Приказната за поранешната еротска манекенка и техничка нуркачка со псевдоним „Фреја“ повторно ја разгоре истрагата за саботажата на гасоводот „Северен тек“. Светските медиуми објавуваат нови детали за жената која, според нивните реконструкции, можеби била клучна фигура во една од најголемите подводни операции во поновата историја.

Германските обвинители веќе поднесоа обвинение против Украинецот Серхи Кузњецов, додека медиумите ширум светот се обидуваат да ја состават приказната.

Во повеќе медиумски извештаи се споменува и влакно од коса што наводно било предмет на ДНК-анализа. Сепак, германските власти досега јавно не објавиле конечна потврда дека таа ДНК недвосмислено ѝ припаѓа на „Фреја“.

Токму затоа овој дел останува во зоната на медиумски тврдења и истражувачки реконструкции.

Панцевски ја отвори приказната

Приказната прв ја отвори новинарот Бојан Панцевски од „Волстрит џурнал“, кој во својата книга и серија текстови ја претстави мистериозната „Фреја“ како можен клучен елемент во операцијата.

Во текстот „Мистериозната жена зад експлозијата на Северен тек“, Панцевски опиша како истражителите дошле до траги што водат кон жена со исклучителни нуркачки способности и необична биографија.

Неговата книга „Заговорот Северен тек“ подоцна стана извор за бројни други медиуми кои ја разработија приказната.

Од еротска манекенка до елитна нуркачка

Британскиот „Тајмс“ објави детален профил за жената од Киев која, според нивните информации, во младоста работела како модел и се појавувала во машки списанија.

Подоцна целосно го сменила животот.

Од хоби на Црното Море, нуркањето прераснало во професија.

Според медиумските профили, таа станала техничка нуркачка способна за екстремни длабочини кои ги надминуваат можностите на повеќето цивилни нуркачи.

Токму тие способности ја направиле интересна за украинските безбедносни структури, тврдат дел од извештаите.

Еротски филм како маска

Најнеобичниот дел од приказната го објави британски „Телеграф“.

Според нивната реконструкција, тимот што патувал со јахтата „Андромеда“ се претставувал како мала продукција што снима еротски филм со подводни сцени.

Параванот требало да објасни зошто на бродот има специјализирана нуркачка опрема, камери и лица што патуваат низ Балтикот.

Во текстот се наведува дека токму таквата приказна им помогнала на членовите на екипата да не предизвикаат дополнително внимание кај локалните власти.

Моментот кога мисијата висела на конец

Според индискиот медиум НДТВ, најдраматичниот момент се случил кога временските услови нагло се влошиле во близина на островот Борнхолм. Брановите достигнувале повеќе од два метра.

Дел од екипажот сакал да ја прекине операцијата. Тогаш, според изворите цитирани во медиумските реконструкции, „Фреја“ наводно предложила сама да се спушти кон гасоводот.

Наводно носела околу 80 килограми опрема и експлозив. Овој дел не е потврден од германските обвинители, но често се појавува во медиумските реконструкции на операцијата.

Во центарот на официјалната истрага останува јахтата „Андромеда“. Според германските истражители, на бродот биле пронајдени траги од експлозив, биолошки материјали и други форензички докази.

Германското обвинение веќе е поднесено

Во меѓувреме, германските обвинители официјално поднесоа обвинение против Серхи Кузњецов. Според, тој се товари за учество во експлозиите на „Северен тек“, уништување инфраструктура и други тешки кривични дела поврзани со саботажата.

Кузњецов ги негира обвинувањата.

Истовремено, германската истрага продолжува да бара одговори за улогата на другите членови на групата.

Жената што ја засени целата операција

Иако обвинението денес е насочено кон Кузњецов и кон другите осомничени, вниманието на јавноста сè повеќе се врти кон „Фреја“. Причината е едноставна.

Малку приказни спојуваат еротски модел, елитно нуркање, тајна операција, јахта во Балтичкото Море и саботажа што ја потресе европската енергетска карта.

Затоа жената со псевдонимот „Фреја“ денес е можеби најмистериозното име во целата афера околу „Северен тек“.

БЕРЛИН СО СЕРИОЗНИ СОМНЕЖИ КОН КИЕВ Украина првпат директно поврзана со саботажата на „Северен тек“

The post ГЕРМАНИЈА ИСПИТУВА ДАЛИ „ЗГОДНАТА МАНЕКЕНКА“ ГО УРНА „СЕВЕРЕН ТЕК“ Мистериозната нуркачка била еротски модел?! appeared first on plusinfo.mk.

