Црногорскиот фудбалски стручњак, Миодраг Божовиќ – Гроф од денеска и официјално е нов тренер на Вардар.

Божовиќ доаѓа на местото на Аргентинецот Фабијани кој ги предводеше „црвено-црните“ на почетокот на сезоната и не ги исполни очекувањата.

Во својата богата интернационална кариера Божовиќ има трофеј во Купот на Русија со Ростов и стана шампион во Србија со Црвена ѕвезда.

Со македонскиот фудбалски шампион Божовиќ потпиша договор со важност до 2028 година.

Последен клуб кој го водел Црногорецот беше Будуќност.

The post ГРОФ СТАНА НОВ ТРЕНЕР НА ВАРДАР Божовиќ потпиша договор со важност до 2028 година appeared first on plusinfo.mk.

Научниците откриле дека првите облици на измамничко однесување може да се појават уште пред првиот роденден, иако, како што велат, тоа не се вистински лаги како кај возрасните.

Кога ќе помислиме на лажење, обично замислуваме постаро дете кое намерно крие нешто или кажува невистина за да избегне казна. Но, ново истражување покажува дека корените на измамничкото однесување се појавуваат многу порано – дури и пред детето да го каже својот прв збор.

Истражувањето, предводено од научници од Универзитетот во Бристол, покажува дека околу една четвртина од децата почнуваат да ја разбираат измамата уште на 10-месечна возраст. До 17 месеци, такво разбирање покажуваат околу половина од децата. До третата година, децата стануваат сè повешти, покреативни и почесто користат различни форми на измама.

Научниците, сепак, нагласуваат дека зборот „лага“ треба да се користи внимателно кога станува збор за бебиња. Тие не зборуваат за свесно и промислено лажење како кај возрасните, туку за рани облици на однесување со кои детето се обидува да влијае врз тоа што друг човек ќе направи или ќе мисли.

Повеќе за ова прочитајте ТУКА.

The post БЕБИЊАТА ПОЧНУВААТ ДА ЛАЖАТ ПОРАНО ОТКОЛКУ ШТО СЕ МИСЛЕШЕ Лажењето може да биде знак за развој на интелигенцијата appeared first on plusinfo.mk.

Кривичниот суд му одреди 30-дневен притвор на 19-годишникот кој завчера учествуваше во крвавата тепачка во скопската населба Чаир, во која тој и неговиот малолетен брат на 13-годишна возраст им нанесоа убодни рани на три лица, од кои двајца малолетни. Од Судот информираат дека притворот му е изречен по сите 3 законски основи: опасност од бегство, можност да влијае врз сведоците и опасност да го повтори делото.

„Судија на претходна постапка при Основниот кривичен суд Скопје, постапувајќи по предлог на Основното јавно обвинителство Скопје за определување мерка за обезбедување присуство против 19-годишниот Б.И. од Скопје, осомничен за насилство врз дете во скопската населба Чаир, по неговото произнесување во однос на предлогот, донесе решение со кое му определи мерка притвор во траење од 30 дена. Б.И. е осомничен за кривичното дело Насилство од член 386 став 6 во врска со став 3 од Кривичниот законик“, соопшти Судот.

13-годишниот брат на притворениот нема кривично да одговара и покрај тоа што, според полициското соопштение, токму тој ги избол трите лица, меѓу кои и 13-годишното дете кое е во животозагрозувачка состојба затоа што го пробол во срцето.

Од Јавното обвинителство вчера соопштија дека 13-годишникот не подлежи на кривична одговорност.

„Осомничениот 19-годишник и неговиот малолетен брат кој е под законската граница за кривична одговорност преземале дејствија на насилство со кои на едно дете и на едно полнолетно лице им биле нанесени тешки телесни повреди со убоди од нож, а полесно било повредено уште едно дете. Во јавноста и кај присутните лица предизвикувале чувство на несигурност, загрозување, страв и вознемиреност. Јавниот обвинител до судијата на претходна постапка достави предлог за определување мерка притвор за осомничениот полнолетник“, се вели во соопштението од Обвинителството.

