Жена на 61 година и нејзиниот сопруг кој има веќе 71 година за првпат се оствариле како родители благодарение на ин-витро постапка спроведена во болницата „Д-р Органџиски“ во Штип.

Од болницата случајот го оценуваат како историски успех, со оглед на возраста на родителите, како и поради сложеноста на медицинската постапка што ѝ претходела на бременоста.

Имено, на ин витро постапката и успешната бременост ѝ претходела интервенција кај 61-годишната жена, односно, била извршена хистероскопска реконструкција на матката. Во постапката биле користени и донирани јајце-клетки.

По спроведената медицинска процедура и успешната бременост, двојката добила здраво машко дете, а од болницата информираат дека мајката и новороденчето се во добра здравствена состојба.

– Пациентката и нејзиниот сопруг, кој е Шпанец живеат и работат во Швајцарија, а породувањето беше извршено со царски рез во Цирих.

Ова е втор исклучителен успех на болница „Д-р Органџиски“ кај пациентка во оваа возрасна група, по раѓањето на здраво дете кај наша 60-годишна пациентка во 2024 година.

Зад овој резултат стојат повеќе од три децении надеж и неостварена желба за сопствено дете, но и огромно медицинско знаење, искуство, трпение, прецизност и посветеност во секој чекор од лекувањето – велат од болницата.

View this post on Instagram

 

A post shared by Болница Д-р Органџиски | Hospital Dr. Organdziski (@bolnicadrorgandziski)

The post ЖЕНА НА 61 И МАЖ НА 71 ГОДИНА СТАНАА РОДИТЕЛИ Средовечниот пар доби здраво машко бебе appeared first on plusinfo.mk.

Додека повеќето родители вложуваат огромен труд за да ги дезинфицираат детските играчки и раце, Финска – земјата позната по револуционерните иновации во образованието – целосно ги менува правилата. Не станува збор за обична нечистотија, туку за внимателно осмислен научен експеримент кој би можел трајно да го промени начинот на кој гледаме на детското здравје.

Финската влада инвестира милион евра во проектот под името „Земја во градинките“ со цел научно да го докаже она што природата отсекогаш го знаела: контактот со шумското тло е неопходно за развој на здрав и силен имунитет.

Што е „микробна обука“ и зошто ни е потребна?

Претераната хигиена во модерното општество, поддржана од стерилната средина во градовите и становите, доведе до она што научниците го нарекуваат губење на биодиверзитетот на микробите. Нашите деца, кои поминуваат дури 90 % од времето во затворен простор, не се изложени на разновидноста од бактерии и микроорганизми кои се клучни за тренирање на имунитетот.

Резултатот од оваа претерана стерилност е огромен пораст на алергии, астма и автоимуни нарушувања кај најмладите. Финскиот проект е директен одговор на овој современ проблем.

Како се спроведе овој необичен експеримент?

Во избрани урбани градинки, научници ги заменија стандардните, чисти и стерилни песочни површини со природни содржини:

Природна почва: Внесена е земја со тресет, мов и шумска почва, која е преполна со разновидни, природни микроорганизми.
Садење и копање: Децата се поттикнувани сами да садат растенија, да копаат и директно да работат со земјата.
Игра на отворено: Целта е децата да поминуваат најмалку еден час дневно во ваква средина.

Повеќе за ова прочитајте на порталот „Мајка и дете“.

The post ФИНЦИТЕ ВЛОЖИЈА МИЛИОН ЕВРА ВО КАЛ, ЗА ПОСИЛЕН ИМУНИТЕТ НА ДЕЦАТА Фасцинантни резултати од финскиот експеримент во градинките appeared first on plusinfo.mk.

Човечкото тело често испраќа сигнали кои многумина ги доживуваат како непријатни или естетски непожелни, но токму тие понекогаш можат да откријат многу за нашата здравствена состојба. Влакната на прстите на нозете, потењето или непријатниот мирис на стапалата неретко предизвикуваат непријатност, но експертите предупредуваат дека некои од овие појави всушност можат да бидат сосема нормален знак дека организмот функционира како што треба, пишува Express.