Свадбата на Тејлор Свифт и Тревис Келси, веќе наречена „американска свадба на векот“, го претвори Њујорк во сцена на огромен медиумски и фанатички спектакл. Главната прослава е закажана за 3 јули (денеска, петок) во „Медисон сквер гарден“, а според најновите информации на Page Six, големото изненадување е дека поп-ѕвездата и славниот играч на американски фудбал можеби веќе формално се венчале во тесен круг на најблиските.

Ако овие информации се точни, настанот во Њујорк ќе биде грандиозна свадбена прослава пред повеќе од 1.000 гости, каква што американската шоу-бизнис сцена одамна не видела. Свадбениот викенд започна во четвртокот со пробна вечера за околу 100 членови на семејствата и најблиски пријатели. Според објавениот распоред, вечерата во „Инфосис театарот“, во комплексот на „Медисон сквер гарден“, траела од 18 до 22.30 часот. МН:

Ова е распоредот, да не задоцните некаде…

Папараците веќе забележаа дел од гостите, меѓу кои Селена Гомез, Лена Данам, Џек Антоноф, Џиџи Хадид и Бредли Купер, како и блиски пријатели од страната на Келси. Просторот бил исполнет со цвеќе и зеленило, а фотографиите од подготовките покажуваат дека организаторите се обидуваат индустрискиот амбиент на арената целосно да го преобразат.

За главниот ден е подготвен прецизен десетчасовен распоред. Вратите за гостите треба да се отворат во 15.30 часот, коктелот е планиран за 16 часот на шестиот кат, а церемонијата за 17.30 часот на подот на арената. Приемот треба да започне во 18.30 часот, а забавата, според информациите што протекоа во медиумите, ќе продолжи до 2 часот по полноќ.

Се очекува Свифт во текот на вечерта да промени неколку фустани и модни комбинации, по моделот на нејзините сценски трансформации на турнејата „Ерас“.

„Медисон Сквер Гарден“ во свадбено руво

Околу декорацијата со денови кружат различни информации. Во „Медисон сквер гарден“ беа внесувани огромни бели скали, големи количества зеленило, ткаенини за прекривање на внатрешните ѕидови и други конструкции. Се појавија и информации дека во арената се гради огромен дворец од бајките, но извор на People го демантираше тоа тврдење, објаснувајќи дека конструкцијата „не е дворец“, иако изгледа многу посебно.

На дел од доставените материјали стоела шифрираната ознака „Гарден парти“, што дополнително ја разгоре љубопитноста на медиумите и обожавателите. Списокот на гости личи на пресек на американската музичка, филмска, модна и спортска елита. Меѓу очекуваните гости се Селена Гомез, Сабрина Карпентер, Ед Ширан, Зои Кравиц, Џиџи Хадид, Суки Вотерхаус, сестрите Есте, Даниел и Алана Хаим, Ема Стоун, Софи Тарнер, Кара Делевињ и Карли Клос. Од страната на младоженецот се очекуваат бројни соиграчи и пријатели од НФЛ, како и луѓе од стручниот штаб на Канзас Сити Чифс. Медиумите шпекулираат и за можни настапи на Стиви Никс и Тим Мекгро, а се споменуваше и името на Пол Макартни. Посебна приказна се мерките за тајност и безбедност.

Taylor Swift and Travis Kelce are expected to celebrate their wedding this holiday weekend in New York City, with a rehearsal dinner Thursday and a ceremony and reception Friday at Madison Square Garden, according to two law enforcement sources familiar with the security plans.… pic.twitter.com/4CX7X85yHl

— CBS Evening News with Tony Dokoupil (@CBSEveningNews) June 30, 2026

Околу арената се воведени ограничувања во сообраќајот, а улиците во непосредната околина се под засилено полициско обезбедување. Според „Гардијан“, ангажирани се повеќе од 130 полицајци, додека од гостите, според медиумските извештаи, се бара строга дискреција, потпишување договори за доверливост и избегнување употреба на мобилни телефони за снимање во одредени делови од прославата. Изборот на „Медисон сквер гарден“ се објаснува и со можноста славните гости да пристигнуваат и заминуваат преку затворени и подземни пристапи, далеку од папараците.

Возбуден е и градоначалникот Зохран Мамдани

Возбудата во Њујорк е огромна, а свадбата се одржува во особено бурен викенд: градот се подготвува за прославата на 250-годишнината од американската независност, истовремено со топлотен бран и голем број туристи.

