Единаесетгодишно момче останува во критична состојба откако било застрелано во лицето и вратот во стан во Норвест, во северозападниот дел на Сиднеј. Полицијата сè уште не утврдила што точно се случило во домот, а меѓу верзиите што ги проверува е и случајно испукување на оружјето.

Истрагата има уште една голема непознаница – оружјето не е пронајдено. На адресата немало ниту регистрирано огнено оружје, пишуваат локалните медиуми.

– Во однос на оружјето, на оваа адреса нема регистрирано огнено оружје. Тоа ќе биде уште една насока што ќе ја истражуваме во следните денови – изјави полициската надзорничка Наоми Мур.

Пукањето се случило околу 17 часот во понеделникот. Кога полицијата пристигнала, во станот биле момчето, четворица 18-годишници и жена на возраст од четириесетина години. Дел биле роднини, а дел пријатели на семејството.

Полицајците први му укажале помош на детето, а потоа интервенирале болничарите. Момчето било пренесено во болница на итен третман, каде што останува во критична состојба. Неговата мајка е покрај него.

– Таа е вознемирена, како што би бил секој родител поради тоа со што се соочува во моментов – рече Мур.

Тројца 18-годишници биле уапсени по пукањето. Двајца подоцна биле ослободени додека истрагата продолжува, а третиот е обвинет за прикривање тешко кривично дело и му е одбиена кауција.

Полицијата пребарувала и околу станбениот комплекс, вклучително парк и поток во близина.

Истражителите проверуваат и можни врски на дел од присутните со организиран криминал, иако непосредно по пукањето полицијата соопшти дека нема докази оти самиот инцидент произлегол од криминална пресметка

The post ЗАСТРЕЛАЛЕ МОМЧЕ ВО ЛИЦЕ И ВО ВРАТ ВО СИДНЕЈ Оружјето исчезнало, еден од тројцата уапсени е обвинет за прикривање appeared first on plusinfo.mk.