Во последните денови на социјалните мрежи се прошири тврдење дека влакнестите прсти на нозете се показател за добро здравје. Колку вистина има во тоа објасни фармацевтката Рејчел Џонс, која откри и кои други навидум необични карактеристики на телото можат да дадат увид во неговото функционирање.

– Социјалните мрежи и стандардите за убавина често создаваат впечаток дека нормалните телесни функции се нешто што треба да се крие или коригира – вели Џонс.

Таа додава дека реалноста е поинаква.

– Многу од тие појави всушност се знак дека телото го прави токму она за што е создадено. Разбирањето на тоа што е нормално може да им помогне на луѓето да бидат посигурни во своето здравје, но и да препознаат кога некоја промена сепак треба да се провери – објаснува таа.

Сепак, предупредува дека секоја трајна или ненадејна промена не треба да се занемари.

– Ако промените траат подолго време или се појават нагло, секогаш треба да се консултирате со здравствен работник – нагласува Џонс.

На многумина влакната на прстите на нозете им создаваат непријатност, но на социјалните мрежи се појави тврдење дека изразената влакнетост на стапалата може да биде знак за добра циркулација, бидејќи крвта успешно стигнува и до најоддалечените делови од телото и го поттикнува растот на влакната.

Сепак, Рејчел Џонс вели дека работите не се толку едноставни.

– На растот на влакната на стапалата влијаат многу фактори, меѓу кои генетиката, возраста и хормоните, па количината на влакна значително се разликува од човек до човек. Самото присуство на влакна на прстите не кажува ништо сигурно за циркулацијата – објаснува таа.

Иако поврзаноста меѓу здравјето на срцето и влакната на прстите не е научно потврдена, некои други промени на стапалата можат да предупредат на проблеми со циркулацијата.

– Ако забележите ненадејно губење на влакната на стапалата или потколениците, заедно со симптоми како постојано студени стапала, болка при одење, вкочанетост, рани што бавно зараснуваат или промена на бојата на кожата, тоа може да укажува на нарушување на циркулацијата – предупредува Џонс.

Во такви случаи, советува таа, важно е да се побара стручен медицински совет за да се утврди причината за тегобите.

Што се однесува до непријатниот мирис на стапалата, многумина во летниот период се жалат на потење и непријатни мириси. Но, според Џонс, самиот мирис не кажува многу за здравствената состојба, додека потењето може да биде знак дека организмот функционира нормално.

– Потта сама по себе нема мирис. Непријатниот мирис се создава дури кога ќе се измеша со бактериите кои природно живеат на кожата – објаснува таа.

Иако потењето може да биде непријатно, додава Џонс, тоа често покажува дека системот кој ја регулира телесната температура работи правилно.

За да се спречи непријатниот мирис на стапалата, таа препорачува редовна хигиена, често менување чорапи и користење антибактериски спрејови за стапала кои помагаат да се одржи чувството на свежина.

The post ИМАТЕ ВЛАКНА НА ПРСТИТЕ И ВИ СЕ ПОТАТ СТАПАЛАТА? Овие два знака на вашите стапала можат да покажат колку добро ви работи организмот appeared first on plusinfo.mk.

Во Клиничката болница „Аџибадем Систина“ успешно беше извршена сложена операција кај новороденче старо само девет дена. Уште во текот на бременоста, кај бебето била откриена туморска маса на десната надбубрежна жлезда, со сомнение дека станува збор за невробластом.

Детскиот хирург доц. д-р Ристо Симеонов, кој ја изврши оваа исклучително сложена операција, објаснува дека се работи за многу ретка состојба која бара брза дијагностика, мултидисциплинарен пристап и врвна хируршка прецизност.

– Овие тумори најчесто се развиваат по раѓањето и исклучително ретко се дијагностицираат уште додека плодот е во утробата, а уште поретки се операциите кај бебиња стари само неколку дена. Во високоразвиените европски центри, како педијатриската болница Bambino Gesù во Италија и Great Ormond Street Hospital во Лондон, годишно се оперираат само 5 до 10 вакви случаи – посочува д-р Симеонов.

