ТИТАН Усје денес го одбележа двегодишниот јубилеј на едукативниот центар „Иноваториум – Клуб на напредни знаења и вештини“, преку кој учениците од основните училишта стекнуваат практични знаења и вештини од областа на 3Д моделирањето, 3Д печатењето, роботиката и инженерството.

На завршниот настан од втората година од програмата за 3Д печатење присуствуваа повеќе од 500 ученици од осум основни училишта од Општина Аеродром, директорите на училиштата, професорите, претставници од Општина Аеродром, Технолошко Металуршкиот Факултет и партнери на проектот.

Обраќајќи се пред присутните, главниот извршен директор Константинос Николаоу истакна дека програмата претставува значајна инвестиција во знаењето, љубопитноста и потенцијалот на младите генерации.

На настанот пред присутните се обрати техничкиот директор Љупчо Дончев, коj истакна дека преку обуките за 3Д печатење во „Иноваториум“ , учениците имаа можност да се запознаат со 3Д печатење, роботика и основи на инженерство, но уште поважно – да учат преку истражување, експериментирање и создавање.

– Во ера на дигитализација, многу е важно на младите да им понудиме и можности за стекнување на дополнителни вештини и навики, покрај оние што ги добиваат во училиштата. Кога го формиравме „Иноваториумот“ нашата цел беше да креираме простор преку кој ќе поттикнеме поголема мотивација и градење на интерес кон СТЕМ науките кај учениците и основните училишта од овој дел на градот. Особено ни е драго што оваа година обуките ги проширивме и во Општина Аеродром, каде беа вклучени 524  ученици. Со програмата минатата година беа опфатени основните училишта од Општина Кисела Вода со учество на повеќе од 200 ученици. Ова е силна потврда дека младите имаат голема желба да учат, да истражуваат и да се запознаваат со современи технологии – истакна Љупчо Дончев.

Во реализацијата на програмата, партнери на ТИТАН Усје се Технолошко-металуршки факултет, локалната самоуправа и училиштата, а од компанијата посочуваат дека токму ваквите партнерства се клучни за создавање подобри можности за младите.

ТИТАН Усје повеќе од 70 години е дел од заедницата, а преку програмата „Партнерство со училиштата“, која се реализира од 2009 година, компанијата континуирано инвестира во подобри услови за учење и развој на учениците.

На крајот од настанот, учениците добија признанија за успешно завршените обуки, а од компанијата упатија порака младите да продолжат да истражуваат, да поставуваат прашања и да создаваат, бидејќи токму тие се иднината.

„Иноваториум – клуб на напредни знаења и вештини“ е лоциран во кругот на ТИТАН УСЈЕ, а за учениците е обезбеден и автобуски превоз. Дел од капацитетите на „Иноваториумот“  и научните помагала се ставени на располагање на сите наставници по математика, физика и хемија од општинските училишта, со што ќе можат да го користат и во текот на редовната настава.

The post ТИТАН УСЈЕ ОДБЕЛЕЖА 2 ГОДИНИ „ИНОВАТОРИУМ“ Едукативен центар за развој на дигитални и инженерски вештини кај младите appeared first on plusinfo.mk.

Двесте ученици од седум основни училишта од општина Кисела Вода добија признанија за завршена обука во 3Д-печатење која се спроведе во „Иноваториумот – клуб на напредни знаења и вештини“ основан од ТИТАН Усје. Се работи за целосно опремен центар со компјутери и најнови машини за 3Д-печатење, кои ги користат учениците од основите училишта.

Учениците што денес добија признанија за помината обука, се првата група на ученици кои ја посетуваа наставата во „Иноваториумот“ од почетокот на неговото отворање. Со едукативните активности во „Иноваториумот“ беа опфатени учениците од основните училишта „Рајко Жинзифов“, „Кузман Шапкарев“, „Св. Климент Охридски“, „Невена Георгиева – Дуња“, „Партениј Зоографски“, „Кирил Пејчиновиќ“ и „Круме Кепески“.