Градоначалникот Зохран Мамдани дури се пошегува на прес-конференција, советувајќи ги Њујорчани да останат во климатизирани простории и додавајќи дека „ако случајно се венчавате во Медисон сквер гарден, ќе бидете внатре и ќе ви биде свежо“. Неговата забелешка беше сфатена како уште една индиректна потврда за настанот што со недели се чуваше во тајност.

А што има во манџата?

Пред арената веќе се собираат љубопитни граѓани, туристи и обожаватели на Свифт, а секое пристигнување на камион, секое парче декорација и секое затемнето возило стануваат вест на социјалните мрежи. Американските медиуми атмосферата ја споредуваат со мешавина од кралска свадба и Битлманија.

Дополнителен интерес предизвикува фактот што ниту Свифт ниту Келси јавно не ги потврдуваат деталите, па практично секој час се појавуваат нови информации, деманти и шпекулации. Дури и храната стана предмет на медиумско следење. Фоторепортерите регистрираа испораки на големи количества намирници и готови производи, од месо и морски плодови до зеленчук, млечни производи и слатки. Засега нема официјално објавено мени, но обемот на доставите покажува колку е сложена логистиката за прослава со повеќе од илјада гости. За настанот се подготвува цела мала индустрија од кетеринг-компании, декоратери, обезбедување, музичари и технички екипи.

Свадбениот викенд е кулминација на љубовната приказна што започна во 2023 година и брзо прерасна во еден од најследените односи во светот на забавата и спортот. Без оглед дали Тејлор Свифт и Тревис Келси веќе тајно ги размениле брачните завети или тоа ќе го направат пред гостите во Њујорк, спектаклот во „Медисон сквер гарден“ веќе има статус на глобален поп-културен настан.

Во градот каде што секојдневно се случуваат големи настани, овој викенд сепак има само една тема за која зборуваат сите — свадбата на најпознатата пејачка на светот и една од најголемите ѕвезди на американскиот фудбал.

The post 📽️ АМЕРИКАНСКАТА СВАДБА НА ВЕКОТ ОВОЈ ВИКЕНД ВО ЊУЈОРК Тејлор Свифт и Тревис Келси подготвуваат десетчасовен спектакл со 1.000 гости appeared first on plusinfo.mk.

Европа сè уште ги сумира последиците од рекордниот топлотен бран што го одбележа крајот на јуни, додека метеоролозите веќе предупредуваат дека по краткото освежување следува нов период на екстремни горештини.

Најновите прогнози покажуваат дека од викендот, а особено во периодот меѓу 6 и 10 јули, таканаречената топлинска купола повторно ќе се прошири над голем дел од континентот, при што Балканот повторно ќе биде меѓу најпогодените региони.

Првичните здравствени проценки покажуваат дека екстремните температури веќе оставиле тешки последици. Само во четири европски земји – Шпанија, Франција, Германија и Холандија – досега се регистрирани повеќе од 3.200 жртви или со жештините поврзани смртни случаи. Експертите предупредуваат дека ова не е конечна бројка, бидејќи дел од државите, меѓу нив и Италија, сè уште не ги објавиле своите конечни анализи за влијанието на топлотниот бран врз смртноста.

Најтешка е состојбата во Шпанија, каде здравствените власти проценуваат дека рекордниот јунски топлотен бран е поврзан со повеќе од 1.000 дополнителни смртни случаи. Најголем дел од жртвите се лица постари од 65 години, но лекарите предупредуваат дека сериозен ризик постои и за хронично болните, како и за луѓето кои работат на отворено.

Во Франција, според првичните проценки, исто така се регистрирани околу 1.000 дополнителни смртни случаи поврзани со екстремната жега. Земјата се соочи и со десетици случаи на топлотен удар, серија шумски пожари и сериозен притисок врз здравствениот систем, особено во јужните департмани.

Германските здравствени институции проценуваат дека за време на топлотниот бран починале повеќе од 800 луѓе, претежно поради влошување на кардиоваскуларните и респираторните заболувања.

Во Холандија, пак, националната статистика регистрираше речиси 500 дополнителни смртни случаи во најжешките денови, што уште еднаш покажа колку опасни можат да бидат екстремните температури, дури и во земји со умерена клима.

Според Светската метеоролошка организација и европската програма „Коперник“, екстремните топлотни бранови веќе не се исклучок, туку стануваат сè почеста појава. Климатските промени ги прават ваквите периоди на жештини подолги, поинтензивни и посмртоносни, особено во големите градови каде што бетонските површини дополнително ја задржуваат топлината.