Од полицијата, пак, вчера информираа дека токму 13-годишникот ги избол трите лица. Тепачката се случила на 31 август околу 22 часот, во која Б.И.(19) и неговиот 13-годишен брат со нож повредиле лица на возраст од 13, 16 и 19 години. 13-годишникот е во критична состојба, а тешко е повреден и 19-годишниот И.З..

„На 1.9.2026 година полициски службеници од Единицата за насилен криминал при СВР Скопје ги приведоа Б.И.(19) и 13-годишник, двајцата од Скопје, постапувајќи по пријава дека на 31.8.2026 околу 22 часот на територија на Чаир, настанала физичка пресметка помеѓу двете лица од една страна и И.З.(19), 13-годишник и 16-годишни, сите од Скопје, од друга страна. Притоа 13-годишникот, кој е приведен, со нож им нанел убодни рани на трите лица од спротивната страна“, соопшти полицијата.

Министерот за здравство Сашо Клековски вчера информираше дека повреденото дете е во критична состојба и има убодна рана во срцето. Тој веднаш е опериран и е на интензивна нега.

Министерот за внатрешни работи Панче Тошковски ги оцени настанот како страшен случај на врсничко насилство.

Според законите во Македонија, 13-годишниот насилник нема кривично да одговара. Може да му изрече одредени мерки Центарот за социјални работи. Надлежните велат дека Центарот за социјални работи е известен за настанот и за улогата на малолетникот во кривичниот настан.

Според Законот за правда за децата во Македонија лице кое во моментот на извршувањето на дејствието не наполнило 14 години не може да биде кривично санкционирано, без оглед на тоа колку е тешко дејствието што го извршило. Законот прецизно предвидува дека кон дете под 14 години „не може да се примени санкција“ за дејствие кое со закон е предвидено како кривично дело или прекршок. Ако во текот на постапката се утврди дека детето било помладо од 14 години во моментот на извршувањето на дејствието, постапката се запира, а за случајот се известува надлежниот центар за социјална работа. Потоа може да се применуваат мерки на помош и заштита, во зависност од процената на ризикот и најдобриот интерес на детето, но тие не претставуваат кривична казна или кривична санкција. Кривичноправниот режим за деца почнува од 14-годишна возраст. За деца од 14 до 16 години законот предвидува воспитни мерки, додека за постарите деца, од 16 до 18 години, под строго определени услови може да се применат и потешки санкции.

Министерот Тошковски вчера изјави дека „ваквите ужасни сцени од аспект на кривични дела претставуваат предизвик не само за држави како нашата, туку и за големите и развиени земји членки на Европската Унија“.

– Станува збор за сторување на ужасно насилни кривични дела од страна на малолетници каде што кривично-правниот општествен одговор е многу поинаков, отколку кога станува збор за одговор насочен спрема полнолетни лица. Овде мораме како општество малку подлабоко да навлеземе и мора да има поширок институционален одговор – и од страна на надлежните министерства, и од сите општествени чинители, од родителите, социјалните центри, МВР, Министерството за социјална политика, демографија и млади, Министерството за образование, здравствените центри и Министерството за здравство. Навистина ова е еден од најужасните предизвици коишто ги имаме пред нас – порача министерот Тошковски.

The post 13-ГОДИШНИКОТ КОЈ ПРОБОДЕ ВРСНИК ВО СРЦЕТО НЕМА КРИВИЧНО ДА ОДГОВАРА Неговиот 19-годишен брат е во 30-дневен притвор appeared first on plusinfo.mk.

Електронските цигари во јавната дебата често се претставуваат како можен пат кон традиционалните цигари, но научните сознанија даваат сосема поинаква перспектива: на возрасните пушачи, електронските цигари можат да им помогнат да се откажат од цигарите. Ова го потврди и Кокрејн, една од најпознатите независни мрежи за систематско анализирање на медицински докази, која спроведе сериозна научна анализа по ова прашање. Во својот најнов преглед на електронските цигари и откажувањето од пушење, Кокрејн анализираше 80 завршени студии во кои учествуваа над 30.000 лица.

