Се поставуваат последните слоеви асфалт на потегот од Стара Рампа до семафорите кај Црвениот Крст, на еден од најзначајните, но и за мене особено важни инфраструктурни зафати во градот, булеварот Македонија, објави денеска градоначалникот на Град Скопје Орце Ѓорѓиевски на својот Фејсбук профил.

Ова, како што вели. е симбол на новото време со кое Скопје се гради и се развива. Работите се реализираа со засилена динамика, често и во ноќните часови – практика која продолжува и понатаму, како доказ за посветеноста и одлучноста овој град да се менува со конкретни дела.

-Проектот, кој со години беше оставен во застој, денес добива јасна насока, временска рамка и силна визија за современ урбан развој. Иако подземната сообраќајница како дел од третата фаза е веќе изградена, нејзиното целосно ставање во функција зависи од комплетирањето на сите фази – процес што веќе е во полн ек. Во рамки на првата фаза се изврши реконструкција и рехабилитација на постојниот коловоз, како и проширување на дел од сообраќајните ленти, со што значително се подобрува проточноста и функционалноста на сообраќајот. Проектот ги опфаќа булеварот Борис Трајковски (кај Рампа), улиците 11 Октомври и Пролет, како и крак од булеварот Македонија кој се поврзува со следните фази од трасата – вели Ѓорѓиевски.

Тој додава дека  улицата Пролет е проширена со дополнителна коловозна лента на потегот од полициската станица „Пролет“ до Тутунскиот комбинат, додека раскрсниците се уредени со нови сообраќајни острови, решенија што значително ја зголемуваат безбедноста на сите учесници во сообраќајот.

-Во текот на вечерните часови ќе се изврши и целосно обележување на коловозот, со што овој значаен потег ќе биде целосно подготвен за безбедно и функционално користење. Во наредните фази следува изградба на кружен тек кај „Нова Македонија“, уште два кружни текови на потегот меѓу булеварот Кочо Рацин и улицата Јордан Мијалков, како и проширување на булеварот Св. Кирил и Методиј, чекори кои ќе ја заокружат целината на овој значаен проект. Паралелно, се работи и на атмосферската канализација, со поставување на повеќе од 60 шахти и сливници – инвестиција која обезбедува долгорочна одржливост и отпорност на инфраструктурата – посочи Ѓорѓиевски.

Подземната сообраќајница ќе располага со 6 ленти, од кои 4 за двосмерен автомобилски сообраќај и 2 за јавен превоз, како и со пешачки патеки.

– Со нејзиното ставање во функција се очекува значително намалување на метежот за 33 отсто, побрзо движење низ централното градско подрачје и создавање побезбеден, поуреден и покомфорен урбан простор – вели Ѓорѓиевски.

The post СЕ ПОСТАВУВА ПОСЛЕДНИОТ СЛОЈ НА АСФАЛТ ОД СТАРА РАМПА ДО ЦРВЕН КРСТ Завршува првата фаза од големиот проект булевар Македонија appeared first on plusinfo.mk.