По краткотрајното освежување што ќе зафати делови од Западна Европа, од 4 или 5 јули повторно ќе почне да се засилува антициклонот над Медитеранот. Според актуелните прогностички модели, најсилниот удар на вториот топлотен бран се очекува меѓу 6 и 10 јули, кога температурите во повеќе земји повторно би можеле да надминат 40 Целзиусови степени.

Најизложени на новиот топлотен бран ќе бидат северна Италија, Хрватска, Србија, Босна и Херцеговина, Црна Гора, Македонија, Бугарија, Грција, Романија и Унгарија, како и делови од Полска и од Украина.

Метеоролозите предупредуваат дека најголем проблем повторно ќе бидат тропските ноќи, кога температурата нема да се спушта под 24 или 25 степени, што значително го зголемува ризикот за повозрасните и за хронично болните лица.

Европските здравствени служби затоа повторно апелираат граѓаните да избегнуваат изложување на сонце во најтоплиот дел од денот, редовно да внесуваат течности и да обрнат посебно внимание на постарите членови на семејството и на малите деца. Ако прогнозите се потврдат, првата половина на јули би можела да донесе ново сериозно тестирање на здравствените системи ширум Европа.

The post ПРЕТСТОЈНИОТ ЈУЛСКИ ТОПЛОТЕН БРАН ПОСИЛНО ЌЕ ГО УДРИ БАЛКАНОТ Европа сè уште ги брои жртвите од јунските горештини appeared first on plusinfo.mk.

Во Србија сѐ поотворено се зборува за несогласувањата меѓу студентското движење, кое повеќе од една година ги организира блокадите и протестите, и дел од парламентарната опозиција. Иако и едните и другите бараат политички промени и одговорност за трагедијата во Нови Сад, различните ставови околу настапот на претстојните парламентарни избори открија сериозни разлики во стратегијата.

Последните денови јавната расправа дополнително се засили по реакциите околу таканаречената студентска изборна листа. Дел од опозициските партии најавија дека се подготвени целосно да ја поддржат листата и дури да не кандидираат свои кандидати, додека други сметаат дека таквиот пристап може да ја ослабне целокупната опозиција.

Три сценарија за настап на изборите

Во исто време, во самото студентско движење се појавија критики за недоволно јасен политички план и за начинот на донесување одлуки.

Копретседателот на Зелено-левиот фронт, Радомир Лазовиќ, јавно порача дека неговата партија ќе ја поддржи студентската листа и доколку парламентарните избори бидат распишани наесен или во зима. „Подготвени сме да ја поддржиме студентската листа, а тоа може да значи и дека нема да излеземе со сопствена листа“, изјави Лазовиќ за телевизијата Н1.

Таквиот став, меѓутоа, не е прифатен од целата опозиција. По серијата состаноци на повеќе опозициски партии не беше постигнат договор за заеднички настап.

Според информации на српските медиуми, се разгледуваат најмалку три сценарија – единствена опозициска листа, повеќе идеолошки блокови или целосна поддршка на студентската листа без партиско кандидирање.

Опозициските партии само логистика – на што личи тоа?!

Дополнителна неизвесност внесуваат и пораките што доаѓаат од дел од студентските активисти. Според медиумските извештаи, има гласови кои сметаат дека опозициските партии не треба да го преземат водството на движењето на протестите, туку само да обезбедат логистичка поддршка. Во јавноста се појавија и критики дека движењето нема доволно разработен политички план за периодот по изборите.

Од друга страна, провладините медиуми овие разлики ги претставуваат како доказ за „хаос“ и „отворен судир“ во антивладиниот блок, тврдејќи дека студентските блокади стануваат товар за опозицијата. Таквите оценки, сепак, се оспоруваат од дел од независните медиуми, кои наведуваат дека разговорите меѓу опозициските партии продолжуваат и дека конечната изборна стратегија сѐ уште не е договорена.

Владан Ѓокиќ на чело на студентската листа?

Политичката криза во Србија трае од трагедијата на железничката станица во Нови Сад, по што започнаа масовни студентски протести и блокади на универзитетите. Протестното движење постепено прерасна во поширока граѓанска кампања против власта, со барања за институционална одговорност, владеење на правото и распишување избори.

Во центарот на вниманието е и ректорот на Универзитет во Белград, Владан Ѓокиќ, чие име со месеци се споменува како можен симбол на студентската листа. Тој претходно изјави дека неговата евентуална политичка улога ќе зависи од одлуката на студентите и граѓаните, без да потврди дали лично ќе учествува на изборите.