Заклучокот од обемната анализа е јасен: електронските цигари со никотин се поефикасни при откажувањето од цигарите, отколку традиционалните методи како што се никотински фластери, мастики и центри за советување. Анализата покажа дека со користењето на електронски цигари, стапката на успех при одвикнување се зголемува за околу 60 отсто, односно секој шести од 100 пушачи успеал да се откаже.

Овој резултат покажува важна патека на користење од традиционалните цигари кон електронски, со крајна цел – откажување од пушење. Сепак, тоа не значи дека електронските цигари се без ризик или дека треба да ги користат непушачи. Напротив, анализата на Кокрејн нагласува дека се потребни подолгорочни истражувања за целосно да се проценат здравствените ефекти, особено кај поновите уреди. Но, не открива докази за сериозна краткорочна штета од електронски цигари во испитувањата кои беа предмет на анализа.

Науката дава позитивен сигнал дека за возрасен човек кој веќе пуши, електронската цигара може да биде алатка што ќе му помогне да се откаже од традиционалните цигари. Но и дека на електронските цигари не може да се гледа како нешто што отвора пат кон пушење. Ова е особено значајно кога се зборува за младите. Тука е важно да се избегне генерализација: не секој млад човек кој пробал електронска цигара станува пушач, како што ниту секој возрасен корисник на електронска цигара дошол до неа без претходно да пуши. Заштитата на малолетниците од тутунски и никотински производи е јасна и оправдана цел на секоја регулаторна политика. Малолетните лица и непушачите не треба да започнуваат да користат никотински производи, а продажбата на овие производи на лица под законската возраст треба да биде строго контролирана и санкционирана.

Но, ова прашање не треба да се решава со ограничување на пристапот за сите корисници. Кај малолетниците, главната цел е превенцијата, односно никако да не започнат. Кај возрасниот пушач, кој користи традиционални цигари и не сака да се откаже, прашањето е поинакво: како да му се помогне да се намали неговата изложеност на најштетните последици од пушењето?

Овие две политики не се спротивставени. Можно е да постојат строги правила за возраста, проверка на идентитетот, продажбата, маркетингот и достапноста на производите за малолетници, а истовремено возрасните пушачи да имаат пристап до регулирани алтернативи и точни информации за нивните разлики. Токму тоа е суштината на пристапот на намалување на штетата: не да се прогласат никотинските производи за безопасни, туку да се препознае разликата меѓу ризиците и да им се овозможи на возрасните пушачи да донесат информирана одлука.

Најдобрата опција секогаш останува целосно откажување. Но, додека милиони луѓе во светот продолжуваат да пушат, јавните политики мора да се занимаваат и со реалноста на оние кои не успеваат или не сакаат да престанат. Кај младите, тоа е превенција и строга регулација. Кај возрасните пушачи, пак, постои и друга можност која не треба да се занемари: преминот од традиционална цигара кон помалку штетна алтернатива.

The post НАУЧНА СТУДИЈА УТВРДИ ДЕКА ЕЛЕКТРОНСКИТЕ ЦИГАРИ СЕ ПОЕФИКАСНИ ЗА ОТКАЖУВАЊЕ ОД ПУШЕЊЕ Секој шести од 100 пушачи успеал да се откаже appeared first on plusinfo.mk.

Вкупно 63 општини во земјава, лани потрошиле 4.056.482 евра за разна финансиска помош и дотации за жителите во општините што е за еден милион евра повеќе од претходната година. Најмногу пари, половина милион евра, поделила скопската општина Аеродром. Најмногу граѓани со помошта опфатила скопска Гази Баба, покажува новата анализа на Центарот за граѓански комуникации. Реалната сума е сигурно и поголема, бидејќи две општини и Градот Скопје не одговориле на барањето на Центарот.

Според анализата со помошта се опфатени вкупно 58.290 граѓани, и во споредба со претходната година, бројката е зголемена за речиси 13.000 луѓе.

