Со спектакуларен музичко-сценски перформанс на стадионот „Билјанини Извори“ во Охрид, в недела (9 август) ќе започне музичкиот караван по повод 35 години од независноста на Македонија, соопшти „Авалон продукција“.

Според најавата, преку музика, глума и танц, во форма на мултимедијален сценски спектакл ќе биде раскажана приказната за 35 години независност на државата, при што ќе бидат претставени најзначајните историски моменти, предизвици и достигнувања од изминатите три и пол децении.

Во пресрет на 8 Септември, годинава ќе се реализира музички караван што ќе посети 11 градови низ државата, со настапи на познати македонски музичари и актери. Останатите градови од турнејата ќе бидат дополнително објавени.

Кулминацијата на проектот е предвидена за 4 септември на плоштадот „Македонија“ во Скопје, каде што, според организаторите, ќе настапат повеќе од 120 уметници.

Од „Авалон продукција“ ги повикаа граѓаните да присуствуваат на отворањето на караванот во Охрид и заедно да го започнат одбележувањето на 35-годишнината од независноста на Македонија.

The post МУЗИЧКИОТ КАРАВАН ЗА 35 ГОДИНИ ОД НЕЗАВИСНОСТА ЌЕ ПОЧНЕ ОД ОХРИД Спектаклот со 120 уметници ќе се изведе во 11 градови appeared first on plusinfo.mk.

Легендите на електронската музика Пол Ван Дајк и Пол Окенфолд ќе настапат заедно на 16 август во Градскиот парк во Струмица, во рамки на одбележувањето 35 години независност на Македонија.

Настанот беше најавен денеска на прес-конференција во Струмица од портпаролката на Владата, Марија Митева, и Бобан Милошески од „Авалон“.

Митева истакна дека одбележувањето на јубилејот ќе се реализира низ повеќе градови во државата, со цел граѓаните да имаат можност заеднички и достоинствено да ја одбележат 35-годишнината од независноста.

– Сигурна сум дека настанот ќе биде посетен од цела Македонија, бидејќи заслужува почит и достоинствено одбележување – додаде Митева.

Според Милошески од „Авалон“, одбележувањето на 35 години независност е настан каков што досега не е организиран во поширокиот регион.

– Уште на почетокот најавивме дека одбележувањето ќе трае еден месец и ќе има многу сериозни настани. Некои мислеа дека сме несериозни, но еве сѐ што најавивме досега е доволен доказ дека не е така. Дојдовме овде во Струмица да го најавиме, за мене лично ми е најдраг настан од сите, на 16 август во недела токму тука во Градскиот парк ќе имаме заеднички настап на двајцата највлијателни ди-џеи на сите времиња, Пол Ванд Дајк и Пол Окенфолд. Мислам дека тоа е голема работа и за Македонија и за регионот. Ја избравме Струмица како град затоа што е голем и убав град и нормално е да има таков настан – истакна Милошески.

Настанот во Струмица ќе биде од отворен карактер и со слободен влез, овозможувајќи им на посетителите од цела Македонија да бидат дел од една незаборавна вечер со великаните на светската електронска музичка сцена.

Манифестацијата „35 години независност на Македонија“ започнува на 2 Август – Илинден во Битола, а завршува на 8 септември во Скопје со настап на Дејвид Гета со многу концерти и настапи на големи светски и македонски уметници.

The post ДИЏЕИТЕ ПОЛ ВАН ДАЈК И ПОЛ ОКЕНФОЛД НА 16 АВГУСТ ВО СТРУМИЦА Настанот е дел од прославата за 35 години независност на Македонија appeared first on plusinfo.mk.

На 1 септември на плоштадот Македонија во Скопје по повод 35 години од независноста ќе биде одржан концерт на кој ќе настапи еден од најголемите оперски пејачи на сите времиња, шпанскиот тенор Хозе Карерас, најави денеска Бобан Милошески од Авалон продукција.

На концертот со наслов „Хозе Карерас и македонските ол стар“, ќе настапат Калиопи, Каролина Гочева, Сузана Спасовска, Влатко Стефановски, Наум Петрески, како и оперските певци Ана и Игор Дурловски, во придружба на Македонската филхармонија.

– Сакавме да споиме нешто што е светско заедно со нашето македонско. Ќе има многу изненадувања таа вечер, кои нема да бидат соопштени рече изјави Милошески.

Концертот ќе биде поделен во два музички сегменти. Во првиот дел ќе настапат македонските музички ѕвезди заедно со над 60 музичари од Македонската филхармонија, под диригентската палка на Сашо Татарчевски, со специјални оркестрации и аранжмани подготвени од маестро Николче Мицевски.

Вториот дел од вечерта ќе му припадне на Хосе Карерас, кој ќе настапи со својот светски репертоар заедно со Македонската филхармонија, предводена од неговиот долгогодишен диригент Давид Хименес.

Организаторите најавуваат и специјални музички спојувања меѓу македонските изведувачи и светскиот тенор, кои ќе останат изненадување за публиката.

Во преговорите за настанот биле вклучени и пејачот Владо Јаневски и пијанистот Симон Трпчески, но поради зафатениот распоред, тие нема да настапат.

Директорот на Македонската филхармонија, Мустафа Имери, рече дека му е чест што токму оркестарот на Филхармонија ќе ја отвори прославата по повод 35 години независност.

Концертот ќе биде бесплатен и отворен за сите граѓани.

Портпаролката на Владата, Марија Митева рече дека се подготвуваат за достојно одбележување на 35 години независност.

– Навистина ни е важно и сакаме граѓаните да уживаат и да покажеме дека имаме капацитет да организираме настан со македонски и со светски ѕвезди – рече Митева.

На 8 септември во рамки на јубилејната програма на градскиот стадион ќе настапи светски познатиот француски диџеј Дејвид Гета со „Monolith Stadium Show“.

The post БЕСПЛАТЕН КОНЦЕРТ НА ХОЗЕ КАРЕРАС НА ПЛОШТАДОТ МАКЕДОНИЈА Со тенорот ќе пејат Калиопи, Каролина Гочева, Наум Петревски, Сузана Спасовска… appeared first on plusinfo.mk.