Не се знае кога ќе бидат изборите, но кампањата е во полн ек

Претседателот на Србија, Александар Вучиќ, веќе неколку пати најавува дека парламентарните избори ќе бидат распишани кога ќе оцени дека се исполнети политичките услови. Иако точниот датум сѐ уште не е официјално утврден, сите политички актери веќе практично водат предизборна кампања.

Анкетите покажуваат дека евентуалната студентска листа би можела да освои значителна поддршка и да стане најсилниот опозициски фактор, но само доколку успее да го задржи единството и довербата кај гласачите. Токму затоа, начинот на кој ќе се решат сегашните несогласувања меѓу студентите и опозициските партии може да има пресудно влијание врз исходот на следните парламентарни избори во Србија.

The post ФАТАЛНИ ПУКНАТИНИ ВО АНТИВУЧИЌЕВИОТ БЛОК? Студентите блокадери и опозицијата сѐ потешко наоѓаат заеднички јазик пред изборите appeared first on plusinfo.mk.

Туристите кои деновиве летуваат во Северна Грција сè почесто споделуваат предупредувања на социјалните мрежи за присуството на т.н. „риба змеј“ (dragon fish), позната и како дракена. Еден од најсподелуваните постови се однесува на плажата Амолофи, во близина на Кавала, каде посетители тврдат дека забележале примероци од оваа риба во плиткото море.

Иако нејзиниот убод е исклучително болен, експертите нагласуваат дека нема причина за паника – станува збор за вид кој одамна живее во Средоземното Море и не е нов инвазивен вид. Рибата змеј, научно позната како weever fish (семејство Trachinidae), најчесто достигнува должина од 10 до 15 сантиметри.

Таа има песочна боја и речиси целосно се закопува во песокот, оставајќи ги надвор само очите и отровните боцки на грбот. Поради тоа е речиси невозможно да се забележи додека човек влегува во морето, а до убод најчесто доаѓа кога некој случајно ќе нагази на неа. И покрај застрашувачкото име, дракената не е агресивна и не ги напаѓа луѓето.

@fishingexperiences Δρακαινα ψαρι #δρακαινα #ψαρι #ψαρια #ψαρεμα #voukelatosfishingexperiences #Greece ♬ Paradise – Tony Dark Eyes

Отровот го користи исклучиво за одбрана. Убодот предизвикува силна, остра болка која обично се засилува во првите триесетина минути. Кај чувствителни лица може да се појават и потење, мачнина, вртоглавица или слабост, но смртни случаи се исклучително ретки. Она што е важно да се нагласи е дека ова не е инвазивен вид, како што е рибата зајак (Lagocephalus sceleratus), која последниве години се шири во источниот Медитеран.

Дракената е автохтон, односно природно распространет вид во Средоземното, Егејското и во Јадранското Море и со векови е дел од локалниот морски екосистем. Дури и грчките рибари ја ловат за исхрана, но претходно внимателно ги отстрануваат отровните боцки. Освен кај Амолофи, вакви пријави има и од други песочни плажи во северниот дел на Егејското Море, особено во регионот на Кавала, Тасос и Халкидики.

Локалните туристички портали наведуваат дека дракената може да се сретне практично на сите песочни плажи во Грција, но повеќе случаи се пријавуваат на места со плитко, мирно море и песочно дно, каде што рибата лесно се закопува. Туристите не треба да се откажуваат од капење, туку да преземат едноставни мерки на претпазливост.

Најдобро е во плиткото да се носат обувки за вода, а при влегување во морето наместо големи чекори да се прават мали движења со стапалата по песокот. Така рибата најчесто сама се оттурнува и се избегнува нагазување. Доколку сепак дојде до убод, лекарите советуваат погоденото место што побрзо да се потопи во топла вода – колку што може да се издржи без да се предизвика изгореница. Отровот е чувствителен на висока температура, па топлината значително ја намалува болката.

Потоа се препорачува преглед во најблиската здравствена установа, особено ако се појават посилни симптоми или алергиска реакција. Грчките туристички служби потсетуваат дека случаите на убод од дракена се релативно ретки ако се земе предвид огромниот број капачи секое лето. Затоа, присуството на оваа риба не треба да биде причина за страв, туку само потсетник дека и во морето, како и во природата воопшто, внимателното однесување е најдобрата заштита.