Пари се доделувани за вкупно 92 различни основи – од прво дете, првоодделенци, средношколци, млади, матуранти и сл. до лица во социјален ризик и пензионери. Исто така, доделувани се и училиштен прибор, ранци и дрва, а парична поддршка е давана и за купување велосипеди, тротинети, дигитални уреди, пелети и печки за пелети, клима уреди и сл. Субвенционирани се и сметки за комуналии, за полагање возачки, за превоз и за паркинг. Пари се давани за стапување во брак, за санација на покриви, за прозорци, за лифтови, за стипендии, а наградувани се првенци на генерација, најдобар наставник, полицаец, земјоделец, пожарникар и доктор.

Најмногу општини доделуваат парична помош е за секое новородено дете – за што пари даваат дури 50 општини, а 38 општини даваат пари и друга помош за првачиња. Највисок износ за првоодделенци, 8.000 денари, дава Општина Могила. За новороденчиња, најмногу пари, 30.000 денари дава Општина Старо Нагоричане.

Од другите основи, најмногу пари се доделувани за поправка на фасади и за замена на лифтови, над 200.000 денари.

Највисок поединечен износ што исплатила една општина е Конче, која дава по 100.000 денари на секое лице над 35 години кое стапило во брак.

Најмногу пари за вакви дотации лани исплатила Општина Аеродром, дури 552.387 евра. Следна е скопската општина Центар со 507.481 евро. По нив следат Кисела Вода со 461.989 евра и Гази Баба со 415.172 евра.

Скопската општина Гази Баба води според вкупниот број граѓани на кои им е исплатена некаква помош, 10.630, а речиси ист број граѓани, 10.511 се опфатени со помошта од Општина Кисела Вода.

Двете општини лани давале помош и за пензионери, и тоа ист износ, по 2.500 денари. Гази Баба исплатила 2.662 пензионери, а Кисела Вода 3.005. И Општина Центар давала помош за пензионерите, а во 2025 година вовела и училишни униформи кои ги поделила на 4.900 ученици.

Речиси нема општини кои исплатуваат помош за исти основи, освен можеби помошта за првачиња и новороденчиња. Исто така, нема воедначеност ни меѓу сумите што ги исплатуваат општините за иста основа. Пример, за новороденче се исплатуваат од 3.000 до 30.000 денари, а за прваче сумите се движат од 2.000 до 8.000 денари. И за првородено дете сумите се различни и тоа од 6.000 до 30.000 денари. Во категоријата „најдобар“ износите се движат од 5.000 за најдобар ученик до 30.000 за најдобар земјоделец.

Исто така се различни и програмите и буџетските категории од кои општините ја доделуваат паричната помош. Од ставката „градоначалник“, „субвенции и трансфери“, преку „социјална заштита“ и „социјални бенефиции“, до „заштита на животната средина“ и „образование“. И исплатите имаат различни називи и форми од општина до општина – „финансиска помош“,„финансиска поддршка“, „парична помош“, „дотација“, „субвенција“ и сл.

Она што останува нејасно е дали општините имаат ингеренции за вакви дотации и помоши, особено што од општина до општина се применуваат различни правила, процедури, постапки, износи и категории. Општините, во своите правилници  и одлуки за доделување на разните помоши, се повикуваат на различен член од Законот за локалната самоуправа. Сепак, најчесто еповикувањето на членот 36, став 1 каде што се наведени надлежностите на Светот на општината и точката 15 „Врши и други работи утврдени со закон“.

The post ОД ПОМОШ ЗА ПРВО ДЕТЕ, ПРЕКУ ПОДДРШКА ЗА ТРОТИНЕТ, ДО ПОПРАВКА НА ЛИФТОВИ Општините лани потрошиле над 4 милиони евра за помош на граѓаните appeared first on plusinfo.mk.

Раиф Диздаревиќ, поранешен претседател и член на Претседателството на СФРЈ, истакнат југословенски дипломат, политичар и учесник во НОБ, почина денеска во Сараево.

Диздаревиќ беше член на Претседателството на СФРЈ од Босна и Херцеговина. Беше учесник во НОБ и општествено-политички работник на СФР Југославија.

Извршуваше голем број високи државни функции – претседател на Претседателството на СР БиХ од 1978 до 1982 година и претседател на Собранието на СФРЈ од 1982 до 1984 година како и фукцијата сојузен секретар за надворешни работи (1984–1988), каде што ја претставуваше Југославија на меѓународната сцена и одржуваше блиски врски со Движењето на неврзаните. Роден беше на 9 декември 1926 година во Фојница.

