Гугл и Јутјуб се убедливо најпосетуваните интернет-платформи во светот, покажува анализата на „Вижуал Капиталист“, изработена врз основа на податоците на „Семраш“ за септември 2026 година.

Гугл остварил дури 108,9 милијарди посети, додека Јутјуб забележал речиси 60 милијарди. Двете платформи, кои се дел од технолошката компанија „Алфабет“, заедно достигнале 168,9 милијарди посети.

На третото место се наоѓа Фејсбук со 12,21 милијарди посети, но најголемо внимание привлекува четвртата позиција на Чет Џи-пи-ти. Платформата за вештачка интелигенција во септември имала 8,23 милијарди посети, со што се најде пред Инстаграм, Редит и ТикТок.

Инстаграм забележал 6,81 милијарди посети, Редит 4,82 милијарди, Ватсап 4,26 милијарди, а социјалната мрежа Икс 4,17 милијарди. Википедија имала 3,8 милијарди посети, додека ТикТок регистрирал 2,71 милијарди.

Податоците покажуваат дека традиционалните интернет-пребарувачи сè потешко можат да му конкурираат на Гугл. Бинг имал 2,33 милијарди посети, а ДакаДакГоу околу 2,2 милијарди.

Трите платформи на Мета – Фејсбук, Инстаграм и Ватсап, заедно оствариле 23,3 милијарди посети.

За разлика од Чет Џи-пи-ти, кој е меѓу петте најпосетувани платформи, неговите конкуренти во областа на вештачката интелигенција сè уште заостануваат. Клод се наоѓа на 21. место со 1,6 милијарди посети, односно приближно петпати помалку од Чет Џи-пи-ти.

Меѓу првите 15 најпосетувани веб-страници се и Амазон со 2,32 милијарди посети и Јаху со 2,3 милијарди. На листата се наоѓаат и страници за возрасни, меѓу кои Порнхаб со 3,4 милијарди и ИксВидеос со 2,27 милијарди посети.

Анализата опфаќа 40 најпосетувани веб-страници, а проценките ги вклучуваат посетите од компјутери и мобилни уреди, вклучително и повеќекратните посети од исти корисници.

The post ЧЕТ ЏИ-ПИ-ТИ СТАНА ЧЕТВРТА НАЈПОСЕТУВАНА ПЛАТФОРМА ВО СВЕТОТ Гугл и Јутјуб и натаму доминираат appeared first on plusinfo.mk.