Операцијата била високоризична поради големината и специфичната положба на туморот. Ваквите интервенции бараат максимална смиреност, прецизност и искуство од целиот тим, особено хирургот и анестезиологот.

МУЛТИДИСЦИПЛИНАРЕН ПРИСТАП ВО ТРЕТМАНОТ

Невробластомот кај деца бара третман во високо специјализирани центри за детска хирургија и педијатриска онкологија, со вклучување на мултидисциплинарен тим составен од детски хирурзи, педијатри хемато-онколози, неонатолози, радиолози, анестезиолози и патолози.

Клиничката болница „Аџибадем Систина“ располага со потребните ресурси за третман на вакви комплексни случаи: современа дијагностика, искусен медицински тим, оперативни капацитети, неонатална и педијатриска интензивна нега, како и континуирано постоперативно следење.

ДИЈАГНОЗА ПОСТАВЕНА УШТЕ ВО ТЕКОТ НА БРЕМЕНОСТА

При редовен ултразвучен преглед во 36. гестациска недела кај 24-годишна пациентка од Скопје, која редовно ја следела бременоста во друга установа, била забележана туморска формација на надбубрежната жлезда кај плодот. За второ медицинско мислење, пациентката се обратила во Клиничката болница „Аџибадем Систина“. На Одделот за гинекологија и акушерство ја примила д-р Милица Калмарас, специјалист по гинекологија и акушерство, која ја потврдила дијагнозата и го извела и породувањето во 39. гестациска недела.

Уште пред раѓањето на бебето, во координација со детскиот хирург доц. д-р Ристо Симеонов, бил формиран мултидисциплинарен тим за понатамошно следење и лекување. Веднаш по раѓањето, новороденчето било згрижено на Одделот за неонатологија под надзор на д-р Симонида Спасевска, специјалист по педијатрија. Веднаш биле започнати сите неопходни испитувања за прецизно утврдување на дијагнозата и планирање на соодветниот третман.

ОТСТРАНЕТ ТУМОР СО ГОЛЕМИНА НА БЕБЕШКА ГЛАВА

Магнетната резонанца и биопсија, направена од страна на проф. д-р Зоран Трајковски, специјалист по радиодијагностика, покажала дека туморската маса значително се зголемила по раѓањето. Со цел прецизно да се утврди евентуално детектирање на раширеност на болеста во коскената срцевина, доц. д-р Билјана Чонеска-Јованова, педијатар хемато-онколог, направила пункциска биопсија на коскена срцевина.

– Пренатално, туморот имаше дијаметар од околу пет сантиметри. Сепак, магнетната резонанца направена по раѓањето покажа дека масата се зголемила повеќе од двојно, достигнувајќи дијаметар од дури 11 сантиметри – објасни детскиот хирург доц. д-р Ристо Симеонов.

Според европските медицински препораки, пренатално дијагностицираните невробластоми во принцип треба да се следат, има правило на следење на состојбата и чекање. Кај ова новороденче, сепак, брзиот раст на туморот и неговото влијание врз здравствена состојба на бебето наложиле итна хируршка интервенција.

– Кај пренатално дијагностицираните невробластоми постојат строго утврдени правила за следење и лекување. Но кога туморот ќе се зголеми за повеќе од 40 проценти, мора да се разгледа можноста за оперативен третман. Во нашиот случај, неговите димензии беа зголемени за повеќе од 100 проценти. Туморот вршеше силен притисок врз големите крвни садови, вена кава и аорта, предизвикувајќи нарушена циркулација и отежнато дишење. Поради тоа донесовме одлука за итна операција – објаснува доц. д-р Симеонов.

Доц. д-р Ристо Симеонов во најкраток можен рок го формирал оперативниот тим. Во интервенцијата учествувале и д-р Златко Алексовски, специјалист по детска хирургија, и д-р Милчо Мицевски, специјалист по анестезиологија.

