Сите 16 пријавени пливачи точно во 11 часот влегоа во водите на Охридското Езеро кај Свети Наум, на стартот на 39-тиот меѓународен Охридски пливачки маратон.

Единаесетте пливачи и петте пливачки ќе треба да ги испливаат 25-те километри колку што е долга патеката „Климе Савин“, од Свети Наум низ девет контролни точки до целта кај Градското пристаниште во Охрид.

Моменталните временските услови засега идеални за добра трка, водата на езерото е мирна со температура од 25 степени Целзиусови. Во такви услови на пливачите за да стигнат до целта ќе им бидат потребни околу  пет часа.

Боите на Македонија оваа година ги  бранат Александар Илиевски, Петар Цеков, Леонид Мишевски и Росана Гошева.

Во машка конкуренција упте пливаат Матеа Видовиќ од Србија, Умит Кемал Џенгиз од Турција, Филип Лакас од Канада, Алесио Окипинти и Николо Ричарди од Италија, Енеко Саезмиера и Даниел Понсе Хименез од Шпанија, како и Кристијано Карамело Сантос од Португалија.

Во женска конкуренција, покрај Гошева, во водата се уште и Елена Лионело од Италија, Милица Љубисављевиќ од Србија и Аргентинките Рита Ванеса Гарсија и Мајте Ајлен Пука.

Рекордот на маратонот го држи Италијанецот Алесио Окипинти, кој на 36-то издание во 2023 година 25-километарската патека ја исплива за 4 часа, 53 минути и 14 секунди.

Наградниот фонд на годинашниот маратон изнесува 15 илјади долари, а паричните награди ќе бидат распределни соодветно за најдобрите пливачи во двете категории.

Покровители на маратонот се Општина Охрид, Министерството за спорт и претседателот на Република Македонија, додека технички организатор е Пливачкиот клуб „Охридски бранови 2008“ од Охрид.

Охридскиот пливачки маратон има традиција што датира од 1950-тите, а низ годините прерасна во една од најпрепознатливите спортски манифестации во Охрид и Македонија. Првиот маратон на релацијата Горица – Охрид бил одржан во 1954 година, додека во 1962 година за првпат била испливана подолгата патека Пештани – Струга – Охрид, долга 36 километри, што се смета за почеток на големиот Охридски пливачки маратон.

Од обновувањето на маратонот во 1992 година трката се одржува на патеката „Климе Савин“, од Свети Наум до Охрид, која во почетокот беше долга 30 километри. Низ историјата на маратонот настапувале бројни познати имиња од светското маратонско пливање, а рекордер по бројот на победи е Бугаринот Петар Стојчев со 11 триумфи.

The post СТАРТУВА ОХРИДСКИОТ МАРАТОН Боите на Македонија ги бранат Илиевски, Цеков, Мишевски и Гошева appeared first on plusinfo.mk.