The post 📽️ И РИБА ЗМЕЈ ГИ ПЛАШИ ТУРИСТИТЕ ВО СЕВЕРНА ГРЦИЈА Еве што треба да знаете ако летувате на Тасос, на плажите кај Кавала и на Халкидики appeared first on plusinfo.mk.

Додека Европа се соочува со рекордни температури и топлотни бранови во кои термометрите надминуваат 40 Целзиусови степени, климатизацијата стана нова политичка и идеолошка линија на поделба.

Наместо расправа само за тоа како да се заштитат граѓаните од жештините, во Франција, Велика Британија и во други европски земји се води жестока дебата дали клима-уредите воопшто треба масовно да се користат. Левицата и зелените предупредуваат дека тие ја продлабочуваат климатската криза, додека десницата ги обвинува за идеолошки фанатизам и за напад врз секојдневниот живот на луѓето.

Масло на огнот долеа британската новинарка Ема Бедингтон, која во „Гардијан“ оцени дека климатизацијата е не само еколошки, туку и „филозофски проблематична“. Според неа, клима-уредите создаваат лажна удобност и чувство дека човекот може да се изолира од последиците на глобалното затоплување, наместо да се соочи со неговите причини.

Слични ставови подолго време застапуваат и дел од француските левичари и екологисти. Лидерот на радикалната левица, Жан-Лик Меланшон, смета дека масовното поставување клима-уреди не е решение, туку нов проблем. Наместо тоа, предлага подобра изолација на зградите, повеќе паркови, дрвореди и архитектура која природно ја намалува температурата во градовите. Во истата насока настапи и француската министерка за еколошка транзиција Ањес Пание-Ринаше.

Таа порача дека климатизацијата е неопходна за болниците, домовите за стари лица и за другите ранливи категории, но предупреди дека „не смее да се поставува насекаде“, бидејќи климатизерите ја зголемуваат температурата на надворешниот воздух и не претставуваат долгорочно решение за климатските промени. Наместо тоа, според неа, приоритет треба да бидат енергетската ефикасност, изолацијата и адаптацијата на градовите кон новите климатски услови.

Во средиштето на француската полемика се најде и министерката за еколошка транзиција Моник Барбу, која изјави дека е „згрозена“ од повиците за масовно поставување клима-уреди „насекаде“. Таа предупреди дека климатизацијата не може да биде одговор на сите последици од жештините и праша што, всушност, ќе спречат клима-уредите – шумски пожар, суша или уништување на земјоделски култури. Барбу тврди и дека масовната климатизација во Париз би можела дополнително да ја зголеми температурата на ниво на улица за 2 до 3 степени, што ја прави, според неа, ризично и кратковидо решение во борбата со топлотните бранови.

Десницата, пак, ја искористи оваа дебата за силен политички напад. Лидерката на француската крајна десница, Марин Ле Пен, побара национален план за климатизација на училиштата, болниците, домовите за стари лица и јавните институции, обвинувајќи ја власта дека ја жртвува безбедноста на граѓаните во име на идеологијата. Така клима-уредите станаа дел од пошироката политичка пресметка околу климатските политики.

Десничарските партии тврдат дека европската зелена агенда сè почесто се претвора во ограничување на секојдневниот живот, додека левицата возвраќа дека токму неконтролираната потрошувачка и зависноста од климатизација дополнително ја влошуваат кризата.

И како иронија на целата расправа, токму седиштето на Европската комисија во Брисел стана пример за новиот „климатски класен јаз“. За време на топлотниот бран, во зградата Берлејмон била исклучена климатизацијата на првите седум ката, каде работат илјадници службеници, додека на повисоките катови, каде се канцелариите на претседателката Урсула фон дер Лајен и еврокомесарите, ладењето продолжило да функционира.

Дел од вработените тоа го опишале како „феудализам“, оценувајќи дека европските институции и на прашањето за климата покажале дека правилата не важат еднакво за сите.

Иако Европа традиционално има многу помалку клима-уреди отколку САД, рекордните горештини веќе ја менуваат таа слика. Во последните години продажбата на климатизери расте во Франција, Германија и Велика Британија, бидејќи летата стануваат сè потопли, а топлотните бранови сè подолги и поопасни.

Повеќето климатолози денес предупредуваат дека расправата не треба да се сведува на дилемата „за“ или „против“ клима-уредите. Тие сметаат дека климатизацијата ќе биде неопходна за заштита на најранливите категории население, но дека истовремено мора да се инвестира во поефикасни технологии, подобра изолација, повеќе зеленило и урбанистички решенија што природно ја намалуваат температурата.