The post РАИФ ДИЗДАРЕВИЌ ПОЧИНА НА 100-ГОДИШНА ВОЗРАСТ Беше висок функцонер во СФРЈ appeared first on plusinfo.mk.

Норвешката кралица Соња се прости од својот сопруг, кралот Харалд V, со кратка, но исклучително емотивна порака оставена покрај неговиот ковчег.

– Фала ти за прекрасниот живот – пишува на лентата на венецот што таа го остави за својот сопруг. Пораката е потпишана со нејзиниот монограм и веднаш го привлече вниманието на јавноста поради едноставноста и тежината на зборовите. Норвешкиот медиум Dagsavisen ја објави пораката откако биле објавени првите фотографии од ковчегот во капелата на Кралската палата во Осло.

 

View this post on Instagram

 

A post shared by Det Norske Kongehuset (@detnorskekongehus)

Покрај нејзиниот венец има уште еден, со едноставен натпис „Фала“, потпишан од новиот крал Хакон VIII, кралицата Мете-Марит, принцезата Ингрид Александра, принцот Свере Магнус и Мариус Борг Хејби, кого Харалд го прифатил како внук.

Зад неколкуте зборови на Соња се крие љубовна приказна која траела повеќе од шест децении. Таа и тогашниот престолонаследник Харалд се запознале во 1959 година, но нивната врска долго време била чувана во тајност бидејќи Соња била обична граѓанка, без кралско или благородничко потекло. Харалд, сепак, не сакал да се откаже од неа. По девет години врска, добил дозвола од својот татко, кралот Олав V, да се ожени со Соња. Се венчале во катедралата во Осло на 29 август 1968 година.

Инаку, само еден ден по смртта на Харалд, на 28 август, Соња и тој требало да ја одбележат својата 58-годишнина од бракот. Наместо прослава, кралицата се простуваше од човекот со кого го поминала речиси целиот возрасен живот.

 

View this post on Instagram

 

A post shared by Det Norske Kongehuset (@detnorskekongehus)

Соња на последното испраќање избрала и посебно парче накит – брош со дијаманти и бисери кој Соња го наследила од бабата на Харалд, па неговото носење во оваа прилика имало посебна семејна симболика.

Ковчегот на Харалд на 31 август бил преместен од Црвената сала на Кралската палата во дворската капела, каде што ќе остане до државниот погреб на 9 септември. Јавноста може да се поклони пред починатиот крал, додека кралското семејство веќе го одбележа неговото заминување со приватна комеморација.

 

View this post on Instagram

 

A post shared by Det Norske Kongehuset (@detnorskekongehus)

Кралот Харалд V почина на 28 август на 89-годишна возраст, по здравствени проблеми и хемолитичка анемија. По неговата смрт, неговиот син Хакон автоматски го наследи престолот и на 1 септември положи заклетва пред норвешкиот парламент.

The post КРАЛИЦАТА СЕ ПРОСТИ ОД НОРВЕШКИОТ КРАЛ ХАРАЛД СО НЕКОЛКУ ЗБОРОВИ Зад прошталната порака се кријат повеќе од шест децении љубов appeared first on plusinfo.mk.

Групацијата 4iG и SpaceX потпишаа значајни договори за обезбедување сигурна и отпорна поврзаност во Европа. Starlink Mobile ќе ги зајакне телекомуникациските услуги на Групацијата 4iG во Унгарија и на Западен Балкан, додека договорот за Sovereign Solutions ќе го поддржи развојот на суверени и безбедни капацитети за сателитска комуникација на национално ниво.

Двете компании заеднички создаваат единствен модел на соработка во Европа, кој ја обединува комерцијалната сателитско-мобилна поврзаност со сателитската технологија за комуникациите во рамки на Sovereign Solutions.

Договорот е целосно усогласен со постојниот профил на Групацијата 4iG, кој ги опфаќа телекомуникациите, вселенските и одбранбените технологии, и претставува иновативен исчекор за Групацијата.

