Од 6 до 9 јуни 2024. ќе се одржи 23-тото издание на ОФФест, нашиот најголем и најзначаен

фестивал на музиката на светот.

За жал, како и во изминатите години, така и оваа, нема да имаше можност да танцуваме со

пиво во рака од едноставна причина што, како што рече и Оливер Белопета на денешната

прес-конференција, Скопје е веројатно единствената метропола во некоја европска земја која

нема летна сцена.

„Периодот на одржување на ОФФест не е баш идеален со оглед на тоа што во тој период

имаме веќе летни температури, а фестивалот се одржува во Националната опера и балет и во

Младинскиот културен центар без можност за концерти на отворена летна сцена која Скопје

ја нема и без можност во концертите да уживаме танцувајќи со пиво во рака“, рече Белопета.

Освен на хендикепите на нашата инфраструктура, тој се пожали и на немањето комплетна

поддршка од македонските медиуми, од што ги исклучи порталите, како и на недоволните

финансии, а се осврна и на македонскиот менталитет одговарајќи на новинарско прашање за

тоа дали барем еднаш некој од концертите ќе почне на време.

Најавувајќи ги ѕвездите на ова 23-то издание на фестивалот, Белопета проговори и за

неизвесната иднина на овој, како и на скопскиот Џез-фестивал на есен.

Сепак, она од што тие како организатори и на двата фестивали не отстапуваат е нивниот

базичен концепт – изборот на големи и актуелни ѕвезди на светската музичка сцена.

Така, ОФФ-Фест 2024 ќе го отворат две големи имиња на африканската музика: БОМБИНО,

еден од најреномираните претставници на прославениот „пустински блуз“ и

јужноафриканските ѕвезди БИ-СИ-ЈУ-СИ, познати по својот афро-психоделичен транс и

импресивните настапи во живо.

Миксот од меланезиски, индиски, африкански влијанија и европски фолк со елементи на

импровизирана музика на холандскиот секстет БОИ АКИ, во комбинација со оригиналниот

и моќен звук на француско-етиописката супер-група КУТУ, ветува беспрекорно фестивалско

доживување.

Најголема ѕвезда на фестивалот е ВИСЕНТЕ АМИГО, кој се смета за наследник на

легендарниот композитор и фламенко гитарист Пако де Лусија. Со две Греми награди зад

себе, придружуван од музичари од највисока класа, тој ќе го претстави своето фасцинантно

творештво, коешто му донесе светска слава и придонесе неговото име да стане референца за

фламенко гитарата денес.

Последната вечер на ОФФ-Фест ќе биде во знакот на три извонредни европски состави:

фуриозниот полски гудачки квинтет ВОЛОСИ со својот оригинален микс во кој се вкрстуваат

влијанијата на рок, џез, етно, амбиент и филмската музика, потоа домашните нео-фолк

миленици во подем КАЛАТА, како и познатиот српски модерен етно колектив НЕЈКИД.

Во рамките на предфестивалската „програма плус“ ќе бидат премиерно прикажани и

документарните филмови „Сезарија Евора” и „Агадез, музиката и отпорот“.

Останува и нашата традиција секоја година да претставуваме и една македонска група која

грижливо ја избираме да биде нешто што сметаме дека во иднина ќе може да си го најде

патот за Европа и годинава тоа е бендот Калата“, најави Белопета.

Во рамки на прес-конферецијата, Костадин Шурбановски-Шурбе ја најави и промоцијата на

најновото издание на „Пијан славеј“, на 1.јуни (сабота) во „Буква“, како дел од придружната

програма на ОФФест, кое е нивно второ издание, но воедно и второ за СЏФ рекордс.

The post ЗА НЕМАЊЕТО ЛЕТНА СЦЕНА, МЕДИУМСКА ПОДДРШКА, ФИНАНСИИ И ЗА НАШИОТ МЕНТАЛИТЕТ Белопета ги најави ѕвездите на ОФФест и неизвесната иднина на овој и на Џез-фестивалот appeared first on plusinfo.mk.