The post НЕ ВКЛУЧУВАЈТЕ КЛИМИ, ГО ЗАГРЕВАТЕ СВЕТОТ?! Европската левица отвори нов идеолошки фронт против здравиот разум  appeared first on plusinfo.mk.

Градоначалникот на Њујорк, Зохран Мамдани, привлече големо внимание откако свечено ја отвори летната сезона на градските базени со необичен потег – облечен во темно одело, кошула и вратоврска скокна во базенот „Томас Џеферсон“ во Источен Харлем.

Станува збор за стара градска традиција што не била практикувана повеќе од една деценија. Со симболичниот скок беше означен почетокот на работата на повеќе од 50 јавни отворени базени во Њујорк, кои ќе бидат достапни за граѓаните во текот на летото.

Градските власти со настанот одбележаа и 90 години од отворањето на првите јавни базени во градот, а Мамдани порача дека тие се важен простор за рекреација, безбедност и разладување во жешките летни денови.

The post 🎥 ВАКА СЕ КАПЕ ГРАДОНАЧАЛНИКОТ НА ЊУЈОРК Во одело скокна во базен и ја отвори сезоната appeared first on plusinfo.mk.

Одлуката на српската телевизија Хепи ТВ да воведе водители генерирани со вештачка интелигенција во информативната програма предизвика жестока дебата во Србија. Новинарските здруженија, медиумските експерти и дел од јавноста предупредуваат дека гледачите не биле јасно известени дека лицата што ги читаат вестите не се вистински луѓе, туку дигитално создадени аватари.

Виртуелните презентери, претставени како Бојана Филиповиќ и Марко Поповиќ, се појавија во редовните информативни емисии на телевизијата со национална фреквенција. Според Здружението на новинари на Србија (УНС), станува збор за прв ваков случај во земјата, што веднаш отвори прашања за транспарентноста, професионалната етика и довербата на публиката.

Што велат критичарите?

Критичарите не го оспоруваат користењето на вештачката интелигенција како технологија. Нивната главна забелешка е што гледачите не биле јасно предупредени дека пред нив не се вистински телевизиски водители. Новиот Кодекс на новинарите и новинарките во Србија предвидува медиумите транспарентно да ја означуваат употребата на АИ во создавањето медиумски содржини, а соговорниците на весникот „Данас” сметаат дека во овој случај јавноста била доведена во заблуда.

Од Хепи ТВ, пак, тврдат дека виртуелните водители не ги заменуваат новинарите и уредниците. Според нив, зад секоја информација и натаму стојат новинари, редактори и професионални тимови кои ги подготвуваат, проверуваат и уредуваат вестите, додека вештачката интелигенција служи само како нов начин на презентација на содржините.

 

View this post on Instagram

 

A post shared by Miroslav Miletic (@izglave)

Во расправата се вклучи и Регулаторното тело за електронски медиуми (РЕМ). Од оваа институција потсетуваат дека уште во 2023 година предупредиле дека содржините создадени со помош на вештачка интелигенција мора јасно да бидат означени, особено кога станува збор за информативна програма. Сепак, РЕМ засега не може да донесе конкретна одлука за случајот бидејќи неговиот Совет сè уште не е целосно конституиран.

Експертите предупредуваат и на друга опасност – можното влијание врз професијата. Ако виртуелните презентери можат да читаат вести 24 часа дневно без грешка, без хонорар и без одмор, дел од новинарската заедница стравува дека со текот на времето тие би можеле да ги заменат не само телевизиските спикери, туку и дел од другите редакциски работни места. Технолошките компании, пак, уверуваат дека вештачката интелигенција треба да биде алатка што ќе им помага на новинарите, а не средство за нивна замена.

Експериментираат и други медиуми во светот

Иако случајот со Хепи ТВ предизвика силни реакции, Србија не е првата земја што експериментира со вакви решенија. Кина уште пред неколку години воведе АИ телевизиски водители во државните медиуми, кои читаат вести и емитуваат информации во различни термини. Во Велика Британија, пак, Channel 4 реализираше експериментален проект со АИ презентер, пред сè за да ги испита можностите и границите на новата технологија.

Слични тестирања веќе се појавуваат и во локални телевизии, дигитални редакции и онлајн медиуми ширум светот. Причината е едноставна – технологијата станува сè подобра, поевтина и побрза. Денешните АИ аватари веќе можат природно да зборуваат, да менуваат интонација, да читаат вести на повеќе јазици и речиси без забележливи грешки да имитираат човечки изрази.