– Кај пациентот беше изведена деснострана адреналектомија, односно целосно отстранување на туморската промена заедно со десната надбубрежна жлезда. Оперативниот материјал се испрати на патохистолошка анализа, чиј резултат ја потврди конечната дијагноза. Најголемиот предизвик во ваквите интервенции е туморот да се отстрани во целост, без притоа да се оштетат околните витални органи, десниот бубрег и црниот дроб без да се повредат големите крвни садови, вена кава и аорта затоа што операцијата може да заврши фатално. Оперативниот и постоперативниот тек поминаа уредно, а пациентот беше испишан во добра општа и локална состојба, со препораки за понатамошна нега и редовни контроли – вели д-р Симеонов.

По успешно завршената операција, бебето било префрлено на Одделот за неонатална интензивна нега, каде што продолжиле интензивното следење и постоперативниот третман.

Според д-р Чонеска-Јованова, во примерокот добиен со пункциска биопсија на коскената срцевина не било утврдено присуство на малигни клетки. Дополнително, примероците од коскената срцевина и од туморското ткиво биле анализирани со флуоресцентна ин ситу хибридизација (FISH), со цел да се утврди евентуално присуство на амплификација на онкогенот MYCN.

– Во анализираните примероци не беше детектирана амплификација на онкогенот MYCN. Во комбинација со поволната хистологија, локализираната болест, отсуството на далечни метастази и целосното хируршко отстранување на туморот, ова претставува исклучително поволен прогностички фактор. Станува збор за нискоризичен невробластом, без потреба од дополнителна хемотерапија или радиотерапија. Веројатноста за трајно излекување е многу висока, а во понатамошниот период се неопходни редовни контроли, кои вклучуваат имиџинг-процедури и лабораториски испитувања – објаснува д-р Чонеска-Јованова.

По успешно завршената операција, семејството изрази искрена благодарност до лекарите, медицинските сестри и целиот персонал за брзата реакција, стручноста и поддршката што им била дадена за време на престојот во болницата.

The post ВО „АЏИБАДЕМ СИСТИНА“ ОПЕРИРАНО БЕБЕ СТАРО 9 ДЕНА СО РЕДОК ТУМОР НА НАДБУБРЕЖНА ЖЛЕЗДА Дијагнозата била поставена за време на бременоста appeared first on plusinfo.mk.

Ново истражување покажува дека постарите лица кои немаат когнитивни нарушувања, но имаат покачено ниво на биомаркерот p-tau217 во крвта, имаат приближно 38 отсто поголем ризик во следните пет години да развијат рани симптоми на деменција.

Во текот на десет години, овој ризик бил дури 78 отсто поголем, иако истражувачите посочуваат дека овие податоци се нешто помалку сигурни, пишува Си-Ен-Ен.

– Ова ни покажува дека во иднина ќе можеме да користиме тестови на крвта кои го мерат p-tau217 за да го процениме индивидуалниот ризик од развој на когнитивни нарушувања – изјавила Рејчел Бакли, вонредна професорка по неврологија на Медицинскиот факултет при Универзитетот Харвард и главна авторка на студијата.

Помалку инвазивен начин за откривање на ризикот

Досега дијагностицирањето на Алцхајмеровата болест најчесто бараше скапи и инвазивни процедури, како што се ПЕТ-скенирање на мозокот или лумбална пункција.

Сепак, тестовите на крвта што го мерат нивото на фосфорилираниот тау-протеин 217 (p-tau217) можат многу сигурно да укажат на натрупување на бета-амилоидни плаки во мозокот.

Повеќе за ова прочитајте ТУКА.

The post КРВНА АНАЛИЗА ЗА ОТКРИВАЊЕ НА АЛЦХАЈМЕР? Нов тест од крвта би можел да го открие ризикот од болеста многу пред појавата на првите симптоми appeared first on plusinfo.mk.

Жолт прав со вкус што потсетува на сирење во последниве години стана омилен додаток во кујните на љубителите на здравата исхрана и инфлуенсерите на социјалните мрежи.