– Градење на напредни генерации кои ќе имаат соодветни технички знаења и вештини, особено во време на засилена дигитализација и примена на вештачка интелигенција, не е обврска само на државата, туку на сите нас. Како одговорна компанија која работи со еднаква посветеност и на сопствениот развој и на развојот на заедницата, ние го направивме овој проект за на децата од нашето соседство да им дадеме можност за учење на нови вештини кои ќе им помогнат понатаму во животот и ќе им овозможат полесно да одберат своја професија. Навистина сме многу среќни што за толку кратко време поминаа преку 200 ученици низ оваа едукација. Сакам да им честитам за нивната посветеност и да им порачам да сонуваат и да работат напорно за остварување на своите соништа. Воедно ги повикувам учениците и од другите општини да дојдат, да го посетат „Иноваториумот“ и да откријат нов свет – истакна главниот и извршен директор на ТИТАН Усје, Константинос Николаоу при доделувањето на сертификатите.

Во насока на поголема мотивација и градење на интерес кон СТЕМ науките техничкиот директор во ТИТАН Усје Гоце Цветковски на учениците им презентираше примери на млади луѓе кои со својата работа и љубопитност се заслужни за многу научни откритија кои придонеле за развој на науката и техниката и за подобрување на секојдневниот живот.

Во изминатиот период учениците од овие училишта во „Иноваториумот“ работеа на проекти со кои усвојува нови знаења и вештини во областа на 3Д-печатењето, а едукацијата ја спроведува наставен кадар од Технолошко – металуршкиот факултет(ТМФ) при Универзитетот Св. Кирил и Методиј од Скопје. На доделувањето на наградите пред присутните се обрати и деканот на ТМФ проф. д-р Стефан Кувенџиев, кој во своето обраќање уште еднаш го истакна значењето на неформалното образование и изрази надеж дека следната година ќе има уште поголем интерес кај учениците и од другите општини.

Сашо Јовановски, советник за образование во општината Кисела Вода го потенцираше значењето на приватно јавното партнерство, особено во едукацијата и поддршката на младите и најави дека општината и понатаму ќе иницира и ќе работи на продлабочување на ваков вид на соработка.

Главна мисија на „Иноваториумот“ е преку интерактивни и соодветно адаптирани содржини учениците да ги зајакнат своите знаења во СТЕМ науките – математика, технологија, инженерство и техника. „Иноваториумот“ нуди можности за изучување и стекнување нови вештини во повеќе технички области, а содржините ќе се надоградуваат и ќе се менуваат согласно потребите.

„Иноваториум – клуб на напредни знаења и вештини“ е лоциран во кругот на ТИТАН Цементарница УСЈЕ, а за учениците е обезбеден и автобуски превоз. На почетокот со активностите опфатени се учениците од основните училишта од општината Кисела Вода, а во иднина во работата на „Иноваториумот“ ќе се вклучат и учениците од соседните општини. Покрај тоа, дел од капацитетите на „Иноваториумот“ и научните помагала ќе бидат ставени на располагање на сите наставници по математика, физика и хемија од општинските училишта, со што ќе можат да го користат и во текот на редовната настава.

Покрај претставниците на компанијата кои се вклучени во активностите на „Иноваториумот“, на настанот присуствуваа и претставници на општина Кисела Вода .

The post 200 УЧЕНИЦИ ГО СОВЛАДАА 3Д-ПЕЧАТЕЊЕТО Признанија од модерниот центар „Иноваториум“ на ТИТАН Усје appeared first on plusinfo.mk.

Зајакнување на вештините на учениците, поголема едукација и имплементација на нови методи и техники во изучувањето на СТЕМ науките – математика, технологија, инженерство и техника.

Ова е главната цел на „Иноваториум – клуб на напредни знаења и вештини“, кој денес беше отворен во просториите на Титан УСЈЕ. Се работи за целосно опремен центар со компјутери и најнови машини за 3Д печатење, кои ќе можат да ги користат учениците од основите училишта.

