASQ наградата за квалитет на аеродромските услуги од ACI ја потврдува континуираната посветеност на Меѓународниот аеродром Скопје да ги слуша своите патници. Ова признание ја одразува вашата заложба за постојано унапредување и обезбедување исклучително патничко искуство за сите патници.

Меѓународниот Aеродром Скопје припаѓа во ASQ панел од 20 аеродроми, во категоријата аеродроми во Европа со големина од 2 до 5 милиони патници годишно. Покрај Меѓународниот Aеродром Скопје, другите аеродроми во овој панел се аеродроми во Италија, Шпанија, Португалија, Норвешка, Естонија како и уште два аеродроми управувани од ТАВ Аеродроми, аеродромот во Загреб и Тбилиси во Грузија.

Досега, за 2012, 2015, 2013 и 2018 Меѓународниот Аеродром Скопје ја доби ASQ наградата – Најдобар аеродром во Европа во големината до 2 милиони патници, додека за 2019, 2020, 2021, 2022, 2023 и 2024 аеродромот ја доби ASQ наградата, но во големина од 2 до 5 милиони патници годишно, врз основа на порастот на бројот на патници кој автоматски овозможи да се натпреварува со таа група на аеродроми во регионот на Европа.

The post СКОПСКИОТ АЕРОДРОМ ДОБИ УШТЕ ЕДНА МЕЃУНАРОДНА НАГРАДА ЗА КВАЛИТЕТ НА УСЛУГИТЕ Патниците му дадоа епитет „најпријатно аеродромско искуство во Европа“ appeared first on plusinfo.mk.

За празникот Водици во Скопје ќе има посебен режим на сообраќај, информира Министерството за внатрешни работи.

„На 19.01.2026 (понеделник) Единицата за безбедност на патниот сообраќај при СВР Скопје ќе воведе посебен режим на сообраќај за одредени сообраќајници во Скопје.

Во центарот на Скопје за сообраќај ќе биде затворена ул. Филип Втори Македонски на потегот од крстосницата со бул. Гоце Делчев до крстосницата со ул. 11 Октомври во двете насоки.

Во општина Ѓорче Петров за сообраќај ќе бидат затворени сообраќајницата од црквата Свети Петар и Павле, бул. Партизански Одреди до ул. Ѓорче Петров, ул. Ѓорче Петров до ул. Васил Чакаларов, како и од црквата Свети Пантелејмон, ул. Козле, дел од ул. Васил Чакаларов до Железничкиот мост на реката Вардар.

Во општина Аеродром за сообраќај ќе биде затворен локалниот пат кон Горно и Долно Лисиче.

СВР Скопје апелира со сите учесници во сообраќајот да ги прочитуваат наредбите кои ќе ги даваат униформираните полициски службеници“.

The post ПОСЕБЕН СООБРАЌАЕН РЕЖИМ ВО СКОПЈЕ ЗА ВОДИЦИ Ќе бидат затворени улици во центарот, во Ѓорче Петров и во Аеродром appeared first on plusinfo.mk.

Меѓународниот Аеродром Скопје, управуван од ТАВ Македонија, се стекна со  „Ниво 3″ акредитација за управување со емисии на јаглерод на аеродроми.

Сертификацијата на „Ниво 3″ – претставува потврда дека скопскиот аеродром ефикасно управува и ги намалува своите емисии на јаглерод, додека во исто време активно ги ангажира и своите партнери во нивното управување со емисиите на јаглерод.

Акредитацијата за управување со емисии на јаглерод ја дава Меѓународниот совет на аеродроми (Airport Council International – ACI) во рамките на нивната глобална програма за акредитација управување со емисии на јаглерод на аеродроми (Airport Carbon Accreditation – ACA).

Постојат  7 нивоа на сертификација: „Ниво 1″, „Ниво 2″, „Ниво 3″, „Ниво 3+”, „Ниво 4″, „Ниво 4+” и „Ниво 5″.

Обврска е аеродромите да постигнувате јаглеродна неутралност до 2030 година и нето-нулта емисии на јаглерод до 2050 година.