Нутритивниот квасец (nutritional yeast) е деактивирана форма на квасецот што се користи за правење леб и привлече голем број фанови на интернет, а гурманите на Инстаграм го користат во речиси секое солено јадење, без разлика дали се додава во салати, маринади, сосови за тестенини и бројни други солени јадења.

Најчесто го користат вегетаријанци и вегани како замена за вкусот на сирење.

Популарниот готвач Џејми Оливер го користи во својот вегански рецепт за макарони со сирење, а бројни инфлуенсери на Инстаграм и Тик-Ток редовно ги истакнуваат неговите здравствени придобивки.

Што е всушност нутритивен квасец?

Нутритивниот квасец се продава во форма на прав, снегулки или капсули. Се добива со ферментација на пивски квасец (Saccharomyces cerevisiae) во стерилни услови, со кислород и меласа како извор на храна за микроорганизмите.

По ферментацијата, квасецот се суши и термички се обработува за да се деактивираат живите клетки. Во многу производи дополнително се додаваат витамини од Б-комплексот, особено витамин Б12.

Токму термичката обработка му го дава препознатливиот кремаст вкус што потсетува на сирење. За неговата популарна „умами“ арома придонесува и аминокиселината глутамат, која природно се наоѓа и во месото и некои видови печурки.

Повеќе за ова прочитајте на „Арт кујна“.

The post НУТРИТИВНИОТ КВАСЕЦ Е НОВАТА ЅВЕЗДА НА ЗДРАВАТА ИСХРАНА Може ли овој прав навистина да помогне против исцрпеноста? appeared first on plusinfo.mk.

Во Клиничката болница „Аџибадем Систина“ успешно е изведена првата операција со роботскиот систем MedBot Toumai®, со што официјално започнува нова ера на напредна, прецизна и минимално инвазивна хирургија во болницата, во земјава и во регионот.

Кај 57-годишен пациент беше изведена радикална роботски асистирана простатектомија со роботски асистирана лапароскопска лимфаденектомија. Станува збор за комплексна операција за лекување карцином на простатата, која со помош на роботскиот систем беше реализирана со исклучителна прецизност и максимална контрола во секој чекор од интервенцијата.

Уролошкиот тим беше предводен од проф. д-р Сотир Ставридис, специјалист по урологија, со целосна поддршка од д-р Александар Мицковски и д-р Владимир Лозановски и тим анестезиолози, медицински сестри, техничари и болничари. Благодарение на нивната темелна подготовка, професионалност и беспрекорна координација, операцијата помина успешно и според планираниот тек.

Пациентот е во добра општа здравствена состојба, а постоперативниот тек и закрепнувањето се одвиваат според очекувањата. Овој историски успех е резултат на континуираната посветеност на Клиничката болница „Аџибадем Систина“ да им ги овозможи на пациентите најсовремените медицински иновации и здравствена услуга според највисоките светски стандарди. Воведувањето на роботската хирургија претставува значаен чекор напред не само за болницата, туку и за развојот на македонското здравство.

СЕКОЕ ДВИЖЕЊЕ ГО КОНТРОЛИРА ХИРУРГОТ 

Роботскиот систем не ја изведува операцијата самостојно. Секое движење на инструментите е целосно контролирано од хирургот, кој управува со системот преку специјализирана конзола. Роботот ги пренесува движењата на хирургот со исклучителна прецизност, овозможувајќи стабилна и детална работа и во анатомски тешко достапни региони. Тридимензионалната слика со висока резолуција му овозможува на хирургот повеќекратно зголемен и јасен приказ на оперативното поле.

Проф. д-р Сотир Ставридис објаснува дека ваквиот минимално инвазивен пристап овозможува поголема безбедност за пациентите и значително побрзо закрепнување.

– Имплементацијата на оваа софистицирана технологија ни отвора фасцинантни можности, ни овозможува да работиме со врвна, микроскопска прецизност и да изведуваме исклучително сложени хируршки зафати. Притоа, минимално инвазивниот пристап гарантира максимална безбедност за пациентите и значително побрзо закрепнување. Интервенцијата се одвиваше беспрекорно и целосно според планираниот тек, што е директен резултат на темелната подготовка и врвната координација на целиот оперативен тим – изјави проф. д-р Сотир Ставридис, специјалист по урологија.