– Овој исчекор ја нагласува важноста, поврзаноста да стане сеприсутна и достапна за сите. Групацијата 4iG и SpaceX развија модел прв од ваков вид, кој опфаќа комерцијална услуга базирана на сателитско-мобилната технологија на Starlink и воспоставување на првите Sovereign Solutions во Европа. Горди сме што ја предводиме оваа визија во Европа и поставуваме нов глобален стандард за тоа што е возможно – изјави Гелерт Јасаи, претседател и главен извршен директор на Групацијата 4iG.

– Проактивната одлука на Групацијата 4iG да го воведе Starlink Mobile, вклучително и нашата констелациска технологија од следната генерација V2, ќе им обезбеди на луѓето ширум Унгарија и Западен Балкан сигурна директна поврзаност со нивните уреди. V2 ќе овозможи широкопојасен интернет со голема брзина директно на мобилните телефони и ќе го усогласи спектарот од 2 GHz што ќе го користиме ширум светот. Со задоволство ја воспоставуваме оваа соработка со Групацијата 4iG, со која Унгарија се позиционира меѓу првите земји во Европа што ќе ги воведат Sovereign Solutions – изјави Гвин Шотвел, претседателка и главна оперативна директорка на SpaceX.

Надополнување на мобилните мрежи на ONE HUNGARY

Starlink, најголемата светска сателитска констелација во ниска Земјина орбита за директно поврзување со мобилни уреди, овозможува директна врска со мобилни телефони компатибилни со LTE, без потреба од посебна сателитска опрема. Надополнувајќи ги терестријалните мобилни мрежи, сателитската поврзаност ги прави мобилните комуникации достапни во подрачјата каде што покриеноста со конвенционална мрежа е ограничена или воопшто ја нема.

Групацијата 4iG ќе ја воведе комерцијалната услуга во Унгарија и Албанија. Овие две земји ќе им се придружат на повеќе други пазари ширум светот, каде што услугата денес им е достапна на милиони луѓе на шест континенти. Технологијата ја подобрува достапноста на мобилните комуникации, особено во планинските подрачја и крајбрежните води. Динамиката на воведување ќе зависи од регулаторните, техничките и комерцијалните услови на секој пазар.

Сигурната и отпорна поврзаност на Starlink Mobile, исто така, ќе им биде поддршка на корисниците на Групацијата 4iG во итни случаи и при привремени прекини, а ќе овозможи и комуникација за јавните служби и функционирање на критичната инфраструктура.

Во иднина, соработката ќе го вклучи Starlink Mobile V2, технологија од следната генерација која ги користи глобалните приоритетни права на SpaceX на спектарот од 2 GHz. Услугата ќе биде воведена во Унгарија, Албанија, Црна Гора и Северна Македонија. Групацијата 4iG го отвора патот за унапредување на терестријалните и сателитските мобилни комуникации во ЕУ, овозможувајќи им на милиони луѓе пристап до сигурна и отпорна поврзаност во оддалечените и недоволно покриените подрачја.

Со воведувањето на услугата во повеќе земји, Групацијата 4iG е на пат да стане еден од европските предводници во примената на услугите на Starlink Mobile.

Безбедни сателитски комуникации

Преку Sovereign Solutions, 4iG S&D и SpaceX ќе развијат интегрирана услуга со унапредени сателитски комуникации и целосно заштитена размена на податоци. Предвидена за воведување следната година, услугата ќе обезбеди широкопојасна поврзаност и безбедна суверена мрежна инфраструктура.

Групацијата 4iG е најголемата унгарска холдинг-компанија на пазарот на капитал, активна во областите на технологијата, инфо-комуникациите, дигиталната инфраструктура и вселенската и одбранбената индустрија, а нејзините акции котираат на Будимпештанската берза. 4iG го гради своето присуство преку интегриран пристап што опфаќа мрежи со висок капацитет, центри за податоци и меѓународна инфраструктура за пренос на податоци, технолошки системи, како и индустриски и одбранбени решенија, услужувајќи физички лица, деловни субјекти, државни институции и меѓународни клиенти. Со повеќе од 11.000 вработени, стратешката цел на Групацијата е преку долгорочни инвестиции, иновации и меѓународни партнерства да придонесе за дигиталниот, технолошкиот и индустрискиот развој на Унгарија и на регионот.