За да се постигне третото ниво, Меѓународниот Аеродром Скопје, соопштија оттаму,  спроведе низа значајни мерки, меѓу кои: имплементација на програма за енергетска ефикасност и мониторинг во согласност со меѓународните методологии, надградби на системите за осветлување на јавната и воздухопловната зона со високоефикасни LED инсталации, воведување програми за оптимизација и унапредување на енергетските перформанси на системите за греење, вентилација, климатизација, распоредување на хибридна аеродромска опрема и поддршка во транзицијата кон еколошки прифатлив возен парк.

The post СКОПСКИОТ АЕРОДРОМ ДОБИ СЕРТИФИКАТ „НИВО 3“ ЗА УПРАВУВАЊЕ СО ЈАГЛЕРОД За нула емисии треба да мине уште 4 нивоа appeared first on plusinfo.mk.

Одбележувајќи го Меѓународниот ден на волонтерството, 5 декември, и со цел промовирање на одржливоста и корпоративната општествена одговорност, ТАВ Македонија, подружница на ТАВ Аеродроми, членка на ADP групацијата, спроведува активности за садење дрвја во заедниците каде што работи – Општина Илинден и Општина Охрид.

Со активноста за садење дрвја во Општина Илинден, ТАВ Македонија вчера, 4 декември, ја започна својата традиционална зелена иницијатива „Садиме денес за одржливо утре“, која, како што велат од компанијата, има за цел да го зголеми бројот на нови дрвја во земјата и да придонесе за позелена средина во заедниците каде што работат двата македонски аеродроми – Меѓународниот Аеродром Скопје и Аеродромот Св. Апостол Павле Охрид.

Вработените на Меѓународниот Аеродром Скопје и на Општина Илинден, предводени од генералниот директор на ТАВ Македонија, Неџат Курт и градоначалникот на Општина Илинден, Александар Георгиевски, заеднички засадија 30 црвени сливи на просторот до основното училиште „Гоце Делчев“ во оваа општина, кои ќе го разубават местото планирано да се уреди како рекреативен парк за граѓаните на Илинден.

– Горд сум што втора година по ред ја спроведуваме нашата зелена иницијатива „Садиме денес за одржливо утре“ и што нашата стратешка цел кон одржливост се совпаѓа со зелените активности на Општина Илинден. Би сакал да им се заблагодарам на нашите вработени кои волонтираа и ни се придружија, како и на градоначалникот на Илинден и на вработените на Општината, со кои заеднички го дадовме нашиот придонес со секое засадено дрво. Нашите заеднички еколошки активности се симбол на нашата заедничка грижа за иднината. Со оваа акција, на Меѓународниот ден на волонтерството, 5 декември, покажуваме дека малите чекори водат до големи промени, кон почист воздух, позелени заедници и подобар живот за сите – изјави Неџат Курт, Генерален директор на ТАВ Македонија.

Од ТАВ Македонија велат дека нивната цел како општествено одговорна компанија е да придонесат за одржливост, особено во општините каде што работат двата аеродрома, со што ќе се подигне свеста за важноста на еколошката кауза и колективната грижа за природата.

Акцијата „Садиме денес за одржливо утре“ на ТАВ Македонија ќе продолжи во Охрид следната недела, каде што вработените на охридскиот аеродром ќе садат дрвја во оваа општина.

„Со донирање и садење дрвја во општините каде што работат Меѓународниот Аеродром Скопје и Аеродромот Св. Апостол Павле Охрид, ТАВ Македонија уште еднаш ја потврдува својата посветеност кон заедниците и животната средина, акција која станува традиција и преку која ќе продолжи да ја поддржува грижата за природата и проектите што создаваат трајни, позитивни промени во општеството“, порачува ТАВ Македонија.

The post ЗЕЛЕНА ИНИЦИЈАТИВА НА ТАВ АЕРОДРОМИ Втора година по ред вработените засадија дрвја во Илинден appeared first on plusinfo.mk.