Во изведувањето на операцијата учествуваше и д-р Александар Мицковски, како дел од тимот уролози вклучени во интервенцијата.

– Очекуваме примената на оваа технологија дополнително да ги унапреди можностите за минимално инвазивен третман во урологијата и да овозможи изведување сè покомплексни интервенции, со поголема прецизност и помала траума за пациентот. Во иднина, нејзината поширока примена ќе придонесе за пократок болнички престој, побрзо враќање на секојдневните активности и уште подобри функционални и онколошки резултати – изјави д-р Мицковски.

ПРЕЦИЗНА АНЕСТЕЗИОЛОШКА ПОДГОТОВКА И ПОСТОЈАНА КООРДИНАЦИЈА

Медицинската директорка на Клиничката болница „Аџибадем Систина“, д-р Емилија Мирчевска, го предводеше тимот анестезиолози што учествуваше во операцијата.

За д-р Мирчевска, реализацијата на првата роботски асистирана операција претставува историски значаен момент за болницата. Таа изрази голема благодарност до сите членови на медицинскиот тим за нивната професионалност, посветеност и напорна работа, благодарение на кои овој значаен медицински исчекор стана реалност.

– Горди сме што можеме да понудиме напредна хируршка грижа за нашите пациенти и современите медицински технологии да ги доближиме до сите граѓани. Како анестезиолог, ми беше голема чест и професиoнална гордост да бидам дел од првата роботски асистирана хируршка интервенција во нашата болница. Анестезијата во роботската хирургија има свои специфики, бара прецизна подготовка, внимателно следење и менаџирање на сите можни промени во организмот, кои настануваат поради положбата на пациентот за време на операцијата и инсуфлацијата на јаглероден диоксид. Ваквите процедури бараат високо ниво на координација и постојана комуникација меѓу сите членови на оперативниот тим. Овој успех е доказ дека располагаме со знаење, искуство и капацитет за примена на најсовремените медицински технологии – објаснува д-р Мирчевска.

ПРИДОБИВКИ ОД РОБОТСКИ АСИСТИРАНАТА ХИРУРГИЈА

Роботски асистираната хирургија претставува револуционерен напредок во современата урологија. Благодарение на тридимензионалната HD-визуализација, зголемената прецизност и флексибилноста на инструментите, кои ги надминуваат природните ограничувања на движењето на човечката рака, роботската технологија овозможува исклучително прецизна дисекција и максимално зачувување на виталните анатомски структури. За пациентите, ваквиот пристап значи помали оперативни резови, помала загуба на крв, намалена постоперативна болка, помал ризик од компликации, пократок престој во болница, побрзо закрепнување и враќање на секојдневните активности, како и поголема прецизност при зачувувањето на околните нерви, крвни садови и ткива.

Воведувањето на роботскиот систем не претставува само технолошки напредок, туку почеток на сосема ново поглавје во секојдневната хируршка практика на Клиничката болница „Аџибадем Систина“.

Клиничката болница „Аџибадем Систина“ најавува дека и во иднина ќе продолжи да инвестира во иновативни медицински технологии, знаење и континуирана едукација на своите тимови, со единствена цел – подобро, побезбедно и поефикасно лекување и најдобар можен исход за секој пациент. Со проширувањето на примената на оваа технологија, се очекува роботски асистираната хирургија да стане нов златен стандард во лекувањето на сè поголем број пациенти и во изведувањето на најсложените хируршки интервенции.

The post ПРВА РОБОТСКИ АСИСТИРАНА ОПЕРАЦИЈА ИЗВЕДЕНА ВО „АЏИБАДЕМ СИСТИНА“ Хирургот има целосна контрола врз роботскиот ситем appeared first on plusinfo.mk.

Нова студија на случај, објавена во медицинското списание Oxford Medical Case Reports, опишува 65-годишна жена која била толку среќна по свадбата на својата ќерка што лекарите првично помислиле дека доживува срцев удар, пишува Science Alert.