The post ГРУПАЦИЈАТА 4iG И SPACE X СКЛУЧИЈА ПРВ ДОГОВОР ВО ЕВРОПА Се воведуваат Starlink Mobile и Sovereign Solutions appeared first on plusinfo.mk.

Претседателот на Русија Владимир Путин денеска изјави дека при украинските напади со дронови оштетени се околу сто руски бродови, но оти не е предизвикана „критична штета“ на земјата.

Тој посочи дека според прелиминарните процени, украинските напади предизвикале штета од околу еден процент од бруто-домашниот производ на Русија.

– Ова не е критична штета за нас. Ниту пак можат да ни нанесат критична штета, наведе Путин ви Бишкек, каде се одржува Самит на Шангајската организација за соработка.

Путин истакна дека во украинските напади загинале морнари, меѓу кои и државјани на Азербејџан и на Турција.

Украина изминатиот период ги таргетира танкерите за нафта и бродовите со жито во Црно и во Азовско Море, а исто така ги засили нападите со беспилотни летала со долг дострел длабоко на руска територија, напаѓајќи ги рафинериите за нафта и логистички центри.

Додека Русија ги засили нападите врз енергетската инфраструктура на Украина. Киев, исто така, пријави големи штети и ги обвини своите западни сојузници дека не обезбедиле доволно ракети за воздушна одбрана.

The post УКРАИНСКИ ДРОНОВИ ОШТЕТИЛЕ ОКОЛУ 100 РУСКИ БРОДОВИ Путин вели дека тоа не е „критична штета“ appeared first on plusinfo.mk.

Германското Министерство за економија ја разгледува можноста за поинтензивна употреба на термоелектрани на јаглен со цел да се ублажат високите цени на електричната енергија, изјави портпаролот на министерството.

Планот би вклучувал електрани кои моментално се во режим на подготвеност и се вклучуваат само во случај на недостиг, објави ДПА.

– Не е сосема едноставно од технички и економски причини, како и од прашања поврзани со европското право. Продолжуваме да испитуваме дали може да се осмисли соодветен механизам – изјави портпаролот на владата Стефан Корнелиус.

Германија се соочува со значително зголемување на цените на енергијата предизвикани од војната во Иран.

Истакнат член на Христијанските демократи (CDU) минатата недела предложи поинтензивна употреба на електрани на јаглен, со оглед на високите цени на гасот.

Заменик-лидерот на пратеничката група на CDU, Сеп Милер, изјави дека тие треба да останат во функција сè додека не се изградат електрани на гас со споредлив капацитет, што се очекува во 2030 или 2031 година.
На неговиот предлог се спротивставија социјалдемократите, помал коалициски партнер во владата.

Владиниот портпарол, исто така, изјави дека потенцијалното користење на резервни електрани во моментов не е на дневен ред.

Портпаролот на министерството нагласи дека секое потенцијално користење на резервни електрани, кои ги опиша како релативно стари и неефикасни, на крајот ќе мора да биде профитабилно.

– Ова значи дека ќе мора да процениме дали тие навистина можат да имаат позитивен ефект врз цените на електричната енергија – рече тој.

Германија планира да се откаже од производството на електрична енергија со согорување на јаглен до 2038 година и сè повеќе да се потпира на гасни електрани и обновливи извори на енергија.

Сепак, плановите на министерката за економија, Катерина Рајхе, за изградба на нови гасни електрани за да се обезбеди снабдувањето со електрична енергија беа критикувани од еколошките групи бидејќи, велат тие, тие поттикнуваат понатамошна употреба на фосилни горива.

The post ГЕРМАНИЈА САКА ДА ГИ ВРАТИ ВО ЖИВОТ ТЕРМОЕЛЕКТРАНИТЕ НА ЈАГЛЕН Земјата очајно се бори со високите цени на струјата appeared first on plusinfo.mk.