Сè повеќе медиумски аналитичари сметаат дека вештачката интелигенција веќе стана дел од телевизиското новинарство. Затоа, фокусот на дебатата постепено се префрла на правилата според кои ќе се користи и на обврската публиката секогаш да знае кога гледа човек, а кога дигитален аватар. Токму довербата останува најважната валута на секој информативен медиум.

Хепи ТВ веројатно нема да остане осамен пример. Ако сегашното темпо на развој продолжи, АИ водителите би можеле да станат вообичаена појава во телевизиските студија ширум светот. Успехот на оваа технологија, сепак, ќе зависи од тоа дали медиумите ќе успеат да ја задржат транспарентноста и кредибилитетот – вредности без кои новинарството ја губи својата суштинска улога.

The post 📽️ ВЕШТАЧКА ИНТЕЛИГЕНЦИЈА НА МАЛИТЕ ЕКРАНИ Хепи ТВ предизвика бура со АИ водителите Бојана и Марко, дали ова е иднината на телевизиските вести? appeared first on plusinfo.mk.

Турските истражни органи проверуваат дали наводно каснување од мајмун во Тајланд има врска со смртта на актерката Еџе Иртем (35), позната по улогата во серијата „Шербет од брусница“.

Според турските медиуми, актерката починала кратко по враќањето од одмор, а нејзиното семејство побарало овој детал да биде вклучен во истрагата.

На младата актерка ѝ се слошило утрото по роденденот, во нејзиниот дом, додека била заедно со својата мајка. Брзата помош која пристигнала не успеала да ја реанимира по силниот срцев удар.

Мајката на Иртем изјавила дека нејзината ќерка имала сериозни стомачни проблеми уште за време на патувањето, а состојбата дополнително се влошила на нејзиниот роденден.

Адвокатот спомнал можна сепса

Правните застапници на семејството доставиле документација до обвинителството во Истанбул, при што биле посочени и видливи траги на нејзината рака.

– Во текот на разговорите со експертите дознавме дека каснување од мајмун може да предизвика тешки компликации, па дури и сепса – изјавил адвокатот Угур Гокојун.

Експертите повикуваат на претпазливост

Специјалистот за заразни болести Мехмет Џејхан предупредил дека е прерано да се извлекуваат заклучоци.

Тој посочил дека мајмуните можат да пренесуваат опасни вируси и бактерии, но ваквите смртни исходи се исклучително ретки и дека треба да се разгледаат и други можни причини, вклучително и евентуални срцеви проблеми.

Надлежните институции апелираа да не се шират непотврдени информации додека не бидат објавени официјалните резултати од обдукцијата.

ШОКАНТНА СМРТ НА МЛАДАТА ТУРСКА АКТЕРКА Еџе Иртем почина само неколку часа откако наполни 35 години

The post KОНТРОВЕРЗИИ ЗА СМРТТА НА ПОЗНАТАТА ТУРСКА АКТЕРКА Дали каснување од мајмун ѝ ја влошило состојбата? appeared first on plusinfo.mk.

Додека репрезентацијата на Ел Салвадор не успеа да избори место на Светското првенство, една огромна фудбалска топка сепак успеа да стигне во центарот на вниманието.

Силно невреме во Сан Салвадор откорнало џиновски надувувачки реквизит поставен по повод Мундијалот, по што топката почнала сама да се движи низ прометна улица.

Снимката за кусо време стана хит на социјалните мрежи.

Според британскиот „Сан“, топката била поставена пред трговскиот центар „Бамбу“. Силен ветер ја оттурнал преку четири сообраќајни ленти.

A giant inflatable World Cup soccer ball broke free and rolled through the streets of San Salvador during heavy rain and strong winds pic.twitter.com/nHy8GQySVt

— AccuWeather (@accuweather) June 15, 2026

Еден возач во последен момент успеал да закочи. Топката потоа удрила во палма и ја сменила насоката.

Неколку секунди подоцна завршила право пред камион што доаѓал од спротивната страна.

На видеото се гледа како огромниот реквизит челно удира во камионот. Потоа отскокнува и завршува на неговиот покрив.

За среќа, нема информации за повредени лица ниту за поголема материјална штета. Но, возачите сигурно нема брзо да го заборават натпреварот што им го приреди една залутана фудбалска топка.

The post 📽️ НЕ СЕ ПЛАСИРАА НА СВЕТСКО? БАРЕМ ИМААТ ТОПКА-БЕГАЛЕЦ Џиновски реквизит ќе направеше хаос во Ел Салвадор appeared first on plusinfo.mk.