Абдул Ел Сајед, демократот кој го предизвика Доналд Трамп да седне на детектор за лаги, победи во трката за Сенатот во Мичиген. Лекарот и син на египетски имигранти го порази републиканецот Мајк Роџерс и ќе стане првиот муслимански сенатор во историјата на САД, објави Асошиејтед прес.

Снимката што се споделува на социјалните мрежи е од предизборен собир во Каламазу на 29 октомври. Ел Сајед му возврати на Трамп, кој неколку дена претходно на митинг во Порт Хјурон го нарече „џихадист“ и рече дека, ако биде избран, ќе мора да поминува низ детектор за метал пред да влезе во Сенатот. Ел Сајед ги отфрли обвинувањата дека има врски со екстремистички групи.

„Јас ќе поминувам низ детектор за метал секој ден. Ти седни еднаш на детектор за лаги. Тоа е договорот“, му порача Ел Сајед. Потоа рече дека првото прашање би му било за Џефри Епстин, а второто дали Трамп победил на претседателските избори во 2020 година, на кои загуби од Џо Бајден.

Ел Сајед порано ја водел службата за јавно здравје во Детроит, а досега немал функција добиена на избори. Во 2018 година загуби на внатрепартиските избори за демократски кандидат за гувернер на Мичиген. Во трката за Сенатот се залагаше за здравствено осигурување за сите и за ограничување на влијанието на парите од надворешни групи во изборните кампањи.

Во говорот пред поддржувачите во Детроит, Ел Сајед рече дека републиканците воделе една од најгрдите кампањи што ги памети. На Роџерс, кој во последната телевизиска дебата ја доведе во прашање неговата лојалност кон САД, му порача:

„Вие ја избравте омразата. Мичиген ја избра надежта“.

The post „ЈАС НА ДЕТЕКТОР ЗА МЕТАЛ, ТИ НА ДЕТЕКТОР ЗА ЛАГИ“ Ел Сајед му возврати на Трамп, па победи во Мичиген appeared first on plusinfo.mk.