„Иноваториумот“ нуди можности за изучување и стекнување нови вештини во повеќе технички области, па согласно потребите, содржините ќе се надоградуваат и ќе се менуваат. Едукацијата ќе ја изведуваат предавачи од Технолошко-металуршкиот факултет од Скопје (ТМФ), кои преку интерактивни содржини ќе ги анимираат младите и нивниот интерес за нови знаења од техничките области.

– Едукацијата на младите не е само обврска на институциите, туку сите ние сме имаме одговорност и треба да дадеме придонес во тој процес. Поради тоа започнавме со реализација на овој проект, чија цел е на младите да им понуди дополнителна можност за едукација, но и да даде нова вредност во формалното образование. Интересот за негово користење е веќе голем и искрено се надевам дека ќе овозможиме позитивен ефект во образованието. Ние ќе продолжиме да соработуваме со сите институции и партнери и да развиваме проекти кои се во интерес на заедницата, бидејќи сметаме дека приватно – јавното партнерство е одличен модел за напредок – истакна Константиност Николаоу, главен извршен директор на Титан УСЈЕ.

На свеченото отворање присуствуваше и министерката за образование и наука д-р Весна Јаневска која истакна:

– Иновативните иницијативи, посебно оние што се насочени кон образованието, имаат најширок одраз врз заедницата. Секое ново вложување на компаниите во образованието и во знаењата и вештините на младите дава повеќеслојни придобивки: покажува дека бизнисмените се свесни за потребата да се оддолжат на средината во која работат и заработуваат, се создаваат подобро обучени кадри кои во иднина поуспешно ќе се вклучат на пазарот на труд и се влијае на намалување на сиромаштијата – рече Јаневска.

На почетокот „Иноваториумот“ ќе го посетуваат ученици од основите училишта во општината Кисела Вода, а понатаму ќе бидат вклучени и учениците од другите општини. Титан УСЈЕ за учениците обезбедува и бесплатен превоз.

– Ова не е само проект, ова е инвестиција во иднината. СТЕМ едукацијата е повеќе од учење математика, инженерство или технологија – таа е начин на размислување. Тоа ги поттикнува децата критички да анализираат, да решаваат проблеми и да ја користат иновацијата како алатка за успех. Програмата која се спроведува во две основни училишта, отсега ќе биде достапна и за сите ученици од основните училишта во општината – истакна Сашо Јовановски, советник за образование во општината Кисела Вода.

Наставниот кадар од Технолошко–металуршкиот факултет, преку адаптирани содржини, показни експерименти и новини ќе ги доближи техничките науки до учениците. Титан УСЈЕ и ТМФ кон крајот на минатата година потпишаа и Меморандум за соработка со кој се дефинираат клучните приоритети.

– За нас од исклучителна важност е соработката од ваков вид, бидејќи овозможува да се разбуди интересот кај младите за техничките науки, кои се клучни носители на новата дигитална револуција. Нашите стручни лица кои ќе ја вршат едукацијата креираа интерактивен модел кој ќе им овозможи на учениците, низ практична работа, да се запознаат со принципите на овие науки и да ги усвојат новините кои се актуелни. Содржината е соодветно прилагодена на возраста, што е дополнителна придобивка и верувам дека ќе донесе одличен ефект – истакна проф. д-р. Стефан Кувенџиев, декан на ТМФ.

На настанот беа присутни и директорите на основите училишта од општина Кисела Вода кои ќе можат да ги користат капацитетите на „Иноваториумот“. Сите научни помагала ќе им бидат ставени на располагање на наставниците по математика, физика и хемија од општинските училишта и за потребите на редовната настава.

The post 📷 ОТВОРЕН ИНОВАТОРИУМ ВО ТИТАН УСЈЕ Целта е да се поттикнат младите кон СТЕМ науките appeared first on plusinfo.mk.