На тринаесет најдобри наставници од предучилишното, основното и средното образование во учебната 2025-2026 година денеска им беа доделени признанија по повод 5 Октомври – Светскиот ден на учителите, кој беше одбележан од Сојузот на просветни работници и Министерството за образование и наука.

Признание за најдобар просветен работник во предучилишното образование доби Клементина Петрушевска, воспитувачка во градинката „Весели цветови“ во Кисела Вода.

Во одделенска настава во основното образование за најдобри наставници се прогласени Соња Трифуновска од ОУ „Гоце Делчев“ – Тетово, Виолета Поповска од ОУ „Вера Јоциќ“ – Гази Баба, Габриела Мерџаноска од ОУ „Гоце Делчев“ – Гостивар, Ксенија Николова од ОУ „Гоце Делчев“ – Босилово и Весна Тодоровска-Унковска од ОУ„Партенија Зографски“ – Кисела Вода.

Во предметна настава признанија добија Томе Китановски од ОУ „Гоце Делчев“ – Василево, Бојанка Џипунова-Ташова од ОУ „Васил Главинов“ – Велес, Вера Зороска од ОУ „Христо Узунов“ – Охрид,  Оливера Шиклеска-Грозданова од ОУ „Ѓорѓи Сугарев“ – Битола и Благица Чатлеска од ОУ „Гоце Делчев“ – Прилеп.

Во средното образование за најдобар наставник е избран Никола Делевски од Регионалниот центар за стручно образование и обука „Никола Карев“ – Струмица, а постхумно признание му беше доделено на Слаѓан Станковиќ – Битрак, кој беше дел од наставниот кадар во СОУ „Наце Буѓониʺ – Куманово и „Математичко-информатичка гимназијаʺ во Скопје.

На настанот насловен „Учителот инспирира, ученикот создава – заедно го обликуваат светот на знаењето“, министерката за образование Весна Јаневска рече дека наставникот останува најважниот столб во училиштето, најавувајќи ново покачување на платите за март, по веќе реализираното зголемување од 20% во изминатите две и пол години.

-Без разлика на инфраструктурата, технологијата или инвестициите, најважниот дел од секое училиште останува  наставникот. Од вас очекувам да останете енергични, посветени и да бидете двигатели на образованието. Да бидете партнери на Министерството, но и партнери на родителите и на учениците. Но, пред сè, да го зачувате и истакнете авторитетот на наставникот. Барајте заложба, труд и одговорност од децата и оценувајте реално, затоа што реалната оценка не е казна, таа е насока за напредок- истакна Јаневска.

Осврнувајќи се на дефицитот од кадар по природни науки, Јаневска истакна дека се преземаат чекори за враќање на достоинството и значењето на наставничката професија.

– Какво е општеството, такво е образованието. Во еден период во изминатите години се изгуби значењето и достоинството на наставникот поради склоп на многу различни причини. Но, во овие две години правиме сè за младите да го сфатат значењето на наставникот, кој е од исклучителна важност. Се надевам дека во тоа успеваме и моето присуство денес и во минатите години покажува колку треба да се вреднува оваа професија – рече Јаневска.

Претседателката на Сојузот, Жаклина Ристовска, подвлече дека во ера на брзи технолошки промени и вештачка интелигенција, улогата на учителот не се намалува, бидејќи тој е оној кој ја дава инспирацијата, го препознава талентот и ја гради самодовербата кај учениците.

The post ДОДЕЛЕНИ ПРИЗНАНИЈА НА 13 НАЈДОБРИ НАСТАВНИЦИ Јаневска најави ново покачување на платите на наставниците во март appeared first on plusinfo.mk.