Три дена по свадбената прослава, жената почувствувала болка во градите и отежнато дишење.

Кога побарала лекарска помош, веднаш била упатена на ургентен преглед. Резултатите од испитувањата, сепак, ги збуниле лекарите.

Се чинело дека протокот на крв до срцето е намален, што најчесто укажува на присуство на згрутчување на крвта. Но, и покрај деталните прегледи, такво згрутчување не било пронајдено.

Наместо тоа, лекарите забележале необично проширување на левата срцева комора, која добила форма слична на балон. Поради тоа, срцето ослабело и потешко ја пумпало крвта низ телото.

Колку и да звучи неверојатно, ваквата промена може да биде последица на ненадејна и интензивна среќа.

Кога човек ќе доживее силен бран на позитивни емоции или возбудување, организмот реагира со стресен одговор кој може привремено да го промени дури и обликот на срцето.

Што е синдром на среќно срце? Повеќе за ова прочитајте ТУКА.

The post И МНОГУ СРЕЌА НЕ Е НА АРНО! Жена завршила на Итна помош по свадбата на ќерката appeared first on plusinfo.mk.

Деменцијата е седма водечка причина за смрт во светот и една од главните причини за инвалидитет кај постарите лица. Болеста влијае врз меморијата, размислувањето и способноста на луѓето да водат самостоен и нормален живот.

СЗО препорачува да се сменат животните навики, со што, иако не постои лек за болеста, ризикот за нејзино појавување може да се намали до 45 отсто

– Повеќе од 57 милиони луѓе ширум светот живеат со деменција, а секоја година се регистрираат околу 10 милиони нови случаи – се наведува во соопштението на Светската здравствена организација. Болеста најмногу ги погаѓа лицата постари од 65 години.

– Најчест облик на деменција е алцхајмеровата болест, со 60 до 70 отсто од сите случаи, покажуваат медицинските извештаи. Со навремена превенција, рано откривање и соодветни интервенции, може да се спречи или одложи појавувањето на ова заболување.

Во организацијата додаваат дека здравствените работници и креаторите на јавните политики имаат важна улога во спречувањето или одложувањето на појавата на деменцијата преку навремена превенција, рано откривање и соодветни интервенции.

– Од 2019 година досега, значително се сменија научните сознанија во оваа област – посочи здравствената агенција на ОН. Нашата цел е раното препознавање на симптомите и навремено и соодветно лекување, велат оттаму.

The post ДЕМЕНЦИЈАТА МОЖЕ ДА СЕ СПРЕЧИ ИЛИ ОДЛОЖИ ДО 45 ОТСТО СЗО препорачува промена на животните навики appeared first on plusinfo.mk.

Со години, лекарите предупредуваат дека чипсот, кексите и газираните пијалаци можат да го прошират обемот на струкот, да предизвикаат срцеви заболувања и да го скратат животот. Нова студија неодамна додаде уште еден доказ: таквата храна може да ја наруши когнитивната функција и способноста за размислување.

Во студија објавена во списанието Alzheimer’s & Dementia, учесниците добивале во просек околу 41 процент од нивните калории од ултра-преработена храна: десерти и пијалаци на база на млечни производи, безалкохолни пијалаци, овошни сокови и други засладени пијалаци, солени грицки и производи од компир, преработено месо и готови оброци.

Истражувачите откриле дека луѓето кои консумираат повеќе ултра-преработена храна имаат послаба концентрација и полошо когнитивно здравје.

За секои дополнителни десет проценти учество на ултра-преработената храна во дневната исхрана – што одговара на отприлика една кесичка чипс на ден – учесниците покажале пократка концентрација и имале поголем број фактори на ризик за деменција.

The post УЛТРАПРЕРАБОТЕНАТА ХРАНА ЌЕ НИ СЕ „УДРИ ОД ГЛАВАТА“ Само една кесичка чипс на ден го зголемува ризикот од оштетување на мозокот appeared first